Kasulatan to Magboboot Impapitow 1
Ka
Impapitow
ni Hisus ki Huan
Tongod to Soini no Impapitow ni Hisus ki Huan
Si Hisus ka nigpasulat to soini no impapitow rin ki Huan no suguanon din. Ka tuud to impasulat din oyow ogkabuligan ka goinawa to mgo otow no ogkabaybayaran su tongod to pogtuu ran ki Hisus, woy su oyow songo ogpakapanagana ki oyow kono ki ogkatokawan to poglibong ni Hisus kai to tano woy to oyow kono ki ogkabolongbolong ko songo duon ogkabayaan ta no mgo igkabaybayari no ogligkat to mgo otow no og-usig to ngaran ni Hisus woy ka ngaran to Magboboot.
No to soini no sulat ni Huan, innangonnangon din ka mgo dakol no igkabaybayari no ogkoumaan uromo kai to soini no kalibutan woy tongod to sikan no mabulut no oghingaranan to magintalunan no ogpakaalap uromo to dakol no kabogbogan ni Satanas no og-atu to Magboboot taman to ogkaroog ni Hisus sikandan no igdogpak on sikandan to hapuy no ogliabliab. Woy impapitow kandin ki Hisu Kristu no noiling to Nati to Karniru no nigsasindog to pinnuuanan to pandatuan to Magboboot. Ian to noiling to Nati to Karniru su ka kandin no lawa ka impakimatoy dongan oyow ogkapangabangan ki to mgo salo ta. Woy impohitaga rin impanoy to duon allow to Magboboot no ogkouyag on ka mgo sakup din no ogbogayan sikandan to igsayo din kandan. Di mohuri ogkootawan ka waro nigpasakup kandin woy ogkabobootan on to logpad no ogkohingaranan to igkaruwa no kamatayon.
Ka Ignangon to Soini no Sulat
Ka kabinunsuran to insulat ni Huan woy ka an-anayan no impapitow kandin 1:1-20
Ka papitu no sulat no igpohondio to papitu no lunsud 2:1 – 3:22
Ka nalulun no ogbasoon woy ka papitu no imparokot 4:1 – 8:1
Ka papitu no bungag 8:2 – 11:19
Ka boi woy ka ulod woy ka daruwa no magintalunan 12:1 – 13:18
Ka Nati to Karniru woy ka 144,000 no nigbalukas din 14:1-5
Ka poggaani to mgo koot-otawan kai to kalibutan 14:6-20
Ka papitu no igkabaybayari woy ka papitu no boung no iglogpad 15:1 – 16:21
Ka pogkaroog to Babilunia woy ka duma no usig to Magboboot 17:1 – 20:10
Ogkabobootan ka tibo no mgo koot-otawan 20:11-15
Ka iam no langit, iam no tano woy ka iam no Hirusalim 21:1 – 22:5
Ka katamanan to sikan no insulat ni Huan 22:6-21
1
Ka soini no igsulat ku, insalig to Magboboot ki Hisu Kristu no igpohitaga rin dio to mgo suguanon din oyow ogkatagaan dan ka ogkoumaan no konad on ogkalugoy. No nigsugu din ka diwata no suguanon din, no ian impohitaga kanak no si Huan. No igsulat ku ka tibo no nigkita ku woy igmalogot ku to kinagian ian to Magboboot ka ignangonnangon ku no impohitaga ni Hisu Kristu. Ogkapulusan ka agad hontow no ogbasa, woy ka ogpamminog woy ogtuman to soini no impanoy innangonnangon to kinagian to Magboboot su magaan on ogkatuman ka soini tibo.
Ka Igpangumusta ni Huan to mgo Nigtuu no dio to Papitu no Lunsud
4-5 Kanak no si Huan, ogsulatan ku ka mgo otow no nigtuu to Magboboot no dio to sikan no papitu no mgo lunsud dio to probinsia to Asia.
Ogbuyu a to Magboboot oyow ogkohoy-uan kow rin woy to oyow ogkabogayan kow to maawang no goinawa no ogligkat kandin woy to Gimukud din woy ki Hisu Kristu. Agad dongan, woy kuntoon taman to waro katamanan, sikandin do ian ka Magboboot. No ka Gimukud din no ungod og-ugpo dio to tangkaan din, papitu ka igpohitaga to kabogbogan din. Si Hisu Kristu, ian ka ogkasaligan ta to ogmalogot to ignangonnangon din. No sikandin ka an-anayan no ligkat to kamatayon no nouyag on to waro katamanan. Woy sikandin dod ka ogpakaboot to tibo no mgo labow no datu no kai to soini no tano.
Dakol ka goinawa rin kanta su niglipuwasan ki nikandin to mgo salo tanow su ligkat to pogkamatoy rin dio to krus.* Ogkabasa to Salmo 89:27. Nigbogayan kinow ni Hisus to katondanan oyow ogpakabulig ki to pog-alap din to pandatuan din. Woy nohimu kinow on no mgo talagpanubad dio to tangkaan to Magboboot no ian Magboboot din dod woy Amoy rin. No si Hisu Kristu ka litos no ogkasayo ta woy to og-alap to pandatuan din woy ka kabogbogan din to waro katamanan. Malogot ian ka soini. Ogkabasa to Exodo 19:6.
Nò, panagana kow. Oglibong si Hisu Kristu kai to tano no ogpakaruma to mgo gapun. Tibo no mgo otow, agad ka niglansang kandin dio to krus, ogpakakita kandin. No ka tibo no mgo koot-otawan kai to tano, ogpakapandawot to igkalango tongod kandin. Malogot ian. Ogkabasa to Daniel 7:13 woy Zacarias 2:10.
Ka Magboboot no ian Lagboy no Igbuyag, sikandin ka Mamabogbog to tibo woy sikandin do ian ka Magboboot ligkat dongan no waro pad nohimu ka kalibutan woy sikandin dod ka Magboboot kuntoon woy taman to waro katamanan. Kagi rin to, “Sikanak ka kabinunsuran woy ka katamanan to tibo.”
Duon Impapitow ki Huan
Sikanak no si Huan, sulod now to pogtuu ki Hisus. No nohimu a no duma now to pog-aguanta ta to igkabaybayari no ogligkat to nalagkos kinow to pog-alap din to pandatuan din. Impougpo a to songo pulu to dagat no oghingaranan to Patmus su ligkat to nignangonnangon a to kinagian to Magboboot woy su ligkat to immalogot ku ka in-anad ni Hisus kanak. 10 No to songo allow to Dominggu no ian allow to pogsimba to Magboboot, nigbobootan a to Gimukud din. No kai to ogkoiniugan ku, duon nigdinog ku no kagi no maagbot lagboy no noiling to daging to bungag no ogbawos. 11 Kagi rin to, “Isulat nu ka tibo no ogkitoon nu woy ipaalap nu to mgo otow no nigtuu to Magboboot no dio to papitu no lunsud to Episu, ka Ismirna, ka Pirgamu, ka Tiatira, ka Sardis, ka Piladilpia woy ka Laodisia.”
12 Pogkarinog ku to sikan no kagi, niglingi a oyow ogpitawon ku ko hontow ka nigkagi kanak. No duon nigkita ku no papitu no bulawan no sabukanan to mgo ilawan. 13 No dio to taliwaro to sikan no mgo ilawan, duon nigkita ku no ogkoiling to otow. Ka kinabo din, dio taman to paa rin. No duon insalubabat no bulawan dio to sosolobon din.§ Ogkabasa to Daniel 7:13 woy 10:5. 14 Ka bulbul din, maputi lagboy no ogkoiling to gapas. No ka mata rin, noiling to logdog to hapuy.* Ogkabasa to Daniel 7:9 woy 10:6. 15 Ogpangini-kinì ka paa rin no noiling to burunsi no nakasugbuk to hapuy. No ka lagong din, maagbot lagboy no ogkoiling to nigdagunut to sampow. Ogkabasa to Ezequiel 43:2. 16 Dio to kawanan no bolad din, duon papitu no bituon no niggongonan din. Dio to bo-bo din, duon niglibuwas no malayat woy maligdus no balarow no daruwa ka galang. Ka langlanguwan din, malayag lagboy no ogkounawa to layag to allow ko mougtu on. 17 Pogkakita ku kandin, nahallok a lagboy no napolod a ro duon to tangkaan din no noiling a to namatoy. Di niggongonan a nikandin to kawanan no bolad din woy nigkagi to, “Kono ka ogkahallok su sikanak ka kabinunsuran woy ka katamanan. 18 Waro kabinunsuran to pogkouyag ku. Namatoy ad nokani di nouyag ad on taman to waro katamanan. No sikanak doka ogpakaboot ko hondoi ku ogpougpaa ka mgo nammatoy. Woy sikanak dod ka duon katondanan to ogpulas to sikan no ugpaan to mgo nammatoy. Dio to kinagian to Hinibriu, Hadiska ighingaranan dan to sikan no ogpougpaan to Magboboot to mgo nammatoy. 19 Nò, isulat nu ka igpapitow ku koykow no magaan on ogkatuman woy ka ogpakatuman on uromo. 20 Kuntoon, soini ka kalitukan to sikan no papitu no mgo bituon no nigkita nu no niggongonan ku dio to kawanan no bolad ku woy ka kalitukan to sikan no papitu no bulawan no mgo sabukanan to ilawan. Ka papitu no mgo bituon, ian ka papitu no mgo suguanon to Magboboot no ogtanudtanud to mgo nigtuu no dio to sikan no papitu no lunsud. No ka papitu no mgo sabukanan to mgo ilawan, sikandan ka mgo otow no nigtuu to Magboboot no dio to sikan no papitu no lunsud.”§ To kinagian to Ginirigu, ka sikan no mgo suguanon, ogkalituk to mgo diwata to Magboboot woy ko mgo igbuyag no nohimu no suguanon din to og-alap to sikan no mgo nigtuu.

*1:4-5 Ogkabasa to Salmo 89:27.

1:6 Ogkabasa to Exodo 19:6.

1:7 Ogkabasa to Daniel 7:13 woy Zacarias 2:10.

§1:13 Ogkabasa to Daniel 7:13 woy 10:5.

*1:14 Ogkabasa to Daniel 7:9 woy 10:6.

1:15 Ogkabasa to Ezequiel 43:2.

1:18 Dio to kinagian to Hinibriu, Hadiska ighingaranan dan to sikan no ogpougpaan to Magboboot to mgo nammatoy.

§1:20 To kinagian to Ginirigu, ka sikan no mgo suguanon, ogkalituk to mgo diwata to Magboboot woy ko mgo igbuyag no nohimu no suguanon din to og-alap to sikan no mgo nigtuu.