Ka Maroyow no Nangnangonon no Insulat ni
Matiu
Bahin ki Hisu Kristu
Bahin to Soini no Sinulat ni Matiu
To kai pad to soini no tano si Hisus, ka mgo taga Ruma ka ogboot to mgo Hudiu. Mohirap to mgo Hudiu ka buhis no ogpabayaran to mgo taga Ruma kandan. No, nigpogos to taga Ruma ka duma no Hudiu to ogkubla to sikan no buhis. Nò, nabolu ka mgo duma ran no Hudiu to ogkublaan dan woy su nigtimulan dan ka salo dan ko nigpasublaan nigkubla. Si Matiu, sikandin ka sagboka no talagkubla to buhis. Di to nig-umow si Hisus kandin to ogduma kandin, nig-ongkoran din ka sikan no talabau rin woy nigluyud on ki Hisus. SiMatiu ka sagboka no lukos no nig-alam ni Hisus to hibatoon din no nigdurumaruma si Matiu kandin.
Nigsulat si Matiu to soin no liblu no ka mgo duma rin no Hudiu ka tuud din. Ognangonon din to soin no liblu bahin to mgo in-anad ni Hisus woy ka mohon-ing no mgo nighimu rin. Impasabut din to si Hisus no taga Nasarit ka Im-imanan to mgo Koot-otawan.
Mgo Nakasulat kai to Diblu ni Matiu
Ka kaap-apuan woy ka pogkootow ni Hisus 1:1 – 2:23
Ka pog-anad ni Huan no Talagbautismu 3:1-12
Ka pogbautismu woy ka pogtintal ki Hisus 3:13 – 4:11
Ka pog-anad ni Hisus dio to Galilia 4:12 – 18:35
Ligkat to Galilia pohondio to Hirusalim 19:1 – 20:34
Ka katamanan no simana no dio to Hirusalim 21:1 – 27:66
Ka pogbatun woy ka pogkakita ni Hisus 28:1-20
1
Ka mgo Minuna ni Hisu Kristu
(Lukas 3:23-38)
1 Soini ka mgo ngaran to minuna ni Hisu Kristu. Pinanganak sikandin to igbuyag dongan no oghingaranan ki Dabid.
Woy si Dabid pinanganak ni Abraham.
2 Si Abraham ka amoy ni Isaak. Si Isaak, amoy ni Hakub.
Si Hakub amoy ni Huda woy to mgo sulod din.
3 Si Huda asawa rin si Tamar. Ka mgo anak dan ian si Piris woy si Sira. Si Piris ka amoy ni Hisron. Si Hisron, amoy ni Aram.
4 Si Aram amoy ni Aminadab. Si Aminadab, amoy ni Naasom. Si Naasom amoy ni Salmon.
5 Si Salmon asawa rin si Rahab. Ka anak dan ian si Boas. Si Boas, amoy ni Obid. Si Rut ka inoy ni Obid. Si Obid amoy ni Jesse.
6 Si Jesse ka amoy to Labow no Igbuyag dongan no si Dabid. Si Dabid ka amoy ni Solomon. To inoy rin, asawa ni Urias no songo naasawa on ni Dabid.
7 Si Solomon amoy ni Rihoboam. Si Rihoboam, amoy ni Abias. Si Abias, amoy ni Asa.
8 Si Asa amoy ni Hosapat. Si Hosapat amoy ni Horam. Si Horam amoy ni Usias.
9 Si Usias amoy ni Hotam. Si Hotam amoy ni Akas. Si Akas amoy ni Isikias.
10 Si Isikias amoy ni Manasis. Si Manasis amoy ni Amon. Si Amon amoy ni Hosias.
11 Si Hosias amoy ni Joaquin woy ka mgo sulod din. Sikan ka allow to pogdakop to mgo matig Babilonia to mgo matig Israil woy to pog-alap dio to ugpaan no oghingaranan to Babilonia.*Basa ka to 2 Mga Hari 24:14; 2 Cronicas 36:10; Jeremias 27:20.
12 To diad on to Babilonia ka mgo matig Israil, duon anak ni Joaquin no si Salatiel. Si Salatiel amoy ni Sirobabil.
13 Si Sirobabil amoy ni Abiud. Si Abiud amoy ni Eliakim. Si Eliakim amoy ni Asor.
14 Si Asor amoy ni Saduk. Si Saduk amoy ni Akim. Si Akim amoy ni Eliud.
15 Si Eliud amoy ni Eliasir. Si Eliasir amoy ni Matan. Si Matan amoy ni Hakub.
16 Si Hakub amoy ni Husi no asawa ni Maria. Si Maria inoy ni Hisu Kristu. Si Hisu Kristu oghingaranan to Im-imanan to mgo Koot-otawan†Ka kalitukan to Im-imanan ian ka pig-alam to Magboboot no duon katondanan din to koot-otawan uromo.
17 Sampulu woy hop-at no mgo kapunganan ligkat ki Abraham taman ki Dabid. Songo sampulu woy hop-at no mgo kapunganan ligkat ki Dabid taman to allow to pogkaalap to mgo matig Israil dio to Babilonia. Taman to pog-anak ki Hisu Kristu songo duon sampulu woy hop-at no mgo kapunganan.
Ka Pog-anak ki Hisus
(Lukas 2:1-7)
18 Noiling soini ka pog-anak ki Hisu Kristu. Duon sagboka no lukos no oghingaranan ki Husi no og-asawoon din si Maria. Di to waro pad sikandan nakasal, natagaan ni Maria no ogkaboros sikandin pinabayo to kabogbogan to Gimukud to Magboboot. 19 Di waro matagoi ni Husi to ogkaboros si Maria pinabayo to kabogbogan to Gimukud to Magboboot. Di si Husi maroyow ka batasan din no sikan ian no kono din ogkoiniatan no ogpasiporan din si Maria, omunaan no igholos din to pog-ongkod din porom ki Maria. 20 To pogsumansuman ni Husi to pog-ongkod din ki Maria, nigpatagoinop sikandin to diwata to Magboboot no nigkagi to sikan no diwata to “Koykow Husi no pinanganak ni Dabid no igbuyag dongan, kono nu ongkori si Maria su ka igkaboros din ligkat to kabogbogan to Gimukud to Magboboot. 21 Og-anak sikandin to lukos no hingarani nu sikandin ki Hisus su sikandin ka ogpakapangabang to mgo koot-otawan to mgo salo dan.”‡Ka lituk to ngaran din, Talagpangabang. 22 Nohimu tibo sikan ki Maria woy ki Husi oyow ogkatuman ka innangon dongan to Magboboot pinabayo to talagnangon din no nigkagi rin to, 23 “Ogkaboros ka sagboka no dalaga no waro pad magongoni to lukos. Og-anak sikandin to bato no lukos no soini no bato oghingaranan ki Imanwil no ka kalitukan to ngaran din ‘Nig-amut kanta ka Magboboot.’ ”§Basa ka to Isaias 7:14. 24 Nò, to nakahimata si Husi, pigtuman din ka kagi to diwata to Magboboot dio to kandin. Nò, pig-asawa rin on si Maria. 25 Di waro pad huliri ni Husi si Maria taman to nig-anak sikandin. Poglusot on to bato, si Hisus ka inngaran ni Husi.