1 Ka soini no ignangonnangon ku, kono no igparayandayan to lawa ku. Agad ko ogligkat to songo otow no igpaalap kaniu woy ko ogligkat pa kaniu, kono og-awoson no igpatokod ka katondanan ku ko oghondio a to songo ugpaan. 2 Ian su sikaniu ka igmalogot no sulat noy su ogkounawa to ka katondanan noy, dio insulat to goinawa now. No ka sikan, igpabasa woy igpatokod dio to agad hondoi no otow to litos ka in-anad noy kaniu.*Su bolad do ka pig-ikatan dan dongan to sikan no ingkasulat lagboy ni Pablo, duon ka nagalat no ingkasulat to Ginirigu no ingkalituk to goinawa noy, woy duon duma no ingkalituk to goinawa ran. 3 Ogtokoron ta to si Hisu Kristu ka talagsulat no nigpatuu kaniu ligkat to innangonnangon noy kaniu. Di kono no tinta ka insulat din woy songo kono no batu no manipis ka nigsulatan. Di ka Gimukud to Magboboot ka nigsulat dio to goinawa now.†Ogkabasa to Exodo 24:12, Jeremias 31:33 woy Ezequiel 11:19 woy 36:26.

4 Ian ku ignangon ka sikan su dakol ka pogsalig ku to Magboboot su ligkat ki Hisu Kristu. 5 Di kono ogkohimu ko og-abin koy no sikanami ka nigligkatan to agad nokoy no maroyow no nohimu dio to kaniu. Ian su ka kanokali noy woy ka mgo katagaanan noy, ogligkat atag to Magboboot. 6 Sikandin, ka nigbogoy kanami to katondanan oyow ogpakaanad koy kaniu to sikan no iam no dalan no insabut din kanta. Di ka sikan, kono ogligkat to Balaod no ingkasulat dongan, di ogligkat atag to Gimukud to Magboboot. Ian su ligkat to sikan no Balaod, ian ta poron ogkoumaan ka kamatayon. Di ka Gimukud din atag ka ogbogoy kanta to kouyagan no waro katamanan.

7 Ka sikan no Balaod, nigpanultulisan on dio to manipis no batu. No to pogsulat, nalayagan on to Magboboot ka langlanguwan ni Moisis. Di agad to ogkasalinan on ka sikan no layag, ko diad on si Moisis to tangkaan to mgo otow no ian kaap-apuan ni Israil, kono ogpakapitow ka mgo otow kandin su ogsilangon to sikan no layag. Nò, agad to ligkat to sikan no Balaod, ogkalogparan ki poron to kamatayon no waro katamanan di dakol ka kabogbogan to sikan no Balaod.‡Ogkabasa to Exodo 34:29. 8 Sikan ian to nataga ki to dakoldakol pad ka kabogbogan no ogpakalagkos to sikan no oghimuon to Gimukud to Magboboot. 9 Nò, su duon man kabogbogan to sikan no Balaod no ogpakabogoy kanta to logpad, ogkatagaan ta to dakoldakol lagboy ka kabogbogan to sikan no dalan no ogpokohimu kanta no maroyow dio to tangkaan to Magboboot. 10 Nò, su dakol lagboy ka kabogbogan to soini no iam no dalan, ogkoiling to warad on ka kabogbogan to sikan no nokohun-a no dalan.§To Ginirigu, ka kinagian, doksan, ogkalituk to kalayagi, karoyawon woy ko kabogbogan. No kai to soini no mgo birsikulu, malasi hingarani ka sikan no doksandi loinloin ka ingkalituk ta su nigloinloin ka tuud to sikan no kinagian. 11 Ian su ko duon kabogbogan to sikan no Balaod no magaan ogkasalinan ka karoyawi rin, dakoldakol pad man ka karoyawi to sikan no iam no dalan no kono ogkasalinan ka kabogbogan din.

12 Nò, su sikan ian ka og-im-imanan noy, kono koy ogkasipod to ognangonnangon to kinagian to Magboboot. 13 Sikanami, mgo sulod, waro igholos noy. Kono koy og-iling ki Moisis no nig-atangan din ka langlanguwan din to manggad no manipis su oyow ka mgo pinanganak ni Israil, kono ogpakakita ko ogkaawo ka sikan no layag. 14 Di sikandan no mgo Hudiu, nounawa to naatangan dod ka pogkasabuti ran. Agad kuntoon, ko ogbasoon dan ka tahan no insabut to Magboboot, ogkounawa to naatangan pad ka pogdoromdom dan. Ian su si Hisu Kristu ro ka ogpakaawo to sikan no igkaatang to pogkasabuti ran. 15 Hoo su taman kuntoon, ko ogbasoon ka Balaod no ingkasulat ni Moisis, ogkaatangan dod ka mgo pogdoromdom dan. 16 Dokad di ko duon otow no ogtuu on to Lagboy no Igbuyag ta, ogkaawo on ka sikan no ogpakaatang to doromdom dan.*Ogkabasa to Exodo 34:34. 17 Nò, ko oghingaranan ku ka Lagboy no Igbuyag ta, songo ogkohingaranan ku rod ka Gimukud to Magboboot. No ko ogpaboot ki kandin, nakalibuwas kid on to salo ta no kono kid on ogpouripon to Balaod ni Moisis. 18 Nò, mgo sulod, kanta tibo no nigtuu ki Hisus, warad on ogpakaatang to pogkasabuti ta. No ian tad ogkounawaan ka alung to ispiu su dii to kanta no batasan ogkakitaan ka karoyawon to Lagboy no Igbuyag ta. Ka sikan no karoyawon, ungod ogkatimtimulan taman to lagboy kid on ogpokounug kandin su sikan ka oghimuon to Lagboy no Igbuyag ta no ian Gimukud to Magboboot.