Tavaꞌu
Vaikala lamana
Lavuku ane ꞌo muaꞌaloxu mimii latala e Lataua mukoinu mukalusi. Anu musokou la muaꞌaloxu aꞌalosou lialia ilou loxotolo mo muaꞌaloxaꞌa ta mitema misoko sou mipaa no lia ꞌo a loxovaa, mo muaꞌaloxu tavaꞌu susu ilou tuꞌutuꞌumaxu xe navunavu e muxali no lia ꞌo. Mo muaꞌaloxu voteꞌi maꞌia Lataua molu muꞌoxonusinge nenge ta mitema iouiou no lialia ꞌo mukalusi.
No nano no anu lavuku ꞌo, mikalipalanu la muxali laꞌoluxu ta tamei.
(1) No anu mautunu 1-11 la, aꞌalosou lialia ilou loxotolo xe aꞌalosou mimii latala muxali no lialia ꞌo tatei no mine ta mitema mixali no lialia ꞌo. Mo aꞌalosiꞌa Adamu ilee Iva iloꞌa ta ꞌiliꞌa Kaini ilou Aveli mo aꞌalosou Noa ilou alipaa toxoxaꞌa muxali no lialia ꞌo, xe aꞌalosou tani veveeni mulai teitexi ne Vaviloni.
(2) Ta tameisou musoko no anu mautunu 12-50 la, aꞌalosou ta mutu ovuxaꞌa ta Isilaeli. Musoko noxou Avalaamu anu itema sou utaloxolixu sou umulinu masaxa noxou Lataua xe mumuxaxu tanu noxou Lataua maninasou. Anu mulosienge ta mitema sou tamuxaxu tanenge maninasou. Mo mulosienge ta mitema sou tamuxaxu tanenge maninasou. Mo aꞌalosou Aisaki ilou ꞌolu Iakovo iloꞌa ta ꞌolu mavulovexa muluꞌe lia tamei e mixalixu mata noxiꞌa ta Isilaeli. Mo aꞌalosou Iosepu kalumo no mine muxolu ne Aixiputo xe aꞌalosiꞌa ta Isilaeli no mine mixolu ne Aixiputo. Lavuku ane ꞌo muaꞌaloxu aꞌalosiꞌa ta mitema tavuꞌalo, ia mii mutila manina ane aꞌalosou mimii tavuꞌalo Lataua mukoinu. Tei manina la Lataua mukoinu mimii mukalusi xe iliꞌi no mine ta mitema misokou sou miꞌoxonu ꞌiliꞌilixo masumasua, la Lataua mukalusiꞌa no anu alipaa toxoxaꞌa, ia Noa ilee semau xe ta ꞌolu aneꞌisisi mimauli. Xe iliꞌi la Lataua musosovosou Avalaamu la musakiinu vaikala noxou lexe uꞌoxonu laixe noxou xe noxiꞌa ta xaixasou xe ta ꞌiluꞌilusunu iliꞌi.
Aꞌalo muai no nano aloxo ꞌo
Lataua mukoinu mimii latala mukalusi xe ta mitema 1:1–2:25
Susu ilou tuꞌutuꞌumaxu musoko 3:1-24
Nana musoko noxou Adamu mulai muxali noxou Noa 4:1–5:32
Aꞌalosou Noa xe alipaa toxoxaꞌa 6:1–10:32
Tani veveeni ne Vaviloni 11:1-9
Nana musoko noxou Semu mulai muxali noxou Avalaamu 11:10-32
Ta Isilaeli ta ꞌiluꞌilusuneꞌi: Avalaamu, Aisaki xe Iakovo 12:1–35:29
Nanasiꞌa Esau ta xaixasou 36:1-43
Iosepu iloꞌa ta vimovimou 37:1–45:28
Aꞌalosiꞌa ta Isilaeli no mine mixolu ne Aixiputo 46:1–50:26
1
Lataua Mukoinu Mimii Latala Mukalusi
Tatei manina no voxo ane Lataua musokou sou mukoinu mimii latala loxo loxotolo ilou lia ꞌo, la lia ꞌo ne, loxo tamaisou vaimomo ꞌo uasi. Muxolu muxovulaulau vitanisi mo xalusousi. Isivoxo musuꞌasou lexa toxoxaꞌa ia Lataua Uleenusi muxixaoxao no loxou lexa ne. 2Ko 4:6Ioxe, Lataua muavuti la muvikala aloxo ꞌo, “Lamana upaa!”, la lamana muxali. Anu mumaisou la muxali laixe misevile. Xe muavuti la mukalipalaꞌaneꞌi lamana ilou isivoxo. Lamana mumoxoꞌu lexe “Aso” xe isivoxo lexe “ꞌOlovoxo”. ꞌOlovoxo xe kakau la anu voxo vile a mukalu ne.
2Pi 3:5Xe iliꞌi la, la Lataua muvikala aloxo ꞌo, “Vimelu vile upaa no lexa lixinu mo ukalipalaꞌanu lexa ulai no xalee tamei.” La anu vimelu ane ne, muxali vitanisi. Lataua muꞌoxonu vimelu ane ne sou utaluxu lexa teitexi xe lexa no lia. Anu mumoxoꞌu vimelu ne lexe, “Loxotolo”. ꞌOlovoxo xe kakau la anu voxo tamei a mukalu ne.
Xe iliꞌi, la Lataua muvikala aloxo ꞌo, “Lexa no laaxu loxotolo ulai upita no xalee vile mo sou tani ꞌesiꞌesi upaa.” La anu tani ꞌesiꞌesi mupaa muxali vitanisi. 10 Tani ꞌesiꞌesi ne, anu Lataua mumoxoꞌu lexe “Lia” xe lexa ane mulai mutavo no xalee vile ꞌole ne, mumoxoꞌu lexe “Luaki”. Xe Lataua mumaisou la muxali laixe. 11 Xe Lataua muavuti, la muvikala aloxo ꞌo la, “Lia uxalixu iaꞌeiaꞌe ilou kamakala xe ovuovu iouiou ane uneneꞌa la uxalixu ngiangiaxu xe tematemanu.” La mimii ane ne, lia muxalixu mukalusi. 12 Xe anu mumaisou la muxali laixe. 13 ꞌOlovoxo xe kakau la anu voxo tatalu a mukalu ne.
14 Xe iliꞌi la, la Lataua muvikala aloxo ꞌo, “Ta mimii sou ikaakaa ipaa teitexi no loxotolo sou ikalipalaꞌa aso ilou ꞌolovoxo xe sou ivikalanengexu voxo iouiou mo voxovoxo mo tauutauu ie. 15 Ta mimii ane ne ipaa no loxotolo sou ikaa uluꞌe no lia.” La ta mimii ane ne aneꞌi mixali. 16 Lataua muxalixaꞌa ta mii tamei sou iiei. Vile uiei no aso xe vile sou uiei no ꞌolovoxo. Anu muxalixaꞌa ta oto kalumo. 17 Anu mumulaxaꞌa ta mii ane ne teitexi no loxotolo sou ikaa uluꞌe no lia 18 xe sou isaxilaꞌa aso ilou ꞌolovoxo xe sou ikalipalaꞌaneꞌi lamana ilou isivoxo. Xe Lataua mumaisiꞌa la mixali laixe. 19 ꞌOlovoxo xe kakau la anu voxo tamiꞌa a mukalu ne.
20 Xe iliꞌi la, la Lataua muvikala aloxo ꞌo, la “Ta mimii iouiou ane sou lexa tanu no nano, ipaa no lexa sou imauli ukalusi mo ta ngiala iouiou ixali sou ivavava teitexi.” 21 La sou Lataua mukoineꞌi ta mimii ta toxotoxoxaꞌa sou luaki xe mukoineꞌi ta mimii seꞌi la ane mauli uxolu noxiꞌa kalumo sou lexa. Mo ta ngiala iouiou. Xe mumaisiꞌa la mixali laixe. 22 Xe anu Lataua muavuti la mualusiꞌa ta mimii ane ne la muvikala aloxo ꞌo, “Ta mimii iouiou ꞌo ipaa tavuꞌalo sou iꞌanaꞌana no luaki. Mo ta ngiangiala ipaa tavuꞌalo kalumo.” 23 ꞌOlovoxo mulai mukalu xe kakau la anu voxo taꞌuve a mukalu ne.
24 Xe iliꞌi la, la Lataua muvikala aloxo ꞌo, “Ta mimii iouiou ane mauli uxoo noxiꞌa ipaa no lia ꞌo. Aneꞌi ane ta temene mo aneꞌi ane ta vova ta tatila mo ta kitukituꞌa mo aneꞌi ane ixalaxala.” La aneꞌi ta mimii ane ne mixali. 25 Xe mumaisiꞌa la mixali laixe.
26  1Ko 11:7Xe iliꞌi, la Lataua muvikala aloxo ꞌo la, “Ioxe, nenge takoineꞌi ta mitema mo ixali loxo nenge. Tamuxaxaꞌa sou isaxilaꞌa ta sinana iloꞌa ta ngiala mo ta mimii iouiou latala ane ta temene mo ta vova mo ta mimii iouiou ane ixaxalaxala no lia.” 27  Mat 19:4; Mak 10:6 Tav 5:1-2Mukoineꞌi la mixali loxo anu, Lataua. Mukoineꞌi ta mulu xe ta sema aloxo anu nesi. 28 Lataua mualusiꞌa la muvikala aloxo ꞌo, “Ngapalaaneꞌi ta ꞌilinge tavuꞌalo mo iꞌanaꞌana no xalexalee lia mo ngasaxisaxilaꞌa ta sinana iloꞌa ta ngiala mo ta mimii iouiou ane imauli no lia ꞌo.” 29 Xe Lataua muavuti la muvikala aloxo ꞌo la, “Eni aitingenge kamakamakala iouiou mo ovuovu iouiou ane uneneꞌa la ngiangiaxu xe tematemanu ne lexe ngingi laꞌilalingenge ane. 30 Mo eni aitixaꞌa ta mimii iouiou ane imauli no voxosila iloꞌa aneꞌi ane ixaxalaxala no lia mo ta ngiala iaꞌeiaꞌe iouiou mo ovuovu iouiou volovoloxu mo seseseenu.” La ta mimii ane ne mixali aloxo Lataua muvikala ne. 31 Lataua mumaisiꞌa ta mimii ane anu molusi mukoineꞌi la mixali laixe. ꞌOlovoxo mulai mukalu xe kakau la voxo muxatele vile a mukalu ne.

1:3: 2Ko 4:6

1:6: 2Pi 3:5

1:26: 1Ko 11:7

1:27: Mat 19:4; Mak 10:6

1:27: Tav 5:1-2