1 ✡Mat 7:15; 1Te 5:21; 1Ioa 2:18; 2Ioa 1:7Ta menexilo e amasaxainge, ngalomu. Mamu sou ngamuxaxu tangengi noxiꞌa ta uleenu ukalusi. Ngamaisiꞌa laixe lexe aneꞌi meꞌa noxou Lataua, uasi meꞌa vilemo. Xo ta mitema sou palomatana kalavoi tavuꞌalo milaa miluꞌe no lia ꞌo mukalu. 2 ✡1Ko 12:3Ta uleenu ane ivikala manina lexe Iesu Kalisito anu muxali itema manina, la aneꞌi ta uleenu ane ne meꞌa noxou Lataua. No anu palapalaꞌalixu noxiꞌa, la ngingi ngalavusou lexe uleenu ane ne, Anu noxou Lataua manina. 3 ✡1Ioa 2:18Ia ta uleenu ane ipalaꞌalixu lexe Iesu Kalisito ane uxali itema manina uasi, la aneꞌi meꞌa noxou Lataua uasi. Anu uleenu noxou uluau Kalisito e ngingi ngelomusou lexe anu uneneꞌe. Ia vaimomo ꞌo, anu muxali.

4 ✡Mat 12:29; 1Ioa 5:4-5Ngingi ta molomoloxeni e amasaxainge. Ngalomu. Ngingi noxou Lataua e Anu muxolu noxinge ne la sou xavi e mulosinge ne, muaulixu anu ane muxolu no lia ꞌo. La sou ngingi ngetaloxolixaꞌa ta uluau Kalisito mukalu. 5 ✡Ioa 8:47; 15:19Aneꞌi sou no lia ꞌosi mo mii maꞌia ane aneꞌi ilemolu ne, sou no lia ꞌosi kalumo. La sou ta mitema no lia ꞌo, ilomuxaꞌa. 6 Ia nenge noxou Lataua mo ꞌei ane mulavusou Lataua, la anu ulomu noxinge, ia ꞌei ane noxou Lataua uasi, la anu ulomu noxinge uasi. No anu ꞌilixo ane nesi, la sou nenge tatongonu uleenu ane manina xe ane sou kalavoi.

7-8 Ta menexilo e amasaxainge, ngalomu. Nenge telavusou lexe ꞌilixo sou tamasaxaiꞌa ta mitema ne molu noxou Latauasi. La sou ꞌei ane umasaxaiꞌa ta menexu, la anu Lataua ꞌolu mo mulavusou Lataua. Ia ꞌei ane umasaxaiꞌa ta menexu uasi, la anu Lataua ꞌolu mo ulavusou Lataua uasi. Io, nenge telavusou Lataua mo telavusou lexe anu itema sou umasaxaiꞌa ta mitema, la sou laixe lexe nenge kalumo tamasaxainge ngatongatoꞌo. 9 ✡Ioa 3:16Lataua mupalusou ꞌOlu anu vilesisi muluꞌe no lia ꞌo, sou mulosinge, la sou nenge temauli. No anu soli noxou ꞌOlu Iesu, la Anu mumaxaꞌu tanutanuxu singe. 10 ✡Rom 5:8-10; 1Ioa 2:2Nenge tanengexu Lataua tei uasi, ia Anusi tanunenge la sou mupalusou ꞌOlu Iesu muluꞌe sou mulosou maulixu singe sou munoꞌinge mulivulivunenge no anu ꞌiliꞌilixo masumasua noxinge. Anu mulosou maulixu singe sou uxolixolinu Lataua no anu laꞌia noxou. Mii ane Lataua muꞌoxonu singe ne, Anu ꞌilixo manina sou umasaxaiꞌa ta mitema. 11 Ta menexilo e amasaxainge, ngalomu. Lataua mumasaxainge misevile, la sou eni avikalangengi pekiaꞌu lexe nenge kalumo tamasaxainge ngatongatoꞌo. 12 ✡Ioa 1:18Io, itema vile umaisou Lataua iou uasi tatei mo muneꞌe muxali vaimomo ꞌo. Ia lexe nenge tamasaxainge ngatongatoꞌo, la Lataua uxolu noxinge mo ꞌilixo noxou Lataua sou umasaxaiꞌa ta mitema umauli noxinge no anu maulingenge.

13 ✡2Ko 1:22; 1Ioa 3:24Lataua mulosinge Uleenu, la sou nenge telavusou lexe nenge texolu noxou xe Anu muxolu noxinge. 14 La sou nenge temaisou lexe Maminge Lataua mupalusou ꞌOlu muluꞌe no lia ꞌo sou upamaulineꞌi ta mitema. La nenge taaꞌaꞌaloiꞌa ta mitema no anu. 15 Lexe ꞌei ane upalaꞌalixu lexe Iesu anu Lataua ꞌOlu, la Lataua uxolu noxou xe anu uxolu noxou Lataua. 16 La sou nenge telavusou lexe Lataua umasaxainge mo tamuxamuxaxu tanenge no anu.

Lataua anu itema sou umasaxaiꞌa ta mitema. La sou ꞌei ane utetelisou ꞌilixo ane ne, la anu uxolu noxou Lataua xe Lataua uxolu noxou. 17 Nenge taxolu noxou Lataua xe Lataua uxolu noxinge, la ꞌilixo sou tamasaxaiꞌa ta mitema umauli noxinge no anu maulingenge. La sou nenge taꞌoloꞌolo no voxo sou tatulu no anu vaivaikala uasi. Xo nenge temulinu ꞌilixo sou tamasaxaiꞌa ta mitema loxo Anu muꞌoxonu no lia ꞌo. 18 ꞌEi ane ulavusou umasaxaiꞌa ta menexu, la no voxo sou utulu no anu vaivaikala la anu uꞌume uasi. Xe ꞌilixo sou umasaxaiꞌa ta menexu umauli manina noxou, la anu uꞌume uasisi manina. Ia ꞌei ane anu mulavu lexe umasaxaiꞌa ta menexu uasi, la anu uꞌume xo mulavusou lexe Lataua ulosou navunavu. Anu ane uꞌume, la ꞌilixo sou umasaxaiꞌa ta menexu umauli noxou uasi.

19 Nenge tamasaxainge ngatongatoꞌo xo Lataua mumasaxainge tei. 20 ꞌEi ane uvikala lexe umasaxau Lataua, ia umasaxaiꞌa ta vimovimou uasi, la anu itema sou kalavoi. Mo anu ane umaisiꞌa ta vimovimou, ia umasaxaiꞌa uasi, la anu umomomo sou umasaxau Lataua ane anu umaisou uasi ne, uasi. 21 ✡Mak 12:29-31ꞌEi ane umasaxau Lataua, la eni avikalanu pekiaꞌu lexe anu umasaxaiꞌa ta vimovimou kalumo. Lapuloto ane ne, Lataua mulosinge.