UOLI VOLOXU TAMEISOU ANE PAULO MUKAUKAVU MULAI NOXIꞌA
TA TESALONIKA
Vaikala lamana
Ta mitema no tuala tila ne Tesalonika ne, no mine Paulo ilou Timoti mikaukavu mulai noxiꞌa tei sou lailivuxu Kalisito ne, la aneꞌi xavutalaiꞌa uai laixe uasi. Xo leviani miꞌoxo lexe voxo sou Kalisito ulivu uneꞌe ne, anu muxali. La sou Paulo ilou Timoti mikaukavunu uoli voloxu ta tameisou ꞌo la, sou imomosou xavutalaiꞌa la.
Paulo mulamanalixaꞌa lexe voxo ne uxali uao. Anu muvikala lexe tei sou Kalisito ulivu uneꞌe, la ꞌilixo sou lolomu lailaixe ne usuꞌa, xe ꞌiliꞌilixo masumasua ne utila manina. Mo ta mitema ixolu no laaxu itema vile ualasou lexe “ꞌilixo nuniꞌu manina” sou uulaxuneꞌi. Mo itema ne uvikala masumasua noxou Kalisito.
Paulo muvikalaneꞌi lexe itulu pekiaꞌa no anu muxamuxaxu taneꞌi noxiꞌa mo itavulenu tuꞌutuꞌumaxu. Anu muvikalaneꞌi lexe ixaxai xavineꞌi mo isaxilaꞌa ngatongatoꞌo laixe loxo anu Paulo iloꞌa tavaitamiou iꞌoxoꞌoxonu.
Aꞌalo muai no nano aloxo ꞌo
Vaikala lamana 1
Pateteli noxou Paulo 2
Taliꞌi sou suꞌuli no anu lakilaka 3
1
Eni Paulo, nexi noxiꞌa Sailasi ilou Timoti tekaukavu vaikala ane ꞌo mulai noxinge ngingi ta mitemau Lataua ne Tesalonika e ngingi ngongiꞌa Lataua Maminge mo Tila Iesu Kalisito ngepita vilesisi.
Rom 1:7Nexi talinga lexe alauna mo opo seꞌisisi noxou Lataua Maminge ilou Tila Iesu Kalisito umomomo sou uxolu noxinge.
Vaikala Laixe Musuku Ilou Linga Noxiꞌa Paulo Ena Mulai Noxou Lataua
Ta vivixe, utotomu ne nexi talavusou talemolu laixe musukusi singe ulai noxou Lataua mo anu laixe sou nexi taꞌoxonu aloxo ne. Xo muxamuxaxu tangengi ne, anu muxali pekiaꞌu maninasou mo ꞌilixo sou ngingi vilevilesi tanengingenge ngatongatoꞌo ne, anu muxali laixe. 2Ko 7:4; 1Te 2:19Anu aloxo ne, la sou ane nexi taꞌitinu ualasinge no taiineꞌi ta mitema sou lalolalotu noxou Lataua. Xo ngingi ngetulu pekiaꞌinge mo ngemuxamuxaxu tangengi noxou Lataua, la no anu tuꞌutuꞌumaxu tavuꞌalo xe tovotovo iouiou muxali noxinge ne, ngingi ngetavulenusi.
La mimii latala ane muxali noxinge ne, anu sosovo sou lexe Lataua uiloinge no anu xavutala noxou ane mulapu. Xo tuꞌutuꞌumaxu ilou tovotovo ane ngingi ngetatavule ne, anu muꞌoxongengi sou ngingi ngaxolu no nano no anu saxisaxilaꞌu noxou Lataua. Rom 12:19Lataua anu mulapu, la sou Anu molu ukolinu tuꞌutuꞌumaxu noxiꞌa aneꞌi ane milosinge, 1Te 3:13mo Anu umasaxa lexe uxexeenu tuꞌutuꞌumaxu ane ngingi ngetavule ne, la ulosinge nengeꞌa maꞌila. Anu uꞌoxonu mii ane ne uxali no voxo ane Tila Iesu iloꞌa ta angelo noxou xavineꞌi iꞌumesou opo loxotolo, ia iluꞌe ixali lamana no anu navu lamixu. Ais 66:15No voxo ane ne, la sou aneꞌi ane ilavusou Lataua mo ilomuxu aꞌalo laixe noxou Tila noxinge Iesu uasi ne, Anu ulosiꞌa navunavu. Ais 2:10Ta mitema ane ne, Lataua ulosiꞌa navunavu sou ꞌiliꞌilixo noxiꞌa mo usuꞌaneꞌi avilesi ilai ixolu vaꞌaxu manina noxou Tila mo imaisou xavi laixe noxou la uasi. 10  Kol 3:4No mine Tila Iesu ulivu uneꞌe, la ta mitema noxou Lataua iꞌitinu ualasou mo ta mitema aneꞌi ane mimuxaxu taneꞌi noxou iꞌosasou misevile. Mo ngingi kalumo ngaꞌoxonu aloxo ne, xo ngingi ngemuxaxu tangengi no anu aꞌalo laixe noxou Iesu e nexi teaꞌaloxu noxinge.
11  Kol 1:9; 1Te 1:2-3Xe nexi texavutalanu mii ane ne mo ꞌava noxou Lataua noxinge la sou utotomu ne nexi talinga lexe Lataua noxinge usuꞌulingengi sou ngingi namulinu ꞌiliꞌilixo ane umomomo no iou. Mo nexi talinga lexe no anu xavi noxou ne, la Anu usuꞌulingengi no anu voteꞌi mulapu mo ngaꞌoxonu ꞌiliꞌilixo laixe mo xaixai tavuꞌalo e ngingi ngemuxaxu tangengi noxou Iesu sou lexe ngaꞌoxonu. 12 La sou no mine ngingi ngaꞌoxonu aloxo ne, la nexi talinga sou lexe ngingisi ane ngaꞌitinu ualasou Tila noxinge Iesu xe Anu uꞌitinu ualasinge kalumo no anu alauna noxou Lataua noxinge xe Tila Iesu Kalisito.

1:2: Rom 1:7

1:4: 2Ko 7:4; 1Te 2:19

1:6: Rom 12:19

1:7: 1Te 3:13

1:8: Ais 66:15

1:9: Ais 2:10

1:10: Kol 3:4

1:11: Kol 1:9; 1Te 1:2-3