IZESUꞌ EVENELE ZUHO GAꞌINE DO ZUDAꞌ GIZE-NGIDINEꞌ LUHUVO NITEꞌ
Zudaꞌ Gizineꞌ Luhuvo Nitekumuꞌ Gomuꞌ Gataaꞌ Gamazi
Mene luhuvo niteꞌ gizive nene Zakoboꞌ akunolo Zudaꞌ gizuve lo gizineꞌ ve. Idoꞌ Lukaꞌ gizineꞌ luhuvo nitekuꞌ Izesuꞌ aposoloꞌne zuho minilizave lo do kegese-ngidive tuveluꞌa nete guliveꞌine gize do limingutiꞌ hamoꞌ ma nene gulive Zudaꞌ Zakoboꞌ ve lo minineꞌ ve. Ne gamazi nene eveneꞌ linge ngomo malite di velepeꞌ izi Zakoboꞌ akunolo Zudaꞌ ve li laniꞌ. Ne neiha eveneꞌ linge mukilite aꞌmineꞌmi monovo nene neꞌmino noloseive li laniꞌ: Zakoboꞌ gipele Zudaꞌ ve. Nemuꞌ nene guleheꞌ veliti gamazi adoꞌ Ingilisi gamaziutiꞌ di velepeꞌ izaniꞌ monoꞌ godolouꞌ nene aꞌmine gamazi Zuda Zakoboꞌ di velepeꞌ izi gizi nizadoꞌ nene Zakoboꞌ gipele Zudaꞌ ve li gizi nizaniꞌ ve. Nemuꞌ nene tiꞌ lo gele none: Aꞌmine Lukaꞌ gizive aposoloꞌ Zudaꞌ eiꞌ uvolohi gulive Zakoboꞌ nevoba asi melehi gulive nene Zakoboꞌ ve lo minineꞌ ve. Nemuꞌ nene aꞌmine aposoloꞌ Zudaꞌ aza Zudaꞌ luhuvo niteꞌ nene gizivoba asi eiꞌ abalaho maliꞌmo gizineꞌ noloseive lo gele none. Idoꞌ Mataioki Malekoki ingine luhuvo niteꞌine gizasinguꞌ nene Zakoboki Zudaki nene Izesuꞌ akunolo minasineꞌ ve li gizi nizasive. Aꞌmine Zakoboꞌ aza Izesuꞌ evenele zuho Zelusalemi ebekuꞌ mulise milaaꞌ aveliti gizebo veꞌine loloꞌ ogo mino monoꞌ godolo gosohokuꞌ Zakoboꞌ luhuvo niteꞌ neineꞌ nene gizineꞌ ve. Idoꞌ ganakutiꞌ eveneꞌ ma nete aꞌmine Zakoboꞌ akunolosi Izesuꞌ akunolosi minive neꞌmo mene luhuvo niteꞌ gizineꞌ ve li liꞌmi aniꞌ ve.
Zudaꞌ aza luhuvo niteꞌve nene eveneꞌ mulise ma minaniꞌ nene gizo hulo-ngede noloseineꞌza ne zuho ma nene gizo nohulo-ngiduve lo luhuvo niteꞌveuꞌ nene guliveꞌine ma gizamineꞌ ve. Oꞌmosoꞌmo asi lo-ngedo lulo ngemavo Izesuꞌ Kilisitoꞌ gizebo o-ngede neive engitoꞌ nene gizo hulo-ngidineꞌ. Aꞌmine engikumuꞌ lineꞌ gamazi nene Izesuꞌ evenele mukitokisi vo daloseive. Aꞌmine gameneuꞌ nene eveneꞌ malite Izesuꞌ Kilisitoꞌni meheꞌine imi mini soza li Oꞌmosoꞌmo lihimete ha hulo-ledelineꞌ nenako nemuꞌ nene laza gopo neꞌmine manaꞌmine initeꞌ leliꞌ luteloꞌ nene ha olosune li monovo golosolokisi eꞌmeti mini eveneꞌ mamuꞌ inginesi neꞌmine ilizave li luꞌninguꞌ hizaaꞌ aniꞌ. Zudaꞌ me luhuvo niteꞌ gizineꞌ nene Izesuꞌ evenele zuho ingine aꞌmine neꞌmine igaꞌ aveti akaꞌine nene hizi tili-ngidilizangumuꞌ amuzo milalizave lo luꞌine do ote-ngedelesa gizineꞌ ve. Idoꞌ Petoloꞌ luhuvo niteꞌve naba tuuꞌ lakaꞌni tu neuꞌ gizineꞌ gamazisi idoꞌ Zudaꞌ me luhuvo nitekuꞌ gizineꞌ gamazi linge vaiꞌ nesi nene hamoliꞌmine gamazi gehepeve gizasineꞌ ve.
Idoꞌ Isilaeleꞌ eveneꞌ ma adoꞌ Aigita misubouko goloso igi minadotiꞌ nene Oꞌmosoꞌmo ngeleꞌmizo vo alingeꞌ lihime ngemo do goloso o-ngidivesi idoꞌ angeloꞌ golososi idoꞌ Sodomi idoꞌ nGomola alevelitesi adiꞌmine igi aꞌmine soza monoꞌ laaꞌ avemuꞌ Zudaꞌ live nete veneꞌ vemohoꞌ ingaaꞌ aniꞌ neꞌmine igi monovo goloso igaꞌ aniꞌ. Oꞌmosoꞌmo aꞌmine gozopoꞌ minave lihime ngimidiꞌmine ogo aꞌmine soza monoꞌ laaꞌ avesi lihime ngemeleseive lo Zudaꞌ lineꞌ ve. Idoꞌ aꞌmine soza monoꞌ laaꞌ ave nete Oꞌmosoꞌmi angeloꞌvesi diviꞌ ledivika li-ngidaaꞌ aniꞌ monovoꞌinemuꞌ lo-ngemo Zudaꞌ aza angeloꞌ naba Mikaeleꞌ adoꞌ angeloꞌ linge mukiꞌ ngivileꞌ ogo neineꞌza aza neꞌmine monovo ngelo ma amoloseive lo lo-ngimineꞌ. Idoꞌ monoꞌ godolo litehe neꞌmo engikumuꞌ lo-limive adoꞌ Kainiꞌ ve Balaamuꞌ ve idoꞌ Kolaꞌ ve ingine eveneꞌ goloso minaniꞌ neꞌmini aꞌmine soza monoꞌ laaꞌ ave nene eveneꞌ goloso nizave lineꞌ. Luhuvo niteꞌve gatilizave nene tiꞌ lo lo-ngimineꞌ: Lingine mulise mili nosoꞌ niteꞌ naaꞌ nanguꞌ nene aꞌmine soza monoꞌ laaꞌ ave ikevo makaꞌ naaꞌ nadotiꞌ lingine longovozo hililizadoꞌ minaaꞌ nave. Ingine limusoliꞌmo goline do sotoꞌ amilidoꞌ minidiꞌmini mini idoꞌ gihile izelidoꞌ o minineꞌ zaliꞌmo gihile izamo haza ote minidiꞌmini mini ingine di sotoꞌ ilizadoꞌ o minineꞌ monovo lamineꞌ nene mo di sotoꞌ isaꞌmave.
Nelotiꞌ nene Zudaꞌ aza gozopoꞌ minive Enokuꞌ neꞌmo polohelelite laaꞌ naniꞌ neꞌmino tiꞌ lo live lineꞌ: Oꞌmosoꞌmo angeloꞌvesi ngeleꞌmizo ogo aꞌmine lihimeloꞌ ve nene goniꞌ o-ngedo lihime ngemeleseive. Zudaꞌ aza neꞌmine loo neꞌmine eveneꞌ goloso sotoꞌ ilisave li aposololite hungoꞌ ngimangumuꞌ nene lo gaꞌine ineꞌ. Idoꞌ engiꞌ gili eleꞌvoleꞌ igaꞌ naniꞌine neꞌmo Kilisitodatiꞌ daniꞌ ngemeni dameni neꞌmi monovo neꞌmine minivo aꞌmine ngemeni dameniꞌine nene naba ilive li gono ha divoꞌ minilizave lo lo-ngimineꞌ. Oꞌmosoꞌmo lulo lemo monovo lamineꞌ o-lemelidoꞌ lisiheꞌ o neive li gilaniꞌ monovovoꞌ nene gamene gamene igi mili minilizave lo lo-ngimineꞌ.
Idoꞌ aꞌmine soza monoꞌ laniꞌ neꞌmo gaꞌine gili gopo ave nene gili vevesilizaniꞌ akaloꞌ ngeliꞌmizi milalisa hize eleꞌ i-ngidilizave lo lo gaꞌine ineꞌ. Neꞌmine ilisaniꞌza aꞌmine velite monovo goloso ilizanguꞌ nene vo giꞌmizalone li olovoꞌ ilizave lo lo-ngimineꞌ.
Neꞌmine lo Oꞌmoso aza adoꞌ leliꞌ alete molo-ledo initelite di goloso i-lidamavo idoꞌ lihimeliꞌmo hute molo-ledamivo nonivo eiꞌ veleloꞌ leleꞌmize ote-ledelidoꞌ lisiheꞌ o neive aza guliveꞌve nene dizo minivo amuzoꞌvesi ve minelive lo Oꞌmosola lo luhuvo niteꞌve nene gize osuꞌ lineꞌ ve.
1
Zudaꞌ Luhuvo Niteꞌ Mene Gizelesa Apiꞌ Ogo Noꞌnohoꞌ Gamazi Gize-ngidineꞌ Gamazi
Adoꞌ Izesu Kilisitoꞌ gonoloꞌ ve Zakoboꞌ akunolo Zudaꞌ naza luhuvo niteꞌ meve nene Oꞌmosoꞌmo lulo lengeme mino vise lo do eita o-lengedavo Izesu Kilisitoꞌ gizebo o-lengede neive lengiꞌ nene nogize-lingiduze. Oꞌmosolatiꞌ mulumote ningaaꞌ monovosi idoꞌ hongu lo lamino minaaꞌ monovosi idoꞌ lulo lemaaꞌ neineꞌ monovoꞌve nesi nene lengita vauve elo vaiꞌ loꞌmo vo miniliho.
Vovoꞌninguꞌ Nene Eveneꞌ Ma Izesu Kilisitoꞌni Meheꞌine Imi Monoꞌ Di Gopo Igi Nilavo Ingine Monoꞌ Gihile Nene Zegeꞌ Zegeꞌ Igi Hizi Eleꞌ Ilizave Lo Aꞌmine Veti Monovo Zudaꞌ Lo-ngimineꞌ Gamazi
Luꞌne lengeme nouvoniꞌ alevekizo, naza Oꞌmosoꞌmo nenikisi lengikisi do luꞌ izineꞌ monovomuꞌ nene luhuvo niteꞌ ma gize-lengedeloho lo amuzo molo nogiluvodoꞌ mene Oꞌmosoꞌmo eze evenele mudise levo levo lo minelineꞌ monoꞌ lehize-lidineꞌ nene lingine zegeꞌ zegeꞌ igi hizi eleꞌ ilizave lo luhuvo niteꞌ lutine do oto ma gizeloniꞌ ogavosa mene nogizuve. Ne nanitekumuꞌ ve. Eveneꞌ ma nene heleleꞌ igi vovoteuꞌ ma dizikeve. Ingine nene monotoꞌ eꞌmete lamineꞌ ami mini Oꞌmosoteꞌmo nasahiliꞌ o-ledo lihimete hulo-ledaaꞌ neineꞌ monovoꞌve nene di zovoꞌ izii aꞌmine monovoꞌve neꞌmo nene monovo goloso gopo geligeli ogo daaꞌ nene asabuꞌ izaaꞌ neive li eveneꞌ nabate hamoꞌ minive Guvetesi ve Izesu Kilisitoꞌni nesi nene meheꞌine imaaꞌ nave. Aꞌmine neꞌmine ve nene Oꞌmosoꞌmo goniꞌ o-ngedo lihime ngemeleseive li gozopoꞌ akaꞌmilatiꞌ li huki gizi nizaniꞌ ma neive.
Lo-lengemeloniꞌ gamazi mukikumuꞌ mene lingine mo gili nizaha aꞌminemuꞌ nene lo gatine olove lo gele noosa nene noluve: Adoꞌ Guvelesi ve neꞌmo nene Isilaeleꞌ aleve Aigita misubouꞌ minangutiꞌ ganaꞌ nene do nguꞌ izo ngeleꞌmizo vineꞌza alingeꞌ nene ezemuꞌ gili eleꞌvoleꞌ amave ngebele geseꞌ ineꞌ ve. Idoꞌ angeloꞌ linge Oꞌmosoꞌmo ngimineꞌ moꞌmosiꞌnidoꞌ nene mini giliꞌ lami aꞌmine gonoꞌine hulaniꞌ angeloꞌ nene gamene nabala goniꞌ o-ngedelove lo levo levo lo minelineꞌ seni nalaꞌ nene ize-ngedo litiꞌmusouꞌ hulo-ngedeko gizebo o-ngedo neive. Idoꞌ aꞌmine angeloꞌ nete lihime daniꞌ neꞌmino nene Sodomi nGomola idoꞌ aꞌmida mineꞌmo monineꞌ numuno ebekuꞌ aleve lihime daniꞌ nene adoꞌ veneꞌ vemohoꞌ gopoꞌ napa ingaaꞌ igi minaaꞌ idoꞌ veneꞌ nene huli vemohoꞌ angiseꞌine okoꞌninguꞌ initeꞌ igaꞌ aniꞌ ve. Neꞌmine igi minangumuꞌ Oꞌmosoꞌmo oloꞌ gizeꞌ vote-ngidineꞌ ve. Neꞌmine ineꞌ nene eveneꞌ ma aꞌmineꞌmine ogo lihime ngemo lihizami olokuꞌ hulo-ngedelineꞌ avazaha nesi do sotoꞌ ogo lelebizineꞌ ve.
Aꞌmine monoꞌ di gopo igi laaꞌ avemuꞌ mene noluvoniꞌ nene ingine aꞌmineꞌmine igi lihime disa vamuꞌ neꞌmine ningaaꞌ naadotiꞌ nene engiꞌ okoꞌine di goloso igi mini idoꞌ ve nabaꞌmi gizeboloꞌ mini gamaziꞌve gili di minaaꞌ monovomuꞌ nene goseleꞌ igi hozila dizi minave naba angeloꞌ nevoꞌmine nesi nene divi lediviꞌ i-ngidaaꞌ nave. Ingine neꞌmine igaꞌ naha gonoso Moseꞌni nene zaho dalive li aꞌminemuꞌ nene angeloꞌ naba Mikaelekisi Satanisi gamazi gono dasinguꞌ nene Mikaeleꞌ (Maikoliꞌ) aza Satani dovo ledevoꞌ gamazi lo-do elemelodoꞌ nomuve lo gelo neꞌmine amineꞌ ve. Asi Guvelesi veꞌmo gelemivo lo aꞌneevoꞌ nene ma lo-imineꞌ ve. 10 Neꞌmine ineꞌza me noluve nene gili hehe lamilizadoꞌ o minineꞌ initekumukisi nene ganuꞌ li gamazi goloso laaꞌ nave. Idoꞌ ingine initeꞌ linge mamuꞌ gilaaꞌ naniꞌ nene nama gaha ize gulolite haza okoꞌineꞌmo laniteꞌ gilineꞌ initekumukovoꞌ gilaaꞌ naniꞌ ngemeniloꞌ nene di milisa gilaaꞌ naniꞌ nenako nemuꞌ nene aꞌmine gilaaꞌ naniꞌ initelite nene ngeleꞌmize goloso igaꞌ nave. 11 Agae, engiꞌ nene mo mulumo gono dalisave. Ee, ingine Kainiꞌ eikumukovoꞌ gelaaꞌ ineꞌ monovo maloꞌ eꞌmetikeve. Idoꞌ moni heneni dalone li Balaamuꞌ aka laminetotiꞌ zovoꞌ izo vo moniloꞌ lulo molaniꞌ maꞌmine monovoloꞌ amuzo mili eꞌmetikeve. Idoꞌ ma nene Kolaꞌ ineꞌ neꞌmine igi ingine nene Oꞌmosoꞌmo lineꞌ gamazimuꞌ nene oꞌove li biluvaꞌ i-daaꞌ naniꞌ nenako labuluvo ineꞌ neꞌmine igi labuluvo ilisa nave. 12 Lingine lutine ge neme ne geme li minaaꞌ nangumuꞌ nene di nubo igi makatoꞌ nosoꞌ niteꞌ naaꞌ nanguꞌ nene aꞌmine neꞌmine ve ingine imi mini ngovozosi hilami mini nosoꞌ niteꞌ sau sau li naaꞌ naniꞌ neꞌmo nene aꞌmine nosoꞌ niteꞌ nalisa mulise milaaꞌ naniꞌ mulisetine nene di goloso igaꞌ nave. Idoꞌ engiꞌ neve nene hepeliꞌmo limuso hubu lo do vavo goline izamivo ma hize eleꞌ o-ledesaꞌmineꞌ neꞌmino monokuꞌ nene ma hizi eleꞌ i-lidisaꞌmave. Idoꞌ ma nene za ma gihile izaaꞌ naaniꞌ gameneuꞌ malite gihile izamaaꞌ naaniꞌ neꞌmino monoliꞌmi gihile di sotoꞌ amavo za ma luhive gili hulikevo mo gokoꞌ laaꞌ neineꞌ neꞌmino engiꞌ luꞌine nene mo mudise hele gehepeve ogave. 13 Idoꞌ engiꞌ neve nene hepeꞌ naba elo guvo noso velo gituhoꞌ galakalaꞌ ogo noso hemuvolotiꞌ pipiaꞌ do ogo gahevela hutileꞌ ogo hulaaꞌ neineꞌ neꞌmine nene minaaꞌ nave. Idoꞌ ma nene sonohilite vilizaniꞌ akaꞌine hulisa zovoꞌ izi mala vaaꞌ naaniꞌ neꞌminisa nene nizave. Aꞌmine soza monoꞌ apizi lingimaaꞌ nave engiꞌ nene vi litiꞌmuso atoliꞌmine gehepeveuꞌ minevoꞌ minevoꞌ ilizave lo Oꞌmosoꞌmo salani molo-ngede neivo engikumuꞌ ha gizebo o neive.
14 Idoꞌ aꞌmine soza monoꞌ laaꞌ avemuꞌ nene Adamudotiꞌ mini di aveutiꞌ naba seveni minive Enokuꞌ neꞌmo gomukutiꞌ Oꞌmosoꞌmi veletiꞌ gamazi ma tiꞌ lo lineꞌ ma neive:
Me gililo. Guvelesi ve nene eze angeloꞌve mulise naba tauseni tauseni neꞌmine ngeleꞌmizo ogo
15 monoꞌ monovoloꞌ eꞌmetamave mukiꞌ ingine
monokuꞌ nomineꞌ monovoloꞌ eꞌmeti igi mili aniꞌ initeꞌ mukikumukisi
idoꞌ monotoꞌ eꞌmetamave lihimeloꞌ ve
ezemuꞌ gizengize gamazi li-daaꞌ aniꞌ mukikumukisi nene
goniꞌ o-ngedo lihime ngemelove lo alosa neive.
16 Aꞌmine mene noluve neꞌmine nete nene initeꞌ mukikumuꞌ lihiteheka li muluꞌninguꞌ liteꞌ liteꞌ li goloso gilaaꞌ ave mini engiꞌ okoꞌineꞌmo laniteꞌ gilidokovoꞌ eꞌmeti mini gamaziꞌmovoꞌ i vaniꞌ mini initeꞌ ma dalobe li goꞌine izi ngopoꞌni laaꞌ nave.
Aꞌmine Monoꞌ Gihileloꞌ Eꞌmetamilizavemuꞌ Nene Eheꞌ Igi Ningisa Minilizave Lo Igi Mili Minilizaniꞌ Monovomuꞌ Gaꞌine Do Lo-ngimineꞌ Gamazi
17 Luꞌne lengeme nouvoniꞌ alevekizo, lingine Guvelesi ve Izesu Kilisitoꞌ aposoloꞌvelite gomukutiꞌ laniꞌ gamazi mamuꞌ gatine molalize. Gili nge li minilo. 18 Adoꞌ tiꞌ li li-lingimaniꞌ mamuꞌ nene noluve: Gamene alingeꞌ nela nene monokumuꞌ gize abelenga laaꞌ ave engiꞌ luꞌnidokovoꞌ di mili monokuꞌ nomineꞌ monovo golosoloꞌ eꞌmetilizave ma sotoꞌ ilisave li li-lingimave. 19 Aꞌmine aleve nene Oꞌmosoꞌmi evenele hizi hoꞌli-ngidaaꞌ ave nene nizave. Ingine me misubouꞌ initekumukovoꞌ gelaaꞌ neineꞌ ngemenisivoꞌ minikevo Oꞌmosoꞌmi Sikalahuꞌ nene engita minesaꞌmivo ma damave. 20 Ne neiha luꞌne lengeme nouvoniꞌ alevekizo, lingine neve nene monotine gili eleꞌvoleꞌ igaꞌ naniꞌ adoꞌ Oꞌmosolatiꞌ atoliꞌmine gehepeve o neidoꞌ nene mine giliꞌ li mini monokuꞌ naba ilizangumuꞌ nene ge hize eleꞌ o-nede ne hize eleꞌ o-gede li mini Oꞌmosoꞌmi Sikalahuꞌ neꞌmo amuzo lingimivo minilizadotiꞌ nene Oꞌmosola li mini 21 Oꞌmosoꞌmo lulo lengemeꞌmo vo minelidoꞌ mini mili minilizangumuꞌ nene lengiꞌ monovotidoꞌ gizebo lamineꞌ igi mini Guvetesi ve Izesuꞌ Kilisitoꞌ mulumotine gelo ogo minevoꞌ minevoꞌ lengemeni gihile do otuho-lengedelingumuꞌ nene gili muꞌmusiꞌ igi aꞌminemuꞌ gizebo igi minilo. 22 Eveneꞌ linge ma monokumuꞌ gaꞌine setaꞌ sataꞌ gili minilizave nene mulumoꞌine gili hize eleꞌ i-ngidilo. 23 Idoꞌ linge ma neve nene olokuꞌ vaaꞌ akaloꞌ mini mili nizangutiꞌ nene singeli huli-ngidi di nguꞌ izilo. Idoꞌ lingine mulumoꞌine gililizadoꞌ i minilizaniꞌ aleve linge nene okoꞌineꞌmo laniteꞌ gilineꞌ monovo goloso nene okoꞌnidoꞌ minelineꞌ nenako nemuꞌ nene aꞌmine okoꞌnidoꞌ niteꞌ nemukisi nene goseleꞌ i minisa lelitasi giꞌmizalive li golise gili eheꞌ i minisa mulumoꞌine gili hizi eleꞌ i-ngidilo.
Luhuvo Niteꞌ Mene Gize-ngedo Osuꞌ Losa Oꞌmosola Opoꞌni Lo Lineꞌ Gamazi Gizineꞌ
24-25 Guvetesi ve Izesuꞌ Kilisitoꞌ gono dadotiꞌ do luꞌ izaaꞌ ive minive Oꞌmoso hamoꞌ aza lengiꞌ alete molo-lengedo neivo lodohoꞌ izi limi ingami okodidoꞌ gamazisi nomivo longolize naba izi nizavo eiꞌ labanaꞌvesi miniveꞌmi veleloꞌ nene lengeleꞌmize molalidoꞌ lisiheꞌ o neize. Eita nene guveleꞌve nabavoꞌ mino gizebo ve minaaꞌ amuzoꞌve gozopotiꞌ minineꞌ nene idisesi alingekisi minevoꞌ minevoꞌ ogo mine do dizo minelive. Mo neꞌmino miniliho.
Moda aꞌnesiꞌ ve.