1 To si Augusto pad ka Punuan dio to Ruma, nigsugu din ka tibo no mgo otow dio to tibo no mgo lunsud oyow ogpanlista ka mgo ngaran to tibo no nasakup din. 2 Sikan ka an-anayan no igpapanlista to ngaran to mgo otow no nokogdorongan to pogsugu ni Kiriniu no ian gobirnador dio to Siria. 3 Sikan ian no nanhondio on ka tibo no mgo otow to tahan no ugpaan to mgo kaap-apuan dan su igpanlista to ngaran dan.

4 No si Husi, songo nighondio on ligkat to lunsud to Nasarit no duon to Probinsia to Galilia, no dio mogdolog to lunsud to Bitlihim no dio ian to Probinsia to Hudia. No ian to nighipanow si Husi dio to Bitlihim su dio ian mootow ka dongan no Labow no Igbuyag dan no si Dabid, no pinanganak ni Dabid si Husi. 5 To poghondio ni Husi oyow igpalista to ngaran dan, pigduma rin si Maria no og-asawoon din.*Ka batasan to mgo Hudiu dongan, duon ogkounawa to panakin to Manobo di kono og-ugpo ka lukos dio to baloy to amoy to boi. No si Maria, ogkaboros.

6 To diad on to Bitlihim sikandan, no natuman on ian ka ig-anak ni Maria. 7 Nig-anak on sikandin to lukos no ian panganoy rin. Nigbukusan din ka bato to manggad no dio din ipohibat to koonanan to ayam. Ian nokohonduon sikandan su warad on moolog sikandan to ugpaanan to mgo magaliug.

8 Nò, duon mgo talagbantoy to karniru dio to nakamotan no nigmarani to lunsud to Bitlihim no ogbabantoy to mgo ayam dan no karniru ko marusilom. 9 No, natokow sikandan to duon diwata no suguanon to Magboboot no niglopow dio to kandan no nalayagan to karayow to layag no nigpuun dio to Magboboot. Nahallok lagboy ian ka sikan no mgo talagbantoy to ayam. 10 Di nigkagi ka diwata kandan to, “Ko kow ogkahallok, su ognangonan kow to maroyow no nangnangonon litos to igkarago to tibo no mgo koot-otawan, 11 su kuntoon, dio to lunsud to Bitlihim no ian ugpaan ni Dabid dongan, duon bato no nootow. Kandin ka Talagpangabang to mgo salo now, woy sikandin ka Im-imanan to mgo Koot-otawan no ian Lagboy no Igbuyag now.†Kandin ian ka innangon dongan to Magboboot no igpohondini rin. 12 No sikan ka ogtokoron now kandin su ogkitoon now ka bato no nigbukusan to manggad no dio ipohibat to koonanan to mgo ayam,” kagi to diwata.

13 Natokow on no nigmohon-ing on lagboy ka mgo diwata no suguanon to Magboboot. Kandan, dio nigpuun to Langit no nigdalapak on to sikan no nokohun-a no diwata no nigkakanta to pogsasayo dan to Magboboot. 14 Kagi ran, “Dakol ka pogsayo ta to Magboboot dio to Langit, woy kai to tano, ogmaawang on so goinawa to mgo otow no ogkohoy-uan din.”

15 Pogkaponga, nan-uli ka mgo diwata dio to Langit no kagi to mgo talagbantoy to ayam to, “Kuntoon, hipanow kinow dio to Bitlihim su ogpitow kinow on to nohimu dio no impohitaga to Magboboot kanta,” kagi. 16 Sikan ian no nig-agpas on nangipanow ka sikan no mgo talagbantoy to ayam no waro malugoy no nokouma sikandan no nigkita ran on si Maria woy si Husi woy songo nigkita ran ka bato no si Hisus no nigpohibat dio to koonanan to ayam. 17 No to nakitaan dan on, nignangonnangon on to tibo no kagi to mgo diwata kandan bahin to soini no bato no si Hisus, 18 no agad hontow no nakarinog to innangon kandan to mgo talagbantoy to karniru, nabolongbolong. 19 Di si Maria atag, dio do to goinawa rin ka tibo no nigdinog din no malasi rin do doromdoma.

20 Nò, nig-uli on ka mgo talagbantoy to karniru no nigsasayo sikandan to Magboboot to mgo kanta ran. Ian to ogsayoon dan su narago ian to tibo no nigdinog dan woy tibo no nakitaan dan no unawa to innangon to diwata kandan.

21 To nokouma on ka igkawalu no allow to pogkootow ni Hisus, nigpatuli dan on sikandin su sikan ka batasan to mgo Hudiu no si Hisus ka igpohingaran dan.‡Ka lituk to ‘Hisus’, ‘Talagpangabang’. To waro pad maboros si Maria, tahan on innangon to diwata no suguanon to Magboboot to, “Ko og-anak ka, ian nu ihingaran si Hisus.”

22 Nokouma on ka allow no litos ki Husi woy si Maria no ogtumanon dan ka Balaod no ingalat ni Moisis dongan tongod to boi no iam pad nig-anak.§Ka mgo Hudiu dongan, mohon-ing ka igpamaligsom kandan dio to tangkaan to Magboboot. Ko og-anak ka boi, woy ogmalinis dio to Magboboot, ko duon oghimatayan dan dio to Dakol no Ampuanan. Ko naponga sikan, litos to ogsolod to og-ampu. No nighondio sikandan to Hirusalim dio to Dakol no Ampuanan no nig-alap dan ka bato oyow igpoindanan dan sikandin dio to Magboboot.*Basa ka to Levitico 12:6. 23 Ian pighonduon ni Husi alunggun ki Maria su duon ingkasulat dongan to Balaod to Magboboot to, “Ka tibo no bato no lukos no panganoy no anak to mgo Hudiu woy ka tibo no panganoy no lukosan no ayam, ogpoindanan no igbogoy now to Magboboot.”†Basa ka to Exodo 13:2,12. 24 No ka dangob no tuud to inhondio on woy si Maria su ogpohimatayan dan ka darua no limukon. Ko waro limukon, agad darua no salapati su sikan ian ka kagi dut Balaod to Magboboot dongan no litos to ogtubaran dan.‡Basa ka to Levitico 12:8.

25 Duon lukos dio to Hirusalim no ian ngaran din, si Simion. Ka soini no otow, maroyow ka mgo batasan din woy ogtahuron din ka Magboboot no ogtatagad sikandin ko kon-u ogpangabangi ka mgo otow no pinanganak ni Israil. No ka Gimukud to Magboboot, nigduma layun ki Simion no 26 nigpohitaga kandin to kono pad ogkamatoy taman to ogkitoon din on ka Im-imanan to mgo Koot-otawan no intaga dongan to Magboboot no igpohondini rin to tano.

27 No, insabuk to Gimukud to Magboboot dut goinawa ni Simion to ogsolod to Dakol no Ampuanan. Songo nokouma on si Husi alunggun ki Maria dio to Ampuanan no pig-alap dan ka bato su ogtumanon dan ki Hisus ka batasan no ingkasulat dio to Balaod dan. 28 To nigkita ni Simion si Hisus nigsakupu rin sikandin no nigsayo din ka Magboboot no kagi rin to:

36-37 No, duon dod songo boi no nabalu no ka ngaran din, si Ana no talagnangon to kagi to Magboboot sikandin. Ian ngaran to amoy rin si Panuil no ka kaap-apuan din, si Asir. Woy nabalu si Ana to papitu pad no tuid to pog-aalunggun dan. Kuntoon, buyag on ian no kawaluan on ka tuid din woy hop-at. Waro moghutuk mog-asawa sikandin no malasi nighondio to Dakol no Ampuanan allow woy karusilom no ogsimboon din ka Magboboot to pog-ampu din woy to poglangkad din no ogkoon.

38 To ogkagi pad si Simion ki Maria dio to solod to Ampuanan, niglopow on si Ana dio to kandan no nigpasalamatan din on ka Magboboot. Nò, nignangon sikandin bahin to soini no bato dio to tibo no nakitaan din no mgo otow no oglayun sikandan og-iman-iman ko kon-u ogpangabangi to Magboboot ka mgo taga Hirusalim.*Ka taga Hirusalim ka nighingaranan din, di ka lituk, oglagkosan ka taga Israil.

39 To napongaan on woy ni Husi ka pogtuman dan to tibo no batasan to sikan no Balaod to Magboboot no ingkasulat dongan, nig-uli on sikandan dio to ugpaan dan dio to Nasarit duon to Probinsia to Galilia. 40 No si Hisus no bato pad, nigtulin on woy nigmasalig on ka lawa rin. Songo nigmasalig on ka natouan din su nigbulig ka Magboboot kandin.

41 Kara tuid oghondio si Husi darua to inoy ni Hisus to Hirusalim su og-amut to pagkoonan to mgo Hudiu no oghingaranan dan to Paligad.†Ogdoromdomon to mgo Hudiu ka nigpalibuas kandan to ugpaan to Ehipto dongan. 42 To sampulu woy darua ka tuid ni Hisus, nigduma ran sikandin no nighondio to Hirusalim to sikan no pagkoonan to mgo Hudiu tongod to batasan dan.

43 Pogkaponga on ka sika allow to pagkoonan, nanhipanow on si Husi woy si Maria su og-uli on. Dokad di to nagalat do ka bato no si Hisus dio to Hirusalim no waro mataga ka amoy rin darua to inoy rin to waro naan makaruma si Hisus kandan. 44 Nahan dan no nakaruma on si Hisus buwa to mgo duma ran. Sikan ka nigparagas sikandan nighipanow to songo allow. Namangho dan si Hisus ko dio buwa mogduma to mgo sulod dan woy ko dio buwa mogduma to dangob no mgo duma ran. 45 Pogpitow ran no waro dan kitaa sikandin, niglibong man do dio to Hirusalim no ogpamangho kandin. 46 Tatolu on no allow woy ran kitaa si Hisus, no duon dod dio to Dakol no Ampuanan no nigpataliwaro si Hisus nigpinnuu to mgo talag-anad to kagi to Magboboot no nigpamminog si Hisus to kagi ran woy songo duon inso din kandan tongod to pog-anad dan. 47 Ka tibo no mgo otow no nigpamminog ki Hisus, nabolongbolong to dakol ka ogkasabutan din woy maroyow ka mgo tabak din to mgo buyag. 48 Nò, nabolongbolong si Maria darua ki Husi to nigkita ran si Hisus. Kagi to inoy rin to, “Utu, manio naan to nighimu nu ka unawa to soini? Nasasow koy lagboy no namangho koykow.” 49 Kagi ni Hisus to, “Og-inso a kaniu ko manio naan to namitow kow koddi? Waro kow mataga to kai a ro to baloy to Amoy ku?” 50 Di waro makasabut woy si Maria to kagi ni Hisus kandan ko nokoy ka kalitukan.

51 Nò, nigduma si Hisus kandan no nokouma on sikandan dio to lunsud to Nasarit. Nigpaagad-agad si Hisus kandan. No ka inoy rin, waro malokoi to goinawa rin ka pogdoromdom din tongod to tibo no nohimu kandin. 52 No nigtulin si Hisus woy nigtimulan on ka ogkatouan din. Songo nigdakol on ka ingkarago to Magboboot woy to mgo otow kandin.