1 Nò, pogpitow ku no duon diwata to Magboboot no nigpohulughulug ligkat to langit. Duon nig-alap din no susi to sikan no bitu no kono ogkatogkad ka karalomi rin. Woy songo duon nig-alap din no mabogat no karina. 2-3 No nigdakop din on ka dakol no ulod no ogkohingaranan to daragun. Sikandin si Satanas no ian igbuyag to mgo busow. No nigbanggutan to diwata ka sikan no ulod woy indogpak din dio to bitu no kono ogkatogkad ka karalomi rin. No niglokoban din woy nigsusian woy duon indanan to bo-bo to sikan no bitu oyow kono ogpakalibuwas woy kono ogkoubatan to ulod ka mgo otow taman to ogkapongaan on ka songo malan no tuid. Di pogkaponga to sikan, ogpalibuwason pad sikandin to magaan do.

4 Pogpitow ku no duon mgo otow no nigpinpinnuu dio to mgo pinnuuanan dan to pogboboot. Woy nigkita kud ka mgo gimukud to sikan no mgo otow no nanamporan to mgo liog dan su nigligkat to impamalogot dan ka in-anad ni Hisus woy su nignangonnangon sikandan to kinagian to Magboboot. No ka duma no ligkatan to pog-ogot kandan su waro dan simbaa ka sikan no magintalunan no nigligkat to dagat woy songo waro dan simbaa ka inotow-otow rin, woy su songo waro nigpapangotob to ngaran to sikan no magintalunan dio to mgo bukod dan woy ko dio to mgo bolad dan. No ogkouyag tibo sikandan woy ogbogayan sikandan to katondanan to ogbulig ki Hisu Kristu to pog-alap din to pandatuan din taman to sikan no songo malan no tuid.*Ogkabasa to Daniel 7:22. 5 Ka sikan no pogkouyagi ran, ian ka an-anayan no pogkouyagi to mgo nammatoy. Di ka duma no mgo nammatoy, woy on ogkouyag ko ogkataman on ka sikan no songo malan no tuid. 6 Ka sikan no mgo otow no ogpakalagkos to sikan no an-anayan no pogkouyag to mgo nammatoy, ogkapulusan woy ogkoindanan sikandan to waro igkoogot kandan kono ogpakalagkos to sikan no iglogpad no oghingaranan to igkararuwa no kamatayon dio to ogliabliab no hapuy no waro katamanan. Di ogkohimu on atag sikandan no mgo talagpanubad no ogsasindog to tangkaan to Magboboot woy ki Kristu. Woy ogbogayan sikandan to katondanan to ogbulig ki Kristu to pog-alap din to kandin no pandatuan to sikan no songo malan no tuid.

7 Ko ogkaligad on ka sikan no songo malan no tuid, ogpalibuwason on si Satanas ligkat to sikan no napirisuan din. 8 Woy oglogoblogobon din ka tibo no mgo ugpaan to kalibutan no oghingaranan to Gog woy Magog oyow ogkagawayan din ka mgo otow. No oglimuron din on sikandan oyow ogman-atu to Magboboot. Mohon-ing lagboy sikandan no ian ogkounawaan ka bayokbok to dagat.†Ogkabasa to Ezequiel 38:2 woy 9. 9 No ogtangkap sikandan kai to tano woy oglinglingotan dan ka dakol no lunsud no indakoli to Magboboot to goinawa no nig-ugpaan to mgo sakup din. Dokad di to ogkoulugan sikandan to hapuy no ogligkat to langit no ogkoubus sikandan no ogkamatoy.‡Ogkasabutan ta to ka sikan no dakol no lunsud, ian ka Hirusalim. 10 No si Satanas no niggawoy kandan, igdogpak sikandin dio to ogliabliab no hapuy to asupri no nigdogpakan to sikan no magintalunan no nigligkat to dagat woy ka talagnangon to kinagian din. No to allow woy to marusilom taman to waro katamanan ka igkabaybayari ran.

11 Nò, pogpitow ku no duon dakol woy maputi no pinnuuanan to pandatuan, woy duon on ogpinpinnuu to sikan. Nanaawo ka tano woy ka langit dio to tangkaan din, no konad on ogkitoon. 12-13 Woy nigkita kud ka mgo nammatoy; ka mabantug woy ka kono no mabantug, ka nigligkat to dagat woy ka nigligkat to tano woy ka tibo no mgo gimukud to mgo nammatoy no nokougpo to sikan no ugpaan to mgo nammatoy. No namansasindog sikandan tibo dio to tangkaan to sikan no pinnuuanan to pandatuan. Duon tahan no mgo nasulatan no pigbokad on. Woy duon ingkasulat ka tibo no mgo hinimuan to mgo otow no wa pad nammatoy. Woy duon dangob no pigbokad on. No ian ka nasulatan to mgo ngaran to sikan no ogkabogayan to kouyagan no waro katamanan. No ogkabobootan on sikandan tibo ko nokoy ka ingkasulat no mgo hinimuan dan. 14 Pogkaponga, ka mgo gimukud to mgo nammatoy no nigligkat to sikan no ugpaan to mgo nammatoy, igdogpak on dio to ogliabliab no hapuy. No sikan ka ogkohingaranan to igkararuwa no kamatayon. 15 Sikan ian, agad hontow no waro ikasulat ka mgo ngaran dan dio to sikan no sulatanan to ngaran to mgo otow no ogbogayan to kouyagan to waro katamanan, igdogpak on dio to sikan no ogliabliab no hapuy.