2
Ka Dakol no Pogpangabang to Magboboot Kanta
1 Sikan ian to Og-awoson ta to Ogdakolon ta ka pogsagman to sikan no tu-tuu ian no nigdinog ta oyow kono ki ogpakasuwoy to sikan ian no ingkaanad kanta. 2 Ian su nataga ki to tu-tuu ian ka sikan no Balaod to Magboboot dongan no impahatod to mgo diwata no suguanon din. No agad hontow no niglop-ang to agad nokoy no insugu din woy ko waro nigpaagad-agad, niglogparan on sikandin to litos to salo din. 3 Nò, sikantanow, ko kono kid ogsagman to soini kuntoon no dakol no pogpangabang kanta to mgo salo ta, kono ki ogpakasasalia to iglogpad din kanta. Ian su ka Lagboy no Igbuyag ta no si Hisus ka nokohun-a no nignangon to soini no nangnangonon. No ka mgo nigdinog kandin, sikandan ka nigpamalogot kanta to tu-tuu ian ka sikan no innangon din. 4 Woy duon dod mgo mabogbog no mgo kabolongbolonganan, woy loinloin no mgo impoindan to Magboboot to tu-tuu ian ka ignangon din. Woy duon dod ka mgo katouanan no imbogoy to Gimukud din dio to mgo nigtuu no songo immalogot to sikan no nangnangonon din.
Si Hisus ka Talagpangabang Kanta
5 Nò, ian ku ignangon to sikan su ka pog-alap to katondanan to sikan no innangon noy no kalibutan no ogkohimu on uromo, waro ibogoy to Magboboot dio to mgo diwata no suguanon din 6 su ka otow ka ogbogayan din. Ian su duon impasulat dongan to Magboboot. No kagi to sulat to,
“Manio, Magboboot, to ogdoromdomon nu ka otow?
Woy manio to ogsagmanon nu sikandin?*Ogkabasa to Salmo 8:4.
7 No to doisok do, ka katondanan no imbogoy nu kandin, mamalintok pad to sikan no katondanan no imbogoy nu to mgo diwata no suguanon nu.†To kinagian to Ginirigu, daruwa ka ogkohimu no lituk to sikan no kagi, ko to doisok do ogmamalintok ka katondanan to otow, woy ko kuntoon pad ogmamalintok ka katondanan din.
Woy nigbogayan nu sikandin to karoyawan woy ka pogtahud no litos to igkasayo noy to dakol no igbuyag.
8 Woy nigbogayan nu sikandin to katondanan to ogboboot to tibo no kalaglagan kai to soini no kalibutan.”
Ka ignangon kai, ko nigboot ka Magboboot to oyow ogkabobootan to otow ka tibo no kalaglagan no nohimu, waro agad nokoy no kono din ogkabobootan. Di kuntoon, nataga ki to waro pad makaboboot ka otow to tibo to agad nokoy. 9 Di duon soini no natagaan ta atag tongod ki Hisus, to impamalintok pad ka ngaran din to mgo diwata to Magboboot. No nohimu ka sikan oyow ogpakimatoy si Hisus to tibo no mgo otow su ian ka igkohoy-u to Magboboot kanta tibo. No kuntoon, nabogayan on sikandin to dakol no karoyawan woy to oyow ogmabantug on su ligkat to sikan no pogkamatoy rin kanta. 10 Nò, ka Magboboot ka nighimu to tibo woy ian to nohimu su oyow ogkasayo sikandin. No nigboboot ka Magboboot to oyow ogkoumaan on si Hisus to igkabaybayari rin. Litos ka sikan oyow ogpakatuman sikandin to tibo no tuud to Magboboot. No ian su oyow si Hisus ka ogpakaalap to tibo kanta no ogkapangabangan on. Sikan ka nighimu to Magboboot oyow ogmohon-ingon din ka mgo anak din no og-alapon din dio to kandin no karoyawan.
11 Ian su si Hisus ka nig-awo to salo ta woy ka mgo otow no ogkaawaan on to salo dan, sagboka ro ka amoy ran no ian ka Magboboot. No sikan ian to kono ogkasipod si Hisus to og-abin kanta to mgo hari ki rin. 12 Ka sikan, ogkounawa to innangon din to amoy rin no ian ka Magboboot. Kagi rin to,
“Ignangon ku ka ngaran nu dio to mgo hari ku no nigtuu. No to pogkanta ku, ogsayoon ku sikoykow dio to tangkaan to mgo oglimudlimud no ogsayo koykow.”‡Ogkabasa to Salmo 22:22.
13 Duon dod dangob no kagi rin.
Kagi, “Ogsaligan ku ka Magboboot.”
Woy duon man do dangob no kagi rin. Kagi,
“Soini a rod ka nigduma to mgo anak nu no insalig nu kanak.”§Ogkabasa to Isaias 8:17,18.
14 Nò, sikanta no nigtuu no songo oghingaranan to Magboboot no mgo anak din, otow ki ro, no duon mgo sapu, mgo langosa to soini no lawa ta. Sikan ian to nig-unawa ka lawa ni Hisus to kanta no lawa no ogkohimu no ogkamatoy. Ian su oyow ligkat to kandin no pogkamatoy, ogkaawo on ka katondanan ni Satanas no ogpakaalap poron kanta dio to kamatayon. 15 No ligkat dod to sikan no pighimu ni Hisus, ogkapangabangan on ka sikan no mgo otow no nalugoy on no nabanggutan ka goinawa ran to igkahallok dan to kandan no kamatayon. 16 Nò, su ian ian, ogkataga ki man to kono no ka mgo diwata to Magboboot ka ogbuligan din. Di ka mgo pinanganak ni Abraham ka ogkabuligan din.*Ko ogbasa ki to tibo no sikan no ignangonnangon din, ogkasabutan ta to, ka otow no ogtuu ki Hisus, ogpakalagkos to mgo kaap-apuan ni Abraham. Woy basa ka to Ruma 4: 16,17. 17 Nò, nig-awos ka pogkouyag ni Hisus kai to tano oyow ogpokounawa kanta no mgo hari rin. No ian ian su oyow oggoramon din ka tibo no oggoramon ta oyow ogkohimu on sikandin no mahoy-u woy ogkasaligan no Labow to mgo Talagpanubad dio to tangkaan to Magboboot. No ka tuud din oyow ogkaawo din on ka mgo salo ta no ig-ayun ka goinawa ta to Magboboot. 18 Nò, kuntoon, ogkohimu no ogpakabulig si Hisus kanta ko ogkool-ologan ki ni Satanas su nabayaan ni Hisus ka igkabaybayari rin no nigligkat to pog-ol-olog ni Satanas kandin, di waro makasalo si Hisus.
*2:6 Ogkabasa to Salmo 8:4.
†2:7 To kinagian to Ginirigu, daruwa ka ogkohimu no lituk to sikan no kagi, ko to doisok do ogmamalintok ka katondanan to otow, woy ko kuntoon pad ogmamalintok ka katondanan din.
‡2:12 Ogkabasa to Salmo 22:22.
§2:13 Ogkabasa to Isaias 8:17,18.
*2:16 Ko ogbasa ki to tibo no sikan no ignangonnangon din, ogkasabutan ta to, ka otow no ogtuu ki Hisus, ogpakalagkos to mgo kaap-apuan ni Abraham. Woy basa ka to Ruma 4: 16,17.