6
1 Ioxe loxo Lataua ta menexu sou taxaxai la nexi talingainge lexe sou nganoꞌu alauna noxou Lataua ia ngapaipalunu vitanisi mamu. 2 ✡ Ais 49:8Xo anu uvivikala no nano no Lavuku Tavuna teinu aloxo ꞌo,
“No anu voxo sou aꞌoxo laixe noxinge,
la eni elomusinge.
Mo no ꞌa voxo sou pamauli la eni esuꞌulingengi.”
Eni avikalangengi, io vaimomo ꞌo ne anu voxo sou alauna noxou Lataua mo vaimomo ꞌo ne anu voxo sou pamauli.
Paulo Muxamulinu Ialuxu Masua
3 Nexi tamulaxu mii vile sou utaluxu voteꞌisiꞌa ta mitema uasi, mo sou ipupuiou xaixaimexi uasi. 4 Ia no anu votevoteꞌi ukalusi ne la nexi taꞌitinexi lexe nexi ta mitema sou xaixai noxou Lataua ne. Mo nexi tetulu pekiaꞌixe xe tetavulenu tuꞌutuꞌumaxu mo tanexi utama piena. 5 ✡ 2Ko 11:23-27Xe aneꞌi ipuapuasixe mo imulanexe no nano no ꞌa taasou navunavu xe ta mitema laiꞌaixe la ilosixe navunavu tatila manina. Mo taxaxai pekiaꞌu xe ꞌolovoxo utotomu ne la taai laixe uasi. Xe tanoꞌu ꞌani laixe uasi. 6 ✡ 1Ti 4:12Mo no anu ꞌilixo malemalenga xe lavulavu laixe mo tataloxolinenge mo ꞌilixo laixe noxiꞌa ta mitema ne no anu Uleenu Tavuna mo no anu ꞌilixo sou tanexixaꞌa ta mitema manina. 7 Vaivaikalamexi ne maninasi mo no anu xavi noxou Lataua, la nexi tanoꞌu ꞌilixo muꞌisalilisi aloxo mii sou ꞌotoꞌoto no anu avoxe tema xe ae. 8 Mo no anu ꞌilixo sou toxo xe ꞌilixo sou pamaela mo ikalapuunexi xe iꞌiti ualasixe, mimii ne anu manina ia mimaisou aloxo nexi ta mitema sou kalavoi. Ia mii vile uasi, nexi tavikala maninasi. 9 ✡ 2Ko 4:10Ta mitema iꞌoxe ilavusixe uasi ia milavusixe, mo lexe tasoisoli ia nexi tamaumaulisio, xe mivexe ia ivexe tasoli uasi. 10 Mo tanexi utama uꞌoki ia utotomu ne taꞌosaꞌosasi xe nexi mexi lavuluti uasi ia taꞌoxoneꞌi tapiena ixali ta mitema sou lavuluti, nexi texolu vitanisi ia nexi tamaisou lexe nexi mexi mimii tavuꞌalo manina.
11 Nexi tevikala lamana mulai noxinge ta Kolinito, mo tanexi muxavutalangengi. 12 Nexi ne a taꞌapisou tanexi noxinge ne uasi, ia ngingisi ane ngaꞌapiꞌapisou tangengi noxixe ne. 13 ✡ 1Ko 4:14Ia eni avikalangengi loxo ngingi eni ta ꞌalixeni, ngingi kalumo ne tangengi uxavutalanexi.
Mamu Sou Ngapita Noxiꞌa ta Mitema Ane Imulaxu Taneꞌi Noxou Iesu Uasi
14 ✡ Ep 5:11Mamu sou ngapita noxiꞌa ta mitema ane imulaxu taneꞌi noxou Iesu uasi. Xo ꞌiliꞌilixo lailaixe xe ꞌiliꞌilixo masumasua ne imomomo sou ipita a loxovaa? Mo loxovaa, maꞌia ane lamana ilou isivoxo ipita ne? 15 Xe Kalisito ilou satani ne isakii vaikala a loxovaa? Mo mii maꞌia ane mumomomo sou itema ane umulaxu tanu noxou Kalisito xe ane umulaxu tanu uasi ne ivelusiꞌa ngatoꞌo? 16 ✡ Liv 26:12; 1Ko 3:16Mo vaikala masaxa maꞌia ane uxolu nonixineꞌi taasou lalotu noxou Lataua xe ta lataua kalakalavoi? Xo nenge ne taasou lalotu noxou Lataua ane uxolu umaumauli. Aloxo Lataua muvikalaneꞌi ta mitema noxou lexe,
“Eni axolu noxiꞌa mo amuamuaꞌi nonixineꞌi,
mo eni ne axali Lataua noxiꞌa,
xe aneꞌi ne ixali ta mitemaxeni.”
17 ✡ Ais 52:11; Pal 18:4“Anu aloxo ne la sou ngalaa ngaxexesiꞌa
mo ngaxolu vaꞌaxu anu Tila mulemolu.
Ngalaisou mii vile nuniꞌu mamu
mo sou eni aꞌosa sou anoꞌinge nganeꞌe.”
18 ✡ 2Sa 7:14; Iel 31:9“La sou eni axali loxo Maminge
xe ngingi ngaxali loxo ta ꞌalixeni ta mulu mo ta sema
Tila xaviinu sou uꞌoxonu mimii ukalusi Anu mulemolu.”