Kasulatan to Magboboot Mgo Hinimuan 7

Ka Innangonnangon no Pogtabak ni Istiban

1 Nò, kagi ka Labow no Talagpanubad ki Istiban to, “Og–inso a koykow ko tu–tuu ian ka sikan no innangon dan?”

2 Kagi ni Istiban, “Mgo amoy woy mgo sulod, pamminog kow to soini no igtabak ku kaniu. Dongan, ka Magboboot no ian ta oghingaranan to malayag, nigpapitow to kaap–apuan ta no si Abraham. No dio pad nig–ugpo sikandin to ugpaan to Misopotamia no waro pad moghalin dio to lunsud to Haran.* 3 Kagi to Magboboot kandin to, ‘Awo kad on to ugpaan nu woy to mgo sulod nu. No halin kad on dio to songo ugpaan no igpapitow ku koykow.’ † 4 Pogkaponga,” kagi ni Istiban, “no nighipanow on si Abraham ligkat to sikan no ugpaan din to Kaldia no nighalin on dio to lunsud to Haran. Pogkalugoy no namatoy on ka amoy ni Abraham, no pighutuk man do pahalina to Magboboot sikandin to pog–ugpo din kai to soini no tano no ogkougpaan now ta kuntoon.‡ 5 Di waro pad mabogayi to Magboboot si Abraham to agad songo dangow no tano. Di nigsabut ka Magboboot kandin to, ‘Uromo, igbogoy ku koykow woy to mgo pinanganak nu ka soini no tano.’ Di waro pad anak ni Abraham no innangon on to Magboboot to sikan.§ 6 Di innangon to Magboboot ki Abraham to uromo, ogkohimu ka mgo pinanganak din no agpot dio to mariu no ugpaan dio to loin no mgo otow. No ogko–uripon pad woy ogkabaybayaran ka mgo pinanganak din taman to hop–at no gatus no tuid. 7 Di kinagian to Magboboot ki Abraham to, ‘Oglogparan ku ka mgo otow no og–uripon to mgo pinanganak nu. Pogkaponga, og–awo ka mgo pinanganak nu woy ogpakalibong on to soini no tano to Kanaan. No ogsimboon a ran kai.’*

8 Pogkaponga,” kagi ni Istiban, “insabut to Magboboot ki Abraham to og–awoson to ipatuli din ka kandin no lawa woy ka lawa to mgo anak din no lukos woy nigsugu to igpatuli on uromo ka mgo pinanganak din. No ko duon on anak ni Abraham, no si Isaak, no ko wawalu ka allow ligkat to poglosut din, pigtuli din on. Pogkalugoy, songo nigtuli ni Isaak ka kandin no anak no si Hakub, woy songo pigtuli ni Hakub ka sampulu woy daruwa no anak din. No ian ka mgo kapunganan ta,” kagi ni Istiban.† 9 “Di ka sikan no mgo anak ni Hakub, nigsilag to hari ran no si Husi woy nigduwad dan on sikandin oyow ogko-uripon dio to Ehipto. Di nigdumaruma ka Magboboot kandin.‡ 10 Nigpangabangan din woy nohoy–uan din si Husi to tibo no ingkabayo din no igkabaybayari. Sikan ka ligkatan to nohoy–uan si Husi to igbuyag to Ehipto no si Paraon woy nigtokod to dakol ka katagaanan ni Husi. Sikan ian to pighimu ni Paraon si Husi no gobirnador. No ian on talagboot to tibo no kalaglagan woy to mgo sakup ni Paraon.§

11 Pogkalugoy,” kagi ni Istiban, “Duon nigdatong no tigbitil dio to Ehipto lagkos to tibo no ugpaan to Kanaan no ian ugpaan ni Hakub. No dakol ka kohirapi to tibo no mgo otow. Ka mgo kaap–apuan ta,” kagi, “waro ogkitoon dan no ogkakoon.* 12 Di ko nakarinog si Hakub to duon koonon dio to Ehipto, impohondio din on ka mgo anak din no ian mgo kaap–apuan ta. Sikan ka an–anayan no poghondio dan to Ehipto. 13 Ka igkaruwa no poghondio dan, nigpatotokoroy si Husi to mgo kakoy rin. Songo impatokod din ki Paraon ka kandin no mgo kakoy.† 14 Woy impaangoy ni Husi ka amoy rin no si Hakub, mgo sulod din. Kapituan woy lalimma sikandan no mgo otow ka nanhondio to Ehipto.‡ 15 Dio namatoy si Hakub. Woy pogkalugoy, songo nammatoy on ka mgo anak din no ian mgo kaap–apuan ta,” kagi ni Istiban.§ 16 No pogkalugoy, nan–alap dan on ka mgo bokog dan dio to kandan no ugpaan to Sikim. No inluglug dan to sabalanan no nigboli ni Abraham dongan to mgo anak ni Hamor.*

17 Pogkalugoy,” kagi ni Istiban, “to ogmarani on ka allow no ogtuman to Magboboot ka impanoy din insabut ki Abraham,† no nigmohon–ing on ka mgo pinanganak ni Hakub no dio to Ehipto. 18 No ka mgo igbuyag dio to Ehipto, nakaliwanliwan on taman to duon on igbuyag no waro mataga ko hontow si Husi. 19 No ka sikan no igbuyag, niggawayan woy nigbayadbayaran ka mgo kaap–apuan ta. Woy pigpogos din sikandan to oyow ogpoongkoran dan ka mgo anak dan dio to tano oyow ogkamatoy.‡

20 Sikan ka nabayaan dan,” kagi ni Istiban, “no nootow on si Moisis. Maroyow ka pogpitow to Magboboot kandin. No taman to tatolu no bulan, nouyamu si Moisis dio to baloy to amoy rin.§ 21 Di ko naang–anggaan on sikandin, nakita on to boi no anak to igbuyag to Ehipto. No pig–uyamu rin on si Moisis no pig–iling din to anak din on ian lagboy.* 22 Naanad on si Moisis to tibo no katouanan to mgo taga Ehipto woy mabantug sikandin su dakol ka katouanan din to mgo hinimuan woy to mgo kinagian.

23 No to kohop–atan on ka tuid ni Moisis, nakaroromdom sikandin to ogpanumbaloy dio to ugpaan to mgo karumaan din no mgo pinanganak ni Israil.† No to pogpanumbaloy ni Moisis dio to kandan, 24 duon nabayaan din no otow no pinanganak ni Israil no nabaybayaran to otow no taga Ehipto. No nigpangabangan ni Moisis ka otow no nabaybayaran woy pighimatayan din on ka taga Ehipto.‡ 25 Nahan ni Moisis ko ogpakasabut buwa ka mgo duma rin no pinanganak ni Israil to nigtuud ka Magboboot to sikandin ka ogpangabang kandan no ogkabaybayaran. Di waro dan masabuti. 26 Pogkapawo, nighondio man do si Moisis to sikan no ugpaan to mgo duma rin, no nakabayo man do to daruwa no otow no nigpoog–ogotoy. Nigpoul–ulioy on porom ni Moisis to sikan no otow no pigkagian din to, ‘Manio to ogpoog-ogotoy kow to sikan do ka apu now?’ 27 Di ka sagboka no otow no nig-ogot to duma rin, pigkois din si Moisis to kagi rin to, ‘Manio to sikoykow ka ogboboot kanami? Bak ko sikoykow ka talaghusay noy. 28 Koiniat ka buwa ko songo oghimatayan a nu unawa to pighimatayan nu ka taga Ehipto gabii,’ kagi to otow,” kagi ni Istiban.

29 “Pogdinog ni Moisis to sikan no kagi, nakapallaguy on no dio mokougpo to mariu no ugpaan to Midian. Dio nangasawa si Moisis. No pogkalugoy, daruwa on ka anak din no lukos.”§

30 Nigligad on ka kohop–atan no tuid. No songo allow, dio si Moisis to songo bubungan no oghingaranan dan to Sinai no dio to holholawan. No duon suguanon to Magboboot,* no nigligkat to Langit no nigpakita ki Moisis dio to malopot no kayu no nalogdog. 31 Pogpitow ni Moisis to sikan, nabolongbolong. Di kagi to Lagboy no Igbuyag to, 32 ‘Sikanak ka Magboboot to mgo kaap–apuan nu, no ian dod ka Magboboot ni Abraham, woy ki Isaak, woy ki Hakub.’ Nigkolkol si Moisis su nahallok no waro niglangob no ogpitow. 33 No kagi to Lagboy no Igbuyag ki Moisis to, ‘Awaa nu ka sapatus nu no itahud kanak su duon a kai to longod nu. 34 Nigkita ku ka igkabaybayari to mgo sakup ku no mgo pinanganak ni Israil no dio ogpokougpo to Ehipto. Woy pigdinog ku to ogpakapannanoy sikandan. Sikan ian to niglogsad kuntoon su ogpangabangan ku sikandan. Nò, kai kad su ogsuguon ku sikoykow dio to Ehipto,’ kinagian to Magboboot.”†

35 Kagi ni Istiban to, “Si Moisis ka pigkois to mgo pinanganak ni Israil no nigkagi ran kandin to, ‘Manio to sikoykow ka ogboboot kanami? Bak ko sikoykow ka talaghusoy noy.’ Di pogkalugoy, si Moisis ka pigsugu to Magboboot dio to Ehipto oyow sikandin on ka ogpangabang kandan no ogkohirapan, woy oyow sikandin ka ogkohimu no igbuyag dan. No ka sikan no suguanon to Magboboot no nigpakita ki Moisis duon to sikan no malopot no kayu, ian ka impatuman to Magboboot to sikan no innangon din.‡ 36 Pighinggat ni Moisis ka mgo pinanganak ni Hakub to og-awo sikandan duon to Ehipto. Woy duon mgo kabolongbolonganan woy ka igmalogot to innangon to Magboboot no nohimu rin dio to Ehipto woy dio to sikan no Dagat no Malalab woy dio to nabayaan dan no holholawan to sikan no kohop–atan no tuid.§

37 Si Moisis dod ka nignangon to mgo pinanganak ni Israil to, ‘Duon uromo talagnangon to kagi to Magboboot no igpohondio din no ogkounawa kanak no igbogoy rin dio to kaniu.’* 38 Nò, si Moisis ka nigduma to mgo otow no nalimudlimud no ogmanhihipanow to sikan no holholawan. No ka sikan no suguanon to Magboboot no niglibuwas woy nig–al–alukuy ki Moisis dio to Bubungan to Sinai, ungod nigdumaruma kandin woy to mgo kaap–apuan ta. Woy nabogayan si Moisis to sikan no kinagian to Magboboot no ogpokouyag woy kono ogkahalin oyow songo igkabogoy rin kanta no mgo Hudiu,” kagi ni Istiban.†

39 “Di ka mgo kaap–apuan ta, nigkois ki Moisis. Waro man mogpaagad–agad kandin. No ka goinawa ran, dio dod to Ehipto su ogkoiniat sikandan no oglibong. 40 No to dio pad si Moisis to bubungan to Sinai, pigkagian dan si Aaron to, ‘Himui koy to mgo magboboot noy no ogdumoon noy su waro noy matagoi ko noomonu on si Moisis no nig-alap kanami no nigligkat to Ehipto.”‡

41 “Sikan ian,” kagi ni Istiban, “Nighimu sikandan to inotow-otow no noiling to nati no baka. Woy nighimatayan dan ka mgo ayam dan no igpanubad dan to sikan no in-otow-otow. Narago ka mgo otow to sikan no pighimu ro to kandan do no bolad. 42 Sikan ian to pig–iniugan on to Magboboot sikandan no pinogbalagad on ko nokoy ka ogtubaran dan no layag dio to langit.” Kagi ni Istiban, “No ka sikan, nounawa rod to sikan no ingkasulat to mgo talagnangon to kagi to Magboboot dongan to,

‘Sikaniu no pinanganak ni Israil, to sikan no kohop–atan no tuid now no nokohihipanow kow dio to holholawan, og–inso a kaniu ko sikanak ka nigtubaran to sikan no mgo ayam no nanhimatayan now?

43 Kono su ig–alap now ka baloybaloy no pigtaguan now to inotow–otow no nighingaranan kow ki Molok no pig–ampuan now ka sikan no pighimu now no ogkoiling to bituon no nighingaranan now ki Ripan. Woy nigkagi ka Magboboot kandan to, ‘Sikan ian to ogdogilon ku sikaniu dio to madmariu to lunsud to Babilunia.’ ”§

44 Kagi ni Istiban, “To dio dod ka mgo kaap–apuan ta to holholawan, songo pig–alap dan ka tagooran no ampuanan dan to tu–tuu ian no Magboboot. Ka sikan, in–ayun lagboy to sikan no innangon woy impapitow to Magboboot ki Moisis.*

45 No ka mgo kaap–apuan ta no nakasoip to sikan no nokohun–a no mgo kaap–apuan ta dongan, nig–alap to sikan no ampuanan ka nanhipanow ran no oghondio to ogkougpaan dan no tano. Ka sikan, si Husui on ka igbuyag dan. Pogsolod nikandan dio to sikan no tano, nakababantoy sikandan to pogdogil to Magboboot to mgo otow no tahan nan–ugpo to sikan no mgo ugpaan dan, woy nanaagow ran on ka mgo tano. No ka sikan no ampuanan dan, dio dod to kandan taman to si Dabid on ka nakaliwan no igbuyag dan.† 46 Nohoy–uan sikandin to Magboboot, no ian dod Magboboot ni Hakub. No nigbuyu si Dabid to Magboboot ko litos no oghimu sikandin to baloy no ogkougpaan to Magboboot.‡ 47 Dokad di, si Solomon on ka nokohimu to sikan no baloy.§ 48 Di ka Magboboot no ian matikang, kono ogkoologan to og-ugpo to baloy no oghimuon do to bolad to mgo otow. Ian su duon ingkasulat dongan to talagnangon to kagi to Magboboot. No nigkagi ka Magboboot to,

49-50 ‘Ka langit, ian ka pinnuuanan ku to pandatuan. No ka tano, ian diokanan ku.

Sikan ian to kono ogkohimu no oghimu kow to baloy no ogkougpaan ku.

Woy waro agad hontow no ogpokohimu kanak

to himolayanan ku,’ kagi to Magboboot.’*

51 “Nò,” kagi ni Istiban, “Makogal on ian ka ulu now. Ogpabobongol kow ko nokoy ka igsugu to Magboboot kaniu. Ogkounawa kow to mgo otow no waro mataga to Magboboot su nasi kow og–atu to Gimukud din. Ka batasan to mgo apu now dongan, sikan dod ian ka og–unawaan now kuntoon.† 52 Waro agad sagboka no talagnangon to kagi to Magboboot dongan no waro baybayari to mgo kaap–apuan now. Woy pighimatayan dan ka mgo talagnangon to kagi rin dongan no impanoy innangon to oghondinid on ka Matuwarong no Suguanon din no si Hisus. Sikan ian ka impanabod woy nigbunu now. 53 Sikaniu ka makapurut to Balaod to Magboboot no impahatod to mgo diwata din, di waro now paag–agari,” kagi ni Istiban.

Ka Nigdogpakan si Istiban to Batu oyow Ogkamatoy

54 Nò, ka mgo pogbuyagon to mgo Hudiu, pogdinog dan to sikan no intabak ni Istiban, nigkakagot ka ngipon dan su lagboy on ian no nabolu kandin. 55 Di si Istiban atag, nigpamootan to Gimukud to Magboboot. No niglonghag si Istiban dio to langit no pigkita rin ka layag to Magboboot woy si Hisus no nigsasindog dio to kawanan to Magboboot. 56 Kagi ni Istiban to, “Pitow kow. Ogkita a to langit no naboklas on. Woy ogkitoon ku ka Otow no oghingaranan ta to Kakoy to mgo Koot–otawan‡ no dio mogsasindog to kawanan to Magboboot.” 57 Pogdinog to mgo otow to kagi ni Istiban, nigngangang on. No pigpanagpong dan ka talinga ran no tibo sikandan nigtinagpo dio ki Istiban. 58 Piggongonan dan woy pigganoy ran sikandin dio to libuwasan to lunsud to Hirusalim, woy pinandogpak dan on sikandin to dakol no batu oyow ogkamatoy. No ka mgo talagmalogot, impanwakdas ka kinabo dan no dio dan isabuk to paa to songo balubato. Ka ngaran din, si Saulo. 59 No to pogdogpak pad ki Istiban to mgo batu, nig–ampu. Kagi rin to, “Hisus no Lagboy no Igbuyag ku, alapa nu ka gimukud ku dio to koykow.” 60 No nigluhud on si Istiban woy nigpaagbot to nigkagi to, “Buyag ku no dio to langit, kono nu baybayari ka soini no mgo otow tongod to soini no salo dan.” Pogkaponga to kagi rin, namatoy on.

*7:2 Ka Misopotamia, songo ogkohingaranan to Kaldia.

†7:3 Ogkabasa to Genesis 12:1.

‡7:4 Ogkabasa to Genesis 11:31 woy 12:4.

§7:5 Ogkabasa to Genesis 2:7 woy 13:15 woy 15:18 woy 17:8.

*7:7 Ogkabasa to Genesis 15:13,14 woy Exodo 3:12.

†7:8 Ogkabasa to Genesis 17:10 woy 21:2 woy 25:26 woy 29:31.

‡7:9 Ogkabasa to Genesis 37:11,28 woy 39:2,21.

§7:10 Ogkabasa to Genesis 41:39.

*7:11 Ogkabasa to Genesis 42:1.

†7:13 Ogkabasa to Genesis 45:1 woy 16.

‡7:14 Ogkabasa to Genesis 17:18 woy 45:9 woy 46:27.

§7:15 Ogkabasa to Genesis 46:1; 49:33.

*7:16 Ogkabasa to Genesis 23:3 woy 33:19 woy 50:7 woy Josue 24:32.

†7:17 Insabut to Magboboot to ogpalibongon din ka mgo pinanganak ni Abraham dio to Kanaan.

‡7:19 Ogkabasa to Exodo 1:10 woy 22.

§7:20 Ogkabasa to Exodo 2:2.

*7:21 Ogkabasa to Exodo 2:3.

†7:23 Hakob, songo oghingaranan ki Israil.

‡7:24 Ogkabasa to Exodo 2:11.

§7:29 Ogkabasa to Exodo 2:11 woy 18:3.

*7:30 Ka holholawan, dio to kandan, mammara no waro amana kayu su marulag ogkouranan. Songo kuwo ko diwata to Magboboot no niglibuwas ki Moisis woy ko si Hisus no waro pad mootow kai to tano. Pitow ka to birsikulu 33.

†7:34 Ogkabasa to Exodo 3:1-10.

‡7:35 Ogkabasa to Exodo 2:14.

§7:36 Ogkabasa to Exodo 7:3 woy 14:21 woy Numeros 14:33.

*7:37 Ogkabasa to Deuteronomio 8:15 woy 18.

†7:38 Ogkabasa to Exodo 19:1 woy Deuteronomio 5:1.

‡7:40 Ogkabasa to Exodo 32:1.

§7:43 Ogkabasa to Amos 5:25-27.

*7:44 Ka tagood no ampuanan, ka alabat din, nohimu no manggad. No ka atop, nohimu to bulbul to kambing woy mgo laplap to ayam. Ka sikan, ogkabasa to Exodo 25:9 woy 40, woy 26:1-7 woy birsikulu 14.

†7:45 Ogkabasa to Josue 3:14.

‡7:46 Ogkabasa to 2 Samuel 7:1; woy 1 Cronicas 17:1.

§7:47 Si Solomon ka anak ni Igbuyag Dabid dongan, no ka baloy no impohimu rin, ian ka Dakol no Ampuanan to Magboboot no dio to Hirusalim. 1Hari 6:1; 2 Cronicas 3:1.

*7:49-50 Ogkabasa to Isaias 66:1,2.

†7:51 Ogkabasa to Isaias 63:10.

‡7:56 Kakoy to mgo Koot-otawan dio to mgo Ginirigu, ingkalituk to “Anak to Otow” su to kinagian dan, sikan ka igkalituk to otow no duon dakol no katondanan.