Ka An-anayan no Sulat ni
Pedro
Tongod to Soini no An-anayan no Sulat ni Pedro
Si Pedro no suguanon ni Hisus ka nigsulat to soini. To kai pad si Hisus to tano, layun nigdumaruma si Pedro kandin. Woy sikandin dod ka nigwaro-waro ki Hisus nokani su nahallok to mgo otow. Di nigsonditan din ka nighimu rin woy nigpasaylu on ni Hisus sikandin. No to allow no niglonaan sikandin to Gimukud to Magboboot, niglangub sikandin no ognangnangonan ka mohon-ing no otow tongod ki Hisus. Woy sikandin dod ka nig-alap to sikan no Maroyow no Nangnangonon dio to mgo otow no kono no Hudiu.
Nigsulatan ni Pedro ka mgo otow no nan-ugpo to mgo lunsud to sikan no Malintok no Asia. No ian to nigsulatan din su oyow og-os-osonan din su dakol ka mgo igkabaybayari ran no nigligkat to mgo otow no waro nigtuu ki Hisu Kristu. Sikan ian to imparoromdom ni Pedro ka pog-aguanta ni Hisus to kandin no igkabaybayari woy ka pogkouyag ni Hisus ligkat to kamatayon din. Woy innangon ni Pedro to og-awoson dan no ogpaagad-agad to mgo otow no duon katondanan kandan.
Ka Ignangon to Soini no Sulat
Ka kabinunsuran to ignangonnangon ni Pedro 1:1-2
Ka pogpangabang to Magboboot kanta 1:3-12
Ka batasan no litos no ogkounug ta su nangabangan ki to Magboboot 1:13 – 2:3
Ka igkabogoy kanta su ligkat to pogdani ta ki Kristu 1:13 – 2:3
Ka pogpaagad-agad ta to mgo otow no duon katondanan kanta 2:11 – 3:7
Ka litos no oghimuon ta ko ogkoumaan ki to mgo igkabaybayari 3:8 – 4:19
Ka in-udling ni Pedro to mgo pogbuyagon woy to mgo nigtuu 5:1-11
Ka impanuguntugun ni Pedro 5:12-14
1
1 Ka soini no sulat, ligkat kanak no si Pedro no suguanon ni Hisu Kristu.
Ogsulatan ku sikaniu no naabin to Magboboot no nokogsuwoy on dio to duma no mgo ugpaan. Dio kow makarolog to mgo ugpaan to Puntu, Galasia, Kapadusia, Asia woy to Bitinia. 2 Tahan kow on no naabin to Amoy tanow no ka Magboboot su sikan ka tuud din dongan to oghimuon kow rin no maroyow dio to tangkaan din no ogligkat to oghimuon to Gimukud to Magboboot. Ian su oyow ogkohimu no ogpaagad-agad kow on ki Hisu Kristu woy ogkapasayluan on ka mgo salo now ligkat to nigpamilikpilikan kow on to langosa rin to namatoy on tongod kanta.
Ogbuyu a to oyow ungod kow ogkohoy-uan woy ogkabogayan to maawang no goinawa no ligkat to Magboboot.
Ka Im-imanan ta no Kouyagan ta
3 Ogpasalamatan ta ka Magboboot no ian Magboboot woy Amoy to Lagboy no Igbuyag tanow no si Hisu Kristu. Ian su dakol ka pogkohoy-u rin kanta. No ligkat to pog-uyag din ki Hisu Kristu, nigbogayan kinow to iam no pogkouyag ta. Sikan ian to og-iman-imanan tad on ian to ogkouyag kinow on uromo. 4 Woy og-iman-iman ki to ogkabogayan ki to mgo karoyawon no kono ogkamolu, woy kono ogkaligsoman, woy kono ogkaawo no dio isabuk to Magboboot to langit no igtagad kanta 5 no nohogot to pogtuu. No ian ighogot to pogtuu ta ka kabogbogan to Magboboot su ogsalig ki kandin tagood to ogpokouma on ka sikan no mohuri no allow no ogkouyag kinow on to waro katamanan.
6 Sikan ian, agad ko duon pad igkabaybayari ta no ogligkat to loinloin no mgo kohirapan, ogkarago ki ro duon. 7 Ian su ka pogtuu ta ki Hisu Kristu, ogkounawa to bulawan no ogkoologan to hapuy oyow ogkatagaan ko tu-tuu ian. Di ka pogtuu ta, mamahal pad to bulawan su ogkaraat doka bulawan. Di ian to og-awoson to duon igkabaybayari no ogkaaguanta ta, su sikan ian ka igmalogot ko tu-tuu ian ka pogtuu ta. No ko tu-tuu ian ka pogtuu now, ogsayoon kow woy ogtimulan din ka ngaran now uromo no oglibong si Hisu Kristu no igpakita on sikandin. 8 Agad to waro kow makakita ki Hisus, di dakol ka goinawa now kandin. No agad kono kow pad kuntoon ogpakakita kandin, nigtuu kow rod kandin. Sikan ian no ogkarago kow to dakol lagboy no igkarago no kono ogkalituk. 9 Ian su kuntoon, ogkapurut now on ka igkapangabang to mgo salo now su ogligkat to pogtuu now ki Hisus. 10 No ka dongan no mgo talagnangon to kagi to Magboboot, nig-ay-ayaran dan namangho oyow ogkatagaan dan poron ko ogmonuon to Magboboot uromo ka pogpangabang kanta to mgo salo ta. Woy impanoy ran inangon ka soini no pogkohoy-u to Magboboot kanta. 11 Ka Gimukud to Magboboot no nigligkat ki Kristu, nig-ugpo to goinawa to sikan no mgo talagnangon dongan woy impohitaga rin kandan to duon uromo igkabaybayari ni Kristu. No ko ogkapongaan on ka igkabaybayari rin, ogbogayan sikandin to dakol no ngaran. Nig-ol-olog ka sikan no mgo talagnangon oyow ogkabatukan dan poron ko kon-u ogkatuman ka sikan no impanoy ran inangon woy ko songo monu ka karoyawon no igkasayo kandin uromo. 12 Di nigpohitagaan to Magboboot ka mgo talagnangon to kagi rin to kono no sikandan ka ogkabuligan to sikan no innangon dan dongan, di sikanta kuntoon ka ogkabuligan. No ka sikan no impanoy ran inangon, songo ingkanangon on kuntoon su duon mgo otow no nigsugu to Magboboot oyow ogkanangonan kow to soini no Maroyow no Nangnangonon tongod ki Hisu Kristu. No ka Gimukud to Magboboot no nigligkat to Langit ka nigpohitaga kandan ko nokoy ka igkanangonnangon dan. No ka mgo diwata to Magboboot, songo ogkoiniat no ogpakasabut poron sikandan to sikan no ignangonnangon dan.
13 No su tu-tuu ian ka sikan, og-awoson to og-ayad-ayad kinow no ogdoromdom to tibo no oghimuon ta oyow litos to Lagboy no Igbuyag ta. Ogpataliwaro on to goinawa ta ka im-imanan ta no mgo karoyawon no igkabogoy kanta uromo to ogkakitaan on si Hisu Kristu no oglibong kai to tano. 14 Nò, su nohimu kinow on no mgo anak to Magboboot, og-awoson to ogpaagad-agad kinow to innangon din. No kono kid on ogtuman to mgo maroot no koiniatan ta no nigpaagad-agaran ta nokani to waro ki pad mataga to tu-tuu ian no nangnangonon tongod ki Hisu Kristu.
15 Di og-awoson to waro maroot no ogpakaamut to batasan ta unawa to songo waro solug no maroot dio to batasan to Magboboot no nig-abin kanta. 16 Ian su duon ingkasulat dongan no kinagian to Magboboot to,
“Og-awoson to waro maroot no ogpakaamut to kaniu no batasan su waro maroot dio to kanak no batasan.”*Levitico 11:44 woy 19:2.
17 Nò, su ogtokoron ta no Amoy ta ka Magboboot no ogsampiton ta, og-awoson to lagboy tad ogtahuron sikandin to kai kinow pad og-ugpo to tano. Ian su ogbobootan din ka tibo no mgo otow kai to tano no waro og-umalagon din ko nokoy ka mgo batasan to tag sagboka kandan. 18 Nataga ki to mahal lagboy ka imbalukas din kanta. No ian inloko kanta to pogboot to mgo batasan no waro pulus no ingkagalat to mgo kaap-apuan ta. Di ka imbalukas din kanta, waro mounawa to salapi woy ko bulawan no ogkaawaan on to pulus. 19 Di ka langosa ni Hisu Kristu no nigtulalug to pogkamatoy din, mahal lagboy no ian imbalukas to Magboboot kanta. No ian din nounawaan ka nati to karniru no waro maroot to lawa rin no igtubad to Magboboot. 20 Nò, to waro pad nohimu ka soini no kalibutan, tahan do no nig-alam to Magboboot si Kristu no ogpapangabang kanta. Di kuntoon to tipouri, impayag din on sikandin kai to kanta oyow ogkapangabangan kinow on to mgo salo ta. 21 No ligkat kandin, nigtuu kinow on to Magboboot no nig-uyag kandin. Woy nigbogayan to Magboboot sikandin to dakol lagboy no ngaran. Sikan ian to ogsaligan ta ka Magboboot woy og-im-imanan ta ka karoyawon no igbogoy rin kanta uromo. 22 No ligkat to nigpaagad-agad kow on to soini no tu-tuu no nangnangonon tongod ki Hisu Kristu, nigmaawang on ka goinawa now su naawo on ka maroot no mgo batasan now. Woy kuntoon, duon on ka tu-tuu ian no dakol no goinawa now to mgo duma now no songo ogtuu. No og-awoson to waro maroot no ogpakasolug to sikan no igparakdakoli now kandan to goinawa. 23 Ian su nigbogayan kinow on to Magboboot to iam no pogkouyag no waro nigligkat to otow no ogkamatoy. Di nigligkat atag to Magboboot no kono ogkamatoy. No ka kinagian din no kono ogkaawo, ian ingkabogoy to sikan no kouyagan ta no waro katamanan. 24 Ian su duon ingkasulat no kagi to Magboboot to,
“Ka mgo otow kai to kalibutan, malopot doka pogkootow ran. No ian dan ogkounawaan ka mgo hilamonon. No ka igkaroyow ran, ogkounawa to mgo bulak to hilamonon no magaan on ogkalanos no ogkapadpad on ka bulak dan.
25 Di ka kagi to Magboboot, kono ogkaawo taman to waro katamanan.ӠOgkabasa to Isaias 40:6.
No ka sikan no kagi to Magboboot, ian ka ingkaanad kaniu.