1 Nò, ka igkalima no diwata to Magboboot, nighiup to kandin no bungag. Woy duon nigkita ku no bituon no tahan on no noulug kai to tano ligkat to langit no warad on layag din.*Dio to Birsikulu 11, ogkasabutan ta to diwata naan ka sikan no bituon. Nigbogayan sikandin to susi no igpulas to bitu no kono ogkatogkad ka karalomi rin. 2 Nò, nigpulasan to bituon ka sikan no bitu. No duon niglibuwas no makopal lagboy no obol. No ian ogkounawaan ka obol no ogligkat to dakol no ogkasilaban. No nigmarusilom on ka kalibutan woy naatangan ka layag to allow su ligkat to obol no niglibuwas to sikan no bitu. 3 Poglibuwas to sikan no obol, duon mgo talangas no nanlibuwas on kai to tano. Woy nigbogayan sikandan to kabogbogan to oghisakit to otow no ogkoiling to alas to pogkagat to salipitsipit. 4 Nigsaparan ka mgo talangas to oyow kono dan ogdaaton ka mgo pangamuton, woy ka mgo kayu, woy ka agad nokoy no mgo pinamula. Di ian dan do oghisakitan ka mgo otow no waro pangotob dio to bukod dan no igpatokod to sakup sikandan to Magboboot. 5 No nigbogayan ka mgo talangas to oyow ogbayadbayad to mgo otow taman to lalimma no bulan. Di waro bogayi sikandan to oghimatoy to mgo otow. No ka igkabaybayari ran, ian nounawaan ka sikan no igkabaybayari to otow no ogkakagat to salipitsipit. 6 To sikan no lalimma no bulan, ogkoiniat ka mgo otow no ogkamatoy on porom, di kono ogpakatood no ogkamatoy su ogpamariu man kandan ka kamatayon.

7 No ka pogpitow ku to sikan no mgo talangas, no ogkoiling sikandan to mgo kuddo no nigpanagana to dakol no samuk. Woy duon mgo tangkulu no bulawan to mgo ulu ran. No ka mgo langlanguwan dan, ogkoiling to langlanguwan to mgo otow. 8 Ka bulbul dan, ogkoiling to bulbul to boi. No ka mgo ngipon dan, ogkoiling to ngipon to liun. 9 Woy duon putow no ig-atang to mgo sosolobon dan no ogkounawa to ongil. Ko oglayang sikandan, ka daging to mgo pakpak dan, ogkoiling to daging to mohon-ing no sakayan no kalisa no ogganuyon to mgo kuddo no og-agpas no pallaguy no ogtangko to usig dan dio to dakol no samuk.

10 Duon ikug to sikan no mgo talangas no ogkoiling to ikug to salipitsipit no ogkagat. No ka kabogbogan dan to oghisakitan ka mgo otow taman to lalimma no bulan, duon ian to sikan no mgo ikug dan. 11 Duon igbuyag dan no ogboboot kandan. Ian ka diwata no nigpulas to sikan no bitu no kono ogkatogkad ka karalomi rin. Ka ngaran din to kinagian to Hinibriu, si Abadun. No to kinagian to Ginirigu, si Apuliun. No to kanta no kinagian, Talag-ubus.

12 Napongaan on ka an-anayan no dakol no igkabaybayari to mgo otow. Di duon daruwa pad no dakol no igkabaybayari no ogdatong to mgo otow no waro indanan to impangotob to Magboboot duon to mgo bukod dan.

13 Nò, ka igkohon-om no diwata to Magboboot, nighiup din ka bungag no niggongonan din. Poghiup din, duon nigdinog ku no kagi no nigligkat dio to sikan no hop-at no sungguk to sikan no bulawan no tubaranan no duon to tangkaan to Magboboot. 14 No nigkagian din ka sikan no igkohon-om no diwata no duon bungag to, “Hokari nu ka imbanggut to sikan no hop-at no mgo diwata ni Satanas no nigbanggutan dio to dakol no woig no ogkohingaranan to Eupratis.” 15 Nò, nighokaran on ka sikan no hop-at no diwata oyow ogpanhimatayan ka igkatolu no baad to tibo no mgo otow to kalibutan. Ian su ligkat dongan, noindanan tahan sikandan to oyow sikan ian ka ogkohimu ko ogpokouma on ka sikan ian no uras, to sikan lagboy no allow woy to sikan ian no bulan, woy to sikan ian no tuid. 16 Nignangonan a to tibo no mgo sundalu ran no nigman-untud to mgo kuddo, 200,000,000.†200,000,000, ogkalituk to daruwa no gatus no malan no malan. 17 Ka pogpitow ku to mgo nigpanguddo, ogkoiling to soini. Duon mgo ig-atang dio to sosolobon to sikan no nigpanguddo. No ka batok to sikan, duon malalab no ogkoiling to hapuy, woy duon malugowlugow no ogkoiling to batok to mahal no batu no oghingaranan to sapiru, woy duon makaluwag no ogkoiling to asupri. Ka ulu to mgo kuddo, ogkoiling to ulu to liun. No duon hapuy, mgo obol woy asupri no oglibuwas to mgo bo-bo dan.‡Lahag ka pulbus to asupri di magalang woy masongot ka ngarog ko ogpakaamut to hapuy no ogpokouwang on. 18 Ligkat to sikan no hapuy woy ka mgo obol woy ka asupri no oglibuwas to bo-bo to mgo kuddo, ogkakamatoy on ka igkatatolu no baad to tibo no mgo otow no ogman-ugpo kai to tano. 19 Ian su ka kabogbogan to mgo kuddo to igpanghimatoy to mgo otow, ogligkat to mgo bo-bo dan woy to ikug dan, su dio to koopusan to mgo ikug dan, duon ulu no ogkoiling to ulod no ogpokohisakit to mgo otow.

20 Di ka mgo otow kai to tano no kono ogkamatoy to sikan no hapuy ko ka obol ko ka asupri, kono ogman-ongkod to pogsimba ran to sikan no mgo inotow-otow no nanhimu ran. Woy ogparagason dan nasi ka pogsimba ran to mgo busow woy to mgo inotow-otow no nanhimu ran no ogligkat to bulawan, woy ko plata, woy to burunsi, woy to batu, woy to kayu.§Ka plata, ogkoiling to bulawan di maputi woy kono amana no mahal. No ka sikan no nanhimu ran, kono ogpakakita woy kono ogpakarinog woy kono ogpokohipanow. 21 Woy songo kono dan og-ongkoran ka mgo maroot no batasan dan. Di ogparagason dan nasi to ogpamunu woy to ogpamulingan no ogsampit to mgo busow, woy to oghilabot to kono no asawa ran woy kono oghagtong to ogpanakow.