Kasulatan to Magboboot Santiago 1
Ka Sulat ni
Santiago
to mgo Nigtuu
Tongod to Soini no Sulat ni Santiago
Si Santiago ka nigsulat to soini. Suguanon ni Hisu Kristu sikandin no nohimu no igbuyag dongan to mgo Hudiu no nigtuu ki Hisus. No nigsulatan din ka mgo nigtuu no nokogsuwoysuwoy dio to agad hondoi no ugpaan.
Ka tuud ni Santiago to ogsulat to mgo nigtuu oyow ogkataga sikandan ko nokoy ka litos no mgo batasan ta, pananglitan ko duon salapi to duma ta woy ko waro, woy ko ogpakabayo ki to igkohirapi ta, woy ko duon igkasasow to goinawa ta. Woy innangonnangon din ko nokoy ka litos no ogkagion ta to mgo duma ta. Woy impasabut ni Santiago kandan to waro pulus ka pogtuu ta ko dio do to bo-bo ta no kono ogpokogduma to maroyow no oghimuon ta.
Ka Ignangon to Soini no Sulat
Ka kabinunsuran to ignangonnangon ni Santiago 1:1
Ka pog-ol-olog to pogtuu ta 1:2-8
Ka mgo datu woy ka publi 1:9-11
Ka igkohirapi ta woy ka ogpakaayat poron to oyow ogpakasalo ki 1:12-18
Ka pogdinog do woy ko ka pogpaagad-agad ta 1:19-27
Ka pog-uunawa to pogsagman ta to duma ta 2:1-13
Ka pogpanag-iling to pogtuu ta woy ka oghimuon ta 2:14-26
Ka dilo ta 3:1-18
Ka pogsumansuman no ogpokounug to soini no kalibutan 4:1 – 5:6
Ka duma no imparoromdom ni Santiago kandan 5:7-20
1
Sikanak no si Santiago, suguanon a to Magboboot woy to Lagboy no Igbuyag ta no si Hisu Kristu. No ogpangumustoon ku sikaniu no ogtuu no nokogsuwoysuwoy dio to agad hondoi no ugpaan.* Dio to kinagian to Ginirigu, ogkabasa ta to nigsulatan ni Santiago ka sampulu woy daruwa no kapunganan no nokogsuwoysuwoy. Songo kuwo ko ian lituk to sikan ko lagboy rin nigsulatan ka nigtuu no mgo Hudiu no nokogsuwoysuwoy. Di ka innangon ni Santiago, litos dod to agad hontow no ogtuu ki Hisus.
Ka Pogtuu ta woy ka Pogkaabin Kanta to Magboboot
Mgo sulod, karago kow ro ko ogkoumaan kow to mohon-ing no mgo igkabaybayari now su nataga ki to, ligkat to pog-aguanta ta to sikan no mgo igkool-olog to pogtuu ta, oyow ogkohogotan on. No ko ungod ta og-aguantoon ka mgo igkabaybayari ta, mangkuwan, ogmatuwarong on ka pogtuu ta ki Hisus woy ogkohimu on to waro igkaalang-alang to batasan ta.
Nò, sikaniu no nigtuu, ko waro kow mataga ko nokoy ka maroyow no oghimuon now, buyu kow to Magboboot no ogkabogayan kow su magaan ogpambogoy to maroyow no pogsabut ta no kono ogpokogsondit ka goinawa rin to sikan no igbogoy rin. Di ko ogbuyu ki, og-awoson to ogtuu ki no kono ki ogtambabo. Ian su ka sikan no otow no ogbuyu di ogtambabo, ogkounawa ro to luwak to dagat no ogkasiu-siu do duon to kalamag. 7-8 No ka otow no ogkoiling to sikan no oglimanglimang so goinawa rin, songo kono ogkasaligan no og-awoson to songo kono og-iman-iman sikandin to ogkabogayan to agad nokoy no ogligkat to Lagboy no Igbuyag ta.
Ka otow no nigtuu on no malmalintok do so ngaran din, maroyow ko ian din igkarago su ogpakasasindog on sikandin to tankaan to Magboboot to waro igkasipod din.
10 Di ka datu no ogtuu on, og-awoson to igkarago dan ka pogkaawo to bantug dan. Ian su uromo, ka mgo datu, ian dan ogkounawaan ka mgo bulak to hilamonon no songo ogkaawo do duon. Ka datu no ogtuu ki Hisus no ogkaawaan on to bantug din woy ko igkaratui rin, songo kuwo ko ogkatimulan doka pogsalig din to Magboboot. 11 Ian su ko ogmanalinga on ka allow, ogmoinit on no ogkalanos on ka mgo hilamonon no ogkapadpad on ka mgo bulak dan. No warad on ka igkaroyow ran. Ogkabasa to Isaias 40:6. Ogkounawa rod ka mgo datu su ogkasalanganan on to pogkamatoy ran no ogkoongkoran dan do duon ka igkatiglingoy ran.
Ka Ogpokool-olog Kanta woy ka Ogpakaayat
12 Ka sikan no otow no og-aguantoon din ka igkabaybayari rin, ogbogayan to dakol no igkarago din. Ian su ko kono ogkaalap to sikan no igkabaybayari rin, ogkasayo sikandin no ogbogayan to pogkouyag din no waro katamanan. Sikan ka innangon to Magboboot no igbogoy rin to tibo no ogdakolon dan to goinawa ran kandin. 13 Ko duon igkool-olog kanta to ogpakasalo, kono ta ogbayungan ka Magboboot to sikandin ka nigpasalo kanta su kono ogkoologan ka Magboboot to ogpakasalo woy songo kono din og-ol-ologan ka otow to pogpasalo.
14 Di ko ogkool-ologan ki to oyow ogpakasalo ki, ian to ogkaayat ki su duon to goinawa ta ka ogpakaalap to ogkoibogan ta. 15 Ko ungod ta ogdoromdomon ka sikan no ogpakaayat kanta to maroot no oghimuon ta ro duon, ogpakasalo kid on. Ko ogliblibongan ta ka sikan no salo, ian ta ogkoumaan ka kamatayon ta. 16 Nò mgo sulod ku no indakoli kud ian to goinawa, kono kow ogpagawoy to goinawa now.
17 Ka Magboboot ka ogligkatan to tibo no maroyow woy waro solug no maroot no ogpakaamut to agad nokoy no igbogoy rin kanta. Sikandin ka Amoy ta no nighimu to tibo no oglayag dio to langit. Ka layag dan, ogkahalinhalin no duon alung ligkat to pogkahalin dan. Di ka Magboboot, kono ogkoiling kandan su kono atag ogkahalin. 18 Ligkat to imboot to Magboboot, nighimu kinow rin on no mgo anak din ligkat to pogtuu ta to kinagian din no tu-tuu ian. No ian su noiniatan din to oyow ogpakaampow-ampow ki to tibo no nighimu rin. No ian ogkounawaan ka an-anayan no ogkagaani ta no igpayag ta to Magboboot.
Ko Ogdinog ki ro Duon woy ko Ogpaagad-agad ki to Kinagian to Magboboot
19 Nò mgo sulod no indakoli kud to goinawa, su ian ian, maroyow ko tibo kinow, og-ay-ayaran ta to ogpamminog to kinagian to Magboboot. Di woy ki ro ogkagi to duma ta ko ogsumsumanon ta pad ko nokoy ka litos no igtabak ta. Woy maroyow ko mananoy ki ogkabolu. 20 Ian to mananoy ki porom ogkabolu su ka igkabolu ta, kono ogpakatuman to sikan no matuwarong no tuud to Magboboot. 21 Sikan ian to og-awoson to og-iniugan tad on ka tibo no maroot no batasan ta woy ka tibo no lagut no duon to goinawa ta. Woy songo og-awoson to igpariralom tad ka goinawa ta to Magboboot su oyow ogpakapaagad-agad ki to kinagian din no ingkasabuk din duon to goinawa ta. Ian su ka kinagian din ka ogpakapangabang kanta to sikan no iglogpad din.
22 Di kono no litos ko ogdinog ki ro duon to kagi rin. Di og-awoson to ogtumanon tad on, su ko ogdinogon ta ro no kono ki ogpaagad-agad to kinagian din, ogkoubatan ta ro ka kanta no goinawa. 23 Ian su ka sikan no otow no ogdinog do duon to kagi to Magboboot di kono din ogtumanon, ian din ogkounawaan ka otow no ogpitow to alung din dio to ispiu, 24 su agad ogkitoon din pad ka langlanguwan din di mangkuwan ko oghipanow on, ogkalingawan din on ko moomonu ka pogpitow rin to sikan no alung din.
25 Di ka otow no ungod ogdoromdom to sikan no matul-id lagboy no kinagian to Magboboot no ogpakalipuwas kanta, no ungod ogpaagad-agad, sikan ka ogkohoy-uan to Magboboot to tibo no oghimuon din. Ian su ogtuman sikandin to kagi to Magboboot. Kono no ogdinog do duon di mangkuwan ogkalingawan.
26 Ko duon otow no nahan din no og-unug to goinawa to Magboboot di kono din do ogponoron ka kagi rin, ogkoubatan sikandin to goinawa rin no waro pulus to pog-ampu din. 27 Ian ian su dio to tangkaan to Magboboot no Amoy ta, ka tu-tuu ian no pog-unug ta to goinawa rin no waro maroot no igkaamut, ko ogtantanuran ta ka goinawa ta to oyow kono ki ogkaayat to mgo maroot no batasan to mgo waro nigtuu no kai to soini no kalibutan su oyow kono ki ogkabuingan ka pogkootow ta. Woy og-awoson ta to ogsagmanon ta ka mgo noilu woy ka nabalu no mgo boi to mgo igkohirapi ran.

*1:1 Dio to kinagian to Ginirigu, ogkabasa ta to nigsulatan ni Santiago ka sampulu woy daruwa no kapunganan no nokogsuwoysuwoy. Songo kuwo ko ian lituk to sikan ko lagboy rin nigsulatan ka nigtuu no mgo Hudiu no nokogsuwoysuwoy. Di ka innangon ni Santiago, litos dod to agad hontow no ogtuu ki Hisus.

1:10 Ka datu no ogtuu ki Hisus no ogkaawaan on to bantug din woy ko igkaratui rin, songo kuwo ko ogkatimulan doka pogsalig din to Magboboot.

1:11 Ogkabasa to Isaias 40:6.