KOLIDI EBEKUꞌ ALEVE LINGE IZESUꞌ ZUHO MINANIꞌ NETI LUHUVO NITEꞌ PAULOꞌ GIZE-NGIMINEꞌ NABA 2
Izesuꞌ Evenele Zuho Kolidi Ebekuꞌ Minaniꞌ Neti Luhuvo Pauloꞌ Gize-ngidineꞌ Naba Tu Neꞌmi Gomuꞌ Gataaꞌ Gamazi
Mene luhuvo niteꞌ nene aposolo Pauloꞌ gizineꞌ. Aꞌmine Pauloꞌ monovoꞌvemuꞌ nene Aposoloꞌ bukuuꞌ nene gatelesane. Idoꞌ Izesuꞌ Kilisitoꞌ evenele zuho Loma ebekuꞌ minaniꞌ neti luhuvo niteꞌ Pauloꞌ gize-ngidingumuꞌ gomuꞌ gataaꞌ gamazi gizuningukisi nene eiꞌ Pauloꞌ monovoꞌvemuꞌ nene ma gatelesane. Mene luhuvo niteꞌ nene Kolidi ebekuꞌ Izesuꞌ evenele zuho minaniꞌ nene gizo hulo-ngidineꞌ. Pauloꞌ Izesuꞌ evenele zuho Kolidi ebekuꞌ minaniꞌ neti luhuvo niteꞌ gize-ngidineꞌ naba vanumuꞌ gomuꞌ gataaꞌ gamazi gizuninguꞌ nene aꞌmine Kolidi ebekumuꞌ gato gelelesane.
Idoꞌ Izesuꞌ evenele zuho Kolidi ebekuꞌ minavela nene geni minavo nemuꞌ Pauloꞌ aza naba vanu luhuvo nene aꞌmine genimuꞌ gizineꞌ. Geni mala nene mo di lisiheꞌ ikeniꞌza Kolidi ebekutiꞌ eveneꞌ malite nene laza aposoloꞌ none li Pauloꞌ nene aposoloꞌ gihile nomive laniꞌ. Idoꞌ Pauloꞌ ogo molo minineꞌ initekisi idoꞌ gamazi lineꞌ nesi nene diviꞌ ledivika li-di Kolidi ebekuꞌ Izesuꞌ evenele minaniꞌ nete Pauloꞌni nene ningi huli-mikilizave li amuzo milaniꞌ.
Pauloꞌ aza Kolidi luhuvo niteꞌ naba vanu nene gizo hulosa naba tu luhuvo niteꞌ nene olihe gizamivo ne gameneloꞌ nene naniteꞌ sotoꞌ ihe nemuꞌ nene ma ningo gele lamineꞌ amune. Kolidi luhuvo niteꞌ naba tuuꞌ nene Pauloꞌ aza tiꞌ lo lineꞌ: Kolidi ebekuꞌ vo ninge-ngidinguꞌ nene mulumo geni ezelasi idoꞌ Izesuꞌ evenele zuho aꞌmida minadasi sotoꞌ ogavo alingeꞌ Pauloꞌ aza amuzo malehe luhuvo niteꞌ gize-ngidineꞌ. Neꞌmine ogo alingeꞌ nene amuzo malehe luhuvo niteꞌ gize-ngiduhe lo gala gelo geni bilineꞌ. Kolidi aleve ingine goseleꞌ goloso ngebelavo eikumuꞌ ngizeboloꞌ molalihe lo gala gilineꞌ. Ezesi makaꞌ gono daaꞌ asive Titoꞌni nene Kolidila eletineꞌ. Eiꞌ nene aꞌmine luhuvo niteꞌ nene do vo noloseive. Idoꞌ aza tineꞌ molo alineꞌ nene Makedonia polovinisiuko ogosa nelotiꞌ ledo vo guvo nosoloꞌ vo Toloasi taunila voloseive. Neꞌmine ilineꞌ nenako nemuꞌ nene Pauloꞌ aza Eheso misubo hulo Toloasi ebeta vineꞌ. Neꞌmine ineꞌza Titoꞌ aza olihe aꞌmida vo hetelamineꞌ neivo Pauloꞌ aza Kolidi aleve luhuvo niteꞌve di gatikevo nelotiꞌ naniteꞌ sotoꞌ ihe nemuꞌ Titoꞌ ogo lo-emelingumuꞌ gizebo ogo mininguꞌ nene monoꞌ lo-ngemaaꞌ gonoꞌveuꞌ ngelo lamineꞌ minamilineꞌ ogavo aꞌmine Toloasi ebeꞌ nesi nene hulo guvo nosoloꞌ ledo vo Makedonia polovinisila vo minineꞌ. Titoꞌ aza aꞌmida voteneꞌ o-do geiꞌ luhuvo niteka neꞌmo Kolidi aleve ingine muluꞌninguꞌ goloso gilaniꞌza eveneꞌ mukiꞌ nene goloso nitetoꞌ meheꞌine imi gaza neꞌmine ilo lo lo-ngedanidoꞌ nene gili di eꞌmeti minave lo lo-imineꞌ. Nemuꞌ Pauloꞌ aza aꞌminemuꞌ olize izineꞌ nene lo-ngemelesa Kolidi aleveti luhuvo niteꞌ naba tuu ve laaꞌ nouneꞌ mene gize-ngidineꞌ.
Idoꞌ aza ogo ninge-lengedelesuve lo lo huko-ngididoꞌ olihe do gihile izamineꞌ monovo nemukisi idoꞌ engita alosa neingumukisi lo-ngemelesamuꞌ gizineꞌ. Idoꞌ Titoꞌ nene eveneꞌ gohi masi gomuꞌ vilisave lo nemukisi lo-ngimineꞌ. Vilizaniꞌ nene Zelusalemi ebeta gohoꞌ gahaliꞌ minaniꞌ nene hize eleꞌ i-ngidilisamuꞌ huli-ngidilisa moni diꞌmi monaniꞌ gono nene di osuꞌ lilisamuꞌ vilisave lo lo-ngimineꞌ. Idoꞌ aꞌmine ve ngimiselineꞌ nene Pauloꞌ aza Kolidila vilineꞌ gameneuꞌ initeꞌ mukiꞌ nene mo di vaꞌvaꞌ i minadoꞌ vo hetelelesamuꞌ nene ngimiseluve lineꞌ.
Idoꞌ Izesuꞌ evenele Kolidi ebekuꞌ minaniꞌ nene soza aposololite goꞌine izi ngeleꞌmizi gopo ikelizave lo idoꞌ engiꞌ laniꞌ gamaziloꞌ do tiꞌno lo-ngemo idoꞌ eiꞌ nene aposolo gihile nouve lo ngelebizelesamuꞌ idoꞌ eikumuꞌ lave nene sozaloꞌ aposolo ne nizave lo ngelebizelesamuꞌ luhuvo niteꞌ gizineꞌ. Alingeꞌ gehepeve nene luꞌine di velepeꞌ izamave nene gaꞌine do tiꞌ lo lineꞌ: Luꞌine olihe di velepeꞌ izamave ingine aza aꞌmida olihe vo hetelamivo luꞌine ma di velepeꞌ izamilizaniꞌ nene aposolo amuzoꞌvetunuꞌ gono do lihime ngemelesuve lo lineꞌ.
Neꞌmine lo meseꞌ aseka lo-ngedo noꞌnohoꞌ gamazitunuꞌ luhuvo niteꞌ gize osuꞌ lineꞌ ve.
1
Pauloꞌ Aza Izesuꞌ Evenele Noꞌnohoꞌ Ize-ngedo Lo-ngimineꞌ Gamazi
Izesuꞌ Kilisitoꞌ aposolo mineline lo Oꞌmosoꞌmo eiꞌ luloloꞌ neleꞌmize molave Pauloꞌ naza leze zuho Timoteokisi makaꞌ mino Oꞌmosoꞌmi evenele zuho Kolidi ebekuꞌ mulise milaaꞌ nave lengikisi idoꞌ Akaia misubo linge mukikuꞌ Oꞌmosoꞌmi evenele miniꞌmi monaniꞌ lengikisi nene luhuvo niteꞌ mene nogize-lingiduze. Ningilo. Idoꞌ meteho Oꞌmoso idoꞌ Guvelesi ve Izesuꞌ Kilisitoꞌ engitatiꞌ nasahiliꞌ idoꞌ hongu lo lamino minaaꞌ monovo nene lengita mine do vo minivoo.
Oꞌmosoꞌmo Do Luꞌ Izaaꞌ Ineꞌ Monovo Lo Sotoꞌ Ogo Aꞌminemuꞌ Pauloꞌ Oꞌmoso Opoꞌni Lineꞌ Gamazi
Guvetesi ve Izesuꞌ Kilisitoꞌ eiꞌ Oꞌmosoꞌve mino eiꞌ meleho minive nene opoꞌni lolone. Aza nene mulumote gelaaꞌ monovoliꞌmi meleho mino hize eleꞌ ogaꞌ monovo mukiꞌ do sotoꞌ o-ledaaꞌ neineꞌ Oꞌmoso nene neive. Oꞌmoso naza hize eleꞌ okuvo ingine aꞌmineꞌmine igi eveneꞌ ma neꞌmine manaꞌmine geni gihilizaniꞌ nene hize eleꞌ i-ngidilizadoꞌ lisiheꞌ i minilizangumuꞌ ve lo aza nene genite vaikuꞌ hize eleꞌ o-ledaaꞌ neive. Idoꞌ neꞌmine noluvoniꞌ nene nemuꞌ noluve. Laza nene Kilisitoꞌ mulumo gilidiꞌmine ogo mulumo vauve elo gelaaꞌ nouneꞌza aꞌminguꞌ nene Oꞌmosoꞌmo Kilisitoꞌnimuꞌ ve lo hize eleꞌ nesi vauve elo o-ledaaꞌ neive. Laza mulumo gono noduneꞌ nene Oꞌmosoꞌmo lengiꞌ hize eleꞌ o-lengedo do lunguꞌ izelingumuꞌ ve losa nene nodune. Idoꞌ Oꞌmosoꞌmo leliꞌ hize eleꞌ o-lede neineꞌ neꞌmo nene lengiꞌ hize eleꞌ o-lengedelingumuꞌ ve lo hize eleꞌ o-lede neive. Laza mulumo gono nodunidiꞌmine igi linginesi nene mulumo gono di ha gihi di dizi minilizaniꞌ neꞌmo nene Oꞌmosoꞌmo aꞌmineꞌmine ogo hize eleꞌ o-lengedeleseive. Idoꞌ leze mulumo gono dunidiꞌmine igi linginesi nene nidaze. Nemuꞌ nene Oꞌmosoꞌmo leliꞌ hize eleꞌ o-ledaaꞌ neidiꞌmine ogo lengikisi nene aꞌmineꞌmine ogo hize eleꞌ o-lengedeleseive lo gelosa lengikumuꞌ nene monokuꞌ eleꞌvoleꞌ igi minilisave lo gele noneꞌ nene mo gele eleꞌvoleꞌ o none.
Neze zuhokizo, Asia misubouꞌ geni initeliꞌmi lulouꞌ minuneꞌ nemuꞌ nene lo-lengemamuvo lingine gilami minilizaniꞌ nene edamoloseive lo gelosa mene nolo-lingimuve. Laza nene aꞌmine geni leliꞌ okodela sotoꞌ ineꞌ nene atoliꞌmine geni mo ngelo gehamolonidoꞌ o minineꞌ geni sotoꞌ o-ledavo neꞌmo leliꞌ nene gohi minevoꞌ alevoꞌ amolobe lo gate mukiꞌ goloso gelo golise gilune. Ee, luteuꞌ neve nene mo helaatoꞌ leleꞌmize milikeniꞌ neive losa gele minune. Neꞌmine initeꞌ sotoꞌ o-lidineꞌ nene laza lelitoꞌ gele medelo mino minamo asi hilangutiꞌ do ote-ngedaaꞌ ive Oꞌmosoloꞌ nene lehete o mineloningumuꞌ nene sotoꞌ o-lidineꞌ ve. 10-11 Idoꞌ monovo goloso gehepeve ato atoꞌ i-lidilisa aniꞌ neꞌmo nene hilunidineꞌza Oꞌmoso neꞌmo nene mo do luꞌ izeꞌmo vo minineꞌ ve. Idoꞌ aza gohi do luꞌ izelidoꞌ o neive. Ee, linginesi nene lelikumuꞌ Oꞌmosola li hize eleꞌ i-lidi nizavo aza nene gohi do luꞌ izeleseive losa eitoꞌ gele muꞌmusiꞌ ogo none. Neꞌmine ogosa ezela eveneꞌ mukilite lelikumuꞌ lilizaniꞌ nene gelosa mangi o-ledo lukuvo lemelineꞌ nene eveneꞌ mukiꞌ ingine Oꞌmosola nene leliꞌ neꞌmine o-ledelineꞌ nemuꞌ nene opoꞌni lilisave.
Pauloꞌ Engita Volove Loko Vamineꞌ Monovo Lo-ngimineꞌ Gamazi
12 Idoꞌ neꞌmine noluvoniꞌ nene nemuꞌ noluve: Leliꞌ luteuꞌ nene tiꞌ lo gele eleꞌvoleꞌ ogo none: Me misubouꞌ aleveti vovoꞌninguꞌ ogo molo uneꞌ nene me misubouꞌ aleve gilavo otohato monovo ve laaꞌ naniꞌ monovoloꞌ nene eꞌmetamo asi Oꞌmosoꞌmi nasahiliꞌve neꞌmo hize eleꞌ o-ledo neivo monovote nene do zovoꞌ zavaꞌ izo soza niteꞌ amo Oꞌmosoꞌmo gilivo lisiheꞌ ilineꞌ initekovoꞌ nene ogo molo minuneꞌ ve. Idoꞌ lengita nene aꞌmine monovoloꞌ nene eꞌmete gehepeve ogo ogo molo minuneꞌ ve. Idoꞌ luteuꞌ nene neꞌmine lo gele eleꞌvoleꞌ ogo minaaꞌ nouneꞌ nenako leliꞌ monovotemuꞌ nene lolize izaaꞌ noune. 13-14 Idoꞌ monovote nene zovoꞌ zavaꞌ izo soza saza initeꞌ osaꞌmune lo luvoniꞌ gamazi mene mo laminetokovoꞌ noluvoniꞌ nene luhuvo niteꞌ menelotiꞌ nene ningi gililisave. Naza gamazi gizaaꞌ nouvoniꞌ nene sunoꞌ gamazi gizamo asi sotoꞌ ogo minineꞌ gamazi lingine ha gati gili guni ilizadoꞌ o minineꞌ gamazivoꞌ nene gizaaꞌ nouve. Leliꞌ monovote lingela nene lingine mo gili guni i nizave. Idoꞌ monovote lingela lingine gili guni aniꞌ neꞌmino nene lelikumuꞌ gili guni igi osuꞌ lisa lelikumuꞌ tiꞌ li gililizaho lo gele minaaꞌ noune: Adoꞌ Guvetesi ve Izesuꞌ Kilisitoꞌ alineꞌ gamene nabala nene Paulole lelikumuꞌ ngolize izaaꞌ naaniꞌ neꞌmine ogo laza Paulonginemuꞌ lolize izelonidoꞌ o none li gililizaho lo gele minaaꞌ noune.
15 Idoꞌ lingine nenikumuꞌ nene mo lamineꞌ gililisave lo naza gele muꞌmusiꞌ o mino gomuꞌ nene naza gamene sitaꞌ lengita vokuvo lingine gamene sitaꞌ muludinguꞌ lamineꞌ gililizave lo gelo 16 Makedonia misubouꞌ volodoꞌ nene lengitasi voosa alodokisi nene gohi lengita ogo ninge-lengedekuvosa nene lingine Zudaia misubouꞌ voloniꞌ akaꞌne vili-nidisa nimiselilizave lo giluvoniꞌ ve. 17 Neꞌmine lo gelosa lengita amuvoniꞌ nene naza gamazi do senisi senisi ogo laaꞌ uve nouvodiꞌmo nehe. Naza oloniꞌ initekumuꞌ gaꞌne gelo do lisiheꞌ ogaꞌ nouvonguꞌ nene me misubouꞌ aleve vaiꞌ igaꞌ adiꞌmine ogo oo, neꞌmine ha olodoꞌ nouve nolo aꞌmidokisi oꞌve, mo amolosuve lo laaꞌ nouhe. Oꞌove, mo neꞌmine osaꞌmuve. 18 Oꞌmoso eikumuꞌ nene eveneꞌ mukiꞌ gele muꞌmusiꞌ olonidoꞌ lisiheꞌ o neineꞌ nenako nemuꞌ nene lingine lelikumuꞌ nene gili muꞌmusiꞌ ilizadoꞌ o neive. Laza lo-lengemaaꞌ nouneꞌ gamazi nene senisimi senisimi osaꞌmune. Oo laaꞌ nouninguꞌ oꞌove haleko minaaꞌ neineꞌ neꞌmino haleko neivosa nene ma losaꞌmune. 19 Naza laminetoꞌ noluve. Laza Siluvanolesi Timoteolesi lo sotoꞌ o-lingimunive Oꞌmosoꞌmi gipele Izesuꞌ Kilisitoꞌ eiꞌ nene oo linguꞌ oꞌove nene aꞌminguꞌ minamivo gamazi laaꞌ ive nene neive. Aza oo lineꞌ initeꞌ nene mo gihile izaakovoꞌ ogaꞌ neive. 20 Ee, aza nene Oꞌmosoꞌmo salani gamazi lo hukaaꞌ neidoꞌ nene oo lo do gihilevoꞌ izaaꞌ ive nene neive. Nemuꞌ nene aꞌmine Oꞌmosoꞌmi gamazi gelosa Oꞌmoso opoꞌni nolo lamineꞌ eleꞌvoleꞌ gamazi ve laaꞌ nouneꞌ nene eiꞌ Izesuꞌ Kilisitoꞌnimuꞌ ve losa nene lamineꞌ ve laaꞌ noune. 21 Idoꞌ Kilisitoda giꞌmize giliꞌ lo mineloningumuꞌ lezesi lengikisi hize eleꞌ ogaꞌ ive nene Oꞌmoso eiꞌ nene neive. Aza nene eiꞌ gonoloꞌ leleꞌmize molaniꞌ ve. 22 Idoꞌ leleꞌmize nomolo eiꞌ ve lo noso molo-ledo salani molo-lidineꞌ initeꞌ mukiꞌ nene damolosune li gilikelizave lo aꞌmingutiꞌ ma ganaꞌ dalonidoꞌ o minineꞌ initeꞌ eiꞌ Sikalahuꞌve nene luteuꞌ lehize-ledavo neive.
23 Naza Kolidi ebetida vamuvoniꞌ nene naza ma voloniꞌ nene geni gono gehe-lengedekuvo okodidoꞌ gilikelizave losa nene do lunguꞌ izosa vamuve. Nene mo laminetoꞌ noluve. Soza nololoniꞌ nene luꞌneuꞌ ninge osuꞌ lo neive Oꞌmoso neꞌmo nene lo sotoꞌ ilive losa ezela nene noluve. 24 Lingine gamazi gihile gili eleꞌvoleꞌ igi monokuꞌ mini giliꞌ li nizaniꞌ nenako nemuꞌ gizebo amuzo molo o-lengedo mino neꞌmine manaꞌminemuꞌ gili eleꞌvoleꞌ ilizave lolosa gelamuneꞌza haza lingine muludinguꞌ lamineꞌ gili minilizangumuꞌ lengeleꞌmize lamineꞌ olosa nene lengikisi makaꞌ gono nodune.