15
Ka mgo Diwata to Magboboot woy ka Mohuri no mgo Igkabaybayari
1 Pogkaponga to sikan, duon nigkita ku no dakol lagboy no kabolongbolonganan no dio to langit no igpohitaga ko nokoy ka ogdatong on uromo. Woy duon papitu no mgo diwata to Magboboot. Tag sagboka kandan, nig-alap to mgo igbayadbayad to mgo koot-otawan kai to kalibutan. Sikan ka mohuri no mgo igkabaybayari no igdagsang to Magboboot to igkabolu din.
2 Pogpitow ku man do no duon nigkita ku no ogkoiling to dagat no lamita no nasolugan on to hapuy. Woy nigkita kud ka mgo otow no nakaroog to sikan no magintalunan no nigligkat to dagat woy waro nigsimba to inotow-otow rin woy waro nigpapangotob to numiru no ig-indan to ngaran din. No ka sikan no mgo otow, dio mansasasindog to ilis to sikan no dagat no ogkoiling to lamita. Tag sagboka kandan, nig-alap to ogparagingon no oghingaranan to alpa no imbogoy to Magboboot kandan. 3 Nig-oopad sikandan to opparon ni Moisis no suguanon dongan to Magboboot woy ka opparon dod ni Hisus no oghingaranan to Nati no Karniru. No soini ka opparon dan:
“Magboboot, sikoykow ka Lagboy no Igbuyag no ian ka Mamabogbog to tibo. Maroyow lagboy woy igkabolongbolong noy ka tibo no nighimu nu. Ligkat dongan, sikoykow ka Labow no Datu to tibo no mgo ugpaan. No matuwarong woy malogot ka mgo hinimuan nu.
4 Lagboy no Igbuyag noy, ogkatahud ka woy ogkasayo ka to tibo no mgo otow su sikoykow ro ian ka waro solug no maroot dio to goinawa nu. Tibo no mgo koot-otawan no ogligkat to tibo no mgo ugpaan, ogpakatangko koykow woy ogpakasimba koykow. Ian su tibo kandan, ogpakakita to matuwarong ka mgo hinimuan nu.” Sikan ka in-opad dan.*Ogkabasa to Salmo 86:9.
5 Pogkaponga to sikan, nigkita ku no napulasan on ka Kinaroyawan no Sinabong to Dakol no Ampuanan no dio to langit. No dio to solod, duon ka ingkasulat no sabut to Magboboot. 6 No ka sikan no papitu no mgo diwata to Magboboot no nan-alap to sikan no papitu no mgo igbayadbayad, nanlibuwas dio to Dakol no Ampuanan to Magboboot. Nigkikinabo sikandan to malayag lagboy no manggad woy duon insagubabat no bulawan dio to mgo sosolobon dan. 7 Nò ka sagboka to sikan no hop-at no hinimu no duon goinawa, nigbogoy to sikan no papitu no diwata to Magboboot to papitu no boung no bulawan no naponu on to igkabolu to Magboboot no sikandin ka kono ogkamatoy to waro katamanan. 8 No ka Dakol no Ampuanan, nigsokol to obol no nigligkat to layag woy to kabogbogan to Magboboot. No waro agad hontow no makalopow dio to sikan no ampuanan taman to ogkapongaan on to pogdagsang to ka sikan no papitu no igkabaybayari no nan-alap to sikan no papitu no mgo diwata to Magboboot.†Ogkabasa to Exodo 40:34 woy 1 Hari 8:10.