1 Soini ka an-anayan no igbuyu ku koykow. Ampui now ka tibo no mgo otow. Buyu kow to Magboboot oyow igbogoy rin ka og-awoson dan woy sayaa now sikandin tongod to pogkohoy-u rin kandan. 2 Woy ampui now ka mgo labow no igbuyag woy ka agad hontow no ogpakaalap to dakol no katondanan oyow maroyow ka pog-ugpo ta no waro samuk, woy to oyow waro ogpakaatang kanta to ogtuman ta to ogkoiniatan to Magboboot woy to oyow maroyow so mgo batasan ta to tibo no otow. 3 Ka sikan no pog-ampu ta, maroyow woy ogpakabogoy to igkarago to Magboboot no ian talagpangabang kanta. 4 Ogkoiniatan din to ogkapangabangan din ka tibo no mgo otow to salo, woy to oyow ogkataga sikandan to tu-tuu ian no tinuuan. 5 Ian su sagboka ro ka Magboboot woy songo sagboka ro ka talaghusoy no si Hisu Kristu no ian tigpataliwaro to Magboboot woy to mgo otow, 6 no sikandin ka nigpakimatoy no igbalukas to mgo salo to tibo no mgo otow. No ligkat to sikan no nohimu to litos no allow, impamalogot din to ogkoiniatan din to ogkapangabangan ka tibo no mgo otow to mgo salo dan. 7 Sikan ian to naabin a to Magboboot to oyow ogkohimu a rin on no suguanon ni Hisu Kristu woy to oyow ogkohimu a rin no talag-anad to mgo otow no kono no Hudiu. Ian su oyow og-anad a kandan to tu-tuu ian no nangnangonon oyow duon pogtuu ran to tu-tuu ian no tinuuan. Tu-tuu ian ka kagi ku; kono no ubat.

8 Sikan ian, tongod to mgo lukos no ogtuu no dio to agad hondoi no ugpaan, ogkoiniatan ku to og-ampu sikandan. Di woy og-ampu, og-awoson to maawang ka goinawa ran to Magboboot*Songo litos no igkabadbad to “og-awoson no maawang ka goinawa ran ko igkayow ran ka bolad dan to og-ampu,” su songo batasan dan to igkayow ran ka bolad dan ko og-ampu. woy og-awoson dod to waro igkabolu dan woy songo waro igpaap-apuloy ran to agad hontow. 9 No ka mgo boi no nigtuu, ogkoiniatan ku to oglitoslitos ka pog-ilis dan to lawa ran oyow waro igkasipod ta ko nokoy ka ilisan dan. Og-awoson to kono dan ogpasublaan ka igmaroyow to bulbul dan woy ko sabinit dan unawa ko oghimasaran dan ka bulbul dan to bulawan, woy ko mahal no baliog, woy og-awoson dan to kono dan ig-ilis ka lagboy no mahal no manggad. 10 Di og-awoson to ian igkasayo kandan ka maroyow no oghimuon dan. Sikan ka litos to mgo otow no ognangon to ogsimboon dan ka Magboboot. 11 Woy og-awoson to og-ay-ayaran to mgo boi ka pogpamminog dan to ig-anad kandan no kono ogkagikagi sikandan, woy og-awoson to duon goinawa ran to ogpaagad-agad to ig-anad kandan. 12 Kono a ogbogoy ko boi ka og-anad to mgo lukos dio to ampuanan woy ko ogpaampow ka boi to katondanan to mgo lukos. Di og-awoson to ogpamminog do sikandan to ig-anad kandan. 13 Ian su si Adan ka pighun-a pamulinga to Magboboot woy rin atag si Eba,†Ogkabasa to Genesis 2:7 woy 21. 14 woy su kono no si Adan ka nagawayan ni Satanas, di si Iba ka nagawayan. No ligkat to sikan, niglop-ang on to boi ka insapad kandan. 15 Dokad di, ko kono og-ongkoran to mgo boi ka pogtuu ran woy ko dakol ka goinawa ran to duma ran no ogtuman sikandan to ogkoiniatan to Magboboot no waro ogpakasolug no maroot duon to mgo batasan dan, ogkapangabangan sikandan ligkat to pog-anak dan.‡Songo kuwo ko ian lituk ko ogkapangabangan ka boi ko og-anak, woy ko oglituk to ogkapangabangan sikandan to salo dan su ligkat ki Hisus no in-anak to boi unawa to innangon to Magboboot ki Iba dongan to Genesis 3:15.