Sulat ni Pablo ki
Titu
Tongod to Soini no Sulat ki Titu
Si Titu, nigtuu on ki Hisus di kono no Hudiu. Talabulig si Titu ki Pablo to og-alap-alap to Maroyow no Nangnangonon tongod ki Hisu Kristu. Ka nigsulat ni Pablo to soini no sulat din ki Titu, dio si Titu to lunsud to Krita su nagalat sikandin dio oyow ogpakabulig sikandin to pogtuu to mgo otow no nigtuu ki Hisus.
To kabinunsuran to sulat, duon ignangon ni Pablo ki Titu ko hondoi longod no otow ka litos no ogkaalam no pogbuyagon to mgo otow no ogtuu ki Hisus su mohon-ing ka mgo otow dio to Krita no maroot so batasan dan. Igkaruwa, innangon ni Pablo ki Titu ko nokoy ka igpaanad din to mgo buyag no lukos, woy ka mgo buyag no boi, woy ka igpaanad din to mgo lukos no kono pad amana no buyag, woy ko nokoy ka igpaanad din to mgo uripon.
Ka Ignangon to Soini no Sulat
Ka kabinunsuran to ignangonnangon ni Titu 1:1-4
Ka oghimuon ni Titu dio to pulu to Krita 1:5-16
Ka matul-id no pog-anad 2:1-15
Ka batasan no litos no oghimuon to mgo nigtuu 3:1-11
Ka mohuri no Ignangon ni Pablo 3:12-15
1
1 Ka soini no sulat, nigligkat kanak no si Pablo. Uripon a to Magboboot woy suguanon a ni Kristu. Pigsugu a to oyow ogkohirosonan ka pogtuu to mgo otow no pig-abin to Magboboot no ogtuu kandin, woy to oyow ogkohirosonan ka katagaanan dan to pog-anad to tu-tuu ian no tinuuan ta. 2 No ligkat to sikan, ogpokoiman-iman ki to pogkouyag ta no waro katamanan dio to Magboboot. Sikandin, kono og-uubat, no ko waro pad ka soini no kalibutan, tahan din inangon to ogkabogayan kinow on to soini kouyagan no waro katamanan. 3 No ko natuman on ka allow no nig-indanan to Magboboot dongan, impohitaga rin on kanta to sikan no kinagian din. No ka Magboboot no ian Talagpangabang kanta, pigsaligan a rin woy nigsugu a rin to oyow ogpakanangonnangon a to sikan no kinagian.
4 Ogsulatan ku sikoykow, Titu no ogkounawa ka to tu-tuu ka ian no anak ku to pogtuu tanow. No ogbuyu a to oyow ogkohoy-uan ka to Magboboot no Amoy tanow woy si Hisu Kristu no ian Talagpangabang kanta. Woy songo ogbuyu a ran to oyow ogbogayan ka to maawang no goinawa nu.
Ka Talabau ni Titu dio to Ugpaan to Krita
5 Ian to niggalat ku sikoykow dio to Krita su oyow oghipongaan nud ka talabau ku no wa pad mapongoi, woy to oyow dio to agad hondoi no ugpaan no duon mgo otow no nigtuu ki Hisus, ogkaalam nud on ka mgo otow no ogkohimu on no pogbuyagon kandan. No ko og-alamon nud ka mgo pogbuyagon, kono nu kalingawi ka tahan no innangon ku koykow, 6 to ian nu ro oghimuon no pogbuyagon, ka lukos no waro maroot no batasan din, woy og-awoson to sagboka ro ka asawa rin, woy to ogtuu on ka mgo anak din woy to kono no maroot so mgo batasan dan, woy og-awoson to ogpaagad-agad sikandan to amoy ran. 7 Ian to og-awoson to og-alamon no pogbuyagon ka otow no waro maroot no batasan din su ogkasaligan sikandin to Magboboot to og-alap to mgo otow no ogtuu on kandin. No og-awoson to kono ogparakoldakol woy kono ogmagaan ogkabolu woy kono oglasinglasing woy kono no ogmabulut woy og-awoson to kono oggolgol to layun do no salapi. 8 Di og-awoson to ogsagmanon din ka mgo magaliug din woy to ogkoiniatan din no ogbulig to duma no mgo otow woy to oyow maroyow ka goinawa rin. Woy og-awoson to oghimuon din ka maroyow ro woy og-unug ka goinawa rin to Magboboot, woy to ogponoron din ka koiniatan to lawa rin no kono no litos. 9 Songo og-awoson to oggogongonan din ka tu-tuu ian no tinuuan no in-anad noy tongod ki Hisus su oyow ka sikan no pogbuyagon, ogkaayun to og-os-osonon din ka mgo otow ligkat to sikan no tu-tuu ian no tinuuan woy to oyow ogpakatabak sikandin to mgo otow no og-atu to soini no tu-tuu ian no tinuuan oyow ogpakasabut sikandan to sayop dan.
10 Ian ku ignangon ka soini su mohon-ing ka mgo otow no kono ogpaagad-agad to sikan no in-anad kandan. Di to mgo otow no oghonduon, mohon-ing pad ka mgo Hudiu no ogkoiling. Waro pulus to ig-anad dan woy ogkoubatan dan ka mgo otow.* Duon mgo Hudiu no nigtuu ki Hisus di ognangonan dan ka mgo otow no ogtuu no kono no Hudiu to woy ro ogkohimu sikandan no ogpasakup to Magboboot ko ogtuman sikandan to Balaod no inggalat ni Moisis dongan no in-udling din lagboy to mgo Hudiu. 11 Og-awoson ta to ogpahagtongon ta sikandan to ig-anad-anad dan su maroot ka tuud dan, su ian do tuud dan to ig-anad to kono no litos su igpanalapi dan poron. No kuntoon, duon on mgo otow no ogpakasuwoy on no songo ogpakalagkos on ka alunggun dan woy ka mgo anak dan. 12 Duon Titu, innangon to songo otow no lagsoban no karumaan dan no taga Krita no nigkagi nokani to, “Ubaton ka mgo taga Krita woy mabulut. Pogulon sikandan di tungulon.” 13 Tu-tuu ian ka kagi rin. Sikan ian, baghota nu to pogsapad kandan to waro pog-ulung-ulung oyow ogkabogayan sikandan to litos no ogmatul-id on ka pogtuu ran, 14 woy to oyow konad on ogpamminog sikandan to mgo tigbal do no nangnangonon tongod to minuna to mgo Hudiu woy ka igsugu to mgo otow no ogligal to tu-tuu ian no ingkaanad. 15 Ian su, to mgo otow no waro maroot no tagu to goinawa ran, tibo maroyow kandan ka inhimu to Magboboot. Di to mgo otow no duon maroot no nakatagu to goinawa ran woy waro mogtuu, kono ogmaawang ka kandan no goinawa to agad nokoy su maroot ka goinawa ran woy ka ogkaroromdom dan. 16 No ignangon dan to nigtuu on sikandan to Magboboot, dokad di ligkat to mgo hinimuan dan no maroot, ogkounawa to ogligalon dan sikandin. Dorooti sikandan no kono ogpaagad-agad to insugu kandan. Sikan ian to kono no litos no ogkasaligan sikandan to oghimu to agad nokoy no maroyow no oghimuon.
*1:10 Duon mgo Hudiu no nigtuu ki Hisus di ognangonan dan ka mgo otow no ogtuu no kono no Hudiu to woy ro ogkohimu sikandan no ogpasakup to Magboboot ko ogtuman sikandan to Balaod no inggalat ni Moisis dongan no in-udling din lagboy to mgo Hudiu.