1 Paroromdoma nu ka mgo otow no nigtuu oyow ogpaagad-agad sikandan to mgo igbuyag dan, woy ka mgo otow no duon katondanan to og-alap kandan. Og-awoson dan to ogpaagad-agad kandan no ogkapanoy ka goinawa ran to oyow oghimuon dan ka agad nokoy no maroyow no igkasugu kandan. 2 Nangoni nu ka mgo otow to oyow kono dan ogdoot to agad hontow. Og-awoson to kono dan magaan ogpaap-apuloy. Woy og-awoson to mohoyhoy-uon sikandan woy to oyow ogmolungangon to tibo no mgo otow, 3 Ian su sikanta nokani no waro ki pad nigtuu, naangol-angol ki pad no niglop-ang ki to Balaod to Magboboot su waro ki pad makabatuk to matul-id no dalan. Nohimu kinow pad no uripon su nabootan ki pad to agad nokoy no maroot no batasan no ogkoibogan ta woy to mgo igkarago ta. No ka tibo no allow ta, ungod ta naroromdom ko nokoy no maroot ka oghimuon ta to duma no mgo otow woy ungod ta noimaima to mgo duma ta. Maroot so goinawa ta to mgo otow woy songo maroot ka goinawa ran kanta. 4 Di, ka Magboboot no ian talagpangabang kanta, ko nokouma on ka allow no ipakita rin ka igbulig din woy ka igkohoy-u rin, 5 nigpangabang kanta. Di ka pogpangabang din, waro nigligkat to batasan ta ko maroyow, di nigligkat atag to pogkohoy-u rin kanta. Ian su ligkat to inhimu to Gimukud din, nig-awoon din on duon to goinawa ta ka tibo no maroot, no nigbogayan kinow on to iam no kouyagan ta.

6 Woy ligkat to nighimu ni Hisu Kristu no ian Talagpangabang kanta, lagboy impasolod to Magboboot ka Gimukud din kai to kanta, 7 su oyow ligkat to pogkohoy-u ni Hisu Kristu kanta, ogkohimu kinow on no maroyow dio to tangkaan to Magboboot, no ogkapurut ta ka kouyagan ta no waro katamanan no og-im-imanan ta no inggalat ni Hisus kanta.

8 Tu-tuu ian ka soini no innangon ku kaniu. No ogkoiniatan ku no igbaghot nu ka sikan woy ig-anad nu to oyow ka mgo otow no nigtuu to Magboboot, ian dan ogtuuron ka ogpanhimu to maroyow.

Maroyow ka soini no ingkaanad ku kaniu, woy ian ka duon pulus to mgo otow. 9 Di ko duon mgo otow no ogkaangol-angol no ogpaap-apuloy tongod to mgo ingkasulat no mgo ngaran to mgo kaap-apuan dan, woy ko ogpaap-apuloy tongod to Balaod no inggalat ni Moisis, kono ka og-amut to sikan su waro pulus. 10 Ko duon duma now no ogpasuwoy to duma no mgo otow no ogtuu ki Hisus, sapari nu sikandin oyow ogpakahagtong on. Ko kono ogpamminog, hutuka nu to igkarangob no pogsapad. Di ko kono pad man do ogpamminog, ogluwat kow on kandin to ogduma, 11 su nataga ki to nigsuwoy on sikandin woy to makasasalo on ka sikan no otow su agad to nataga rin to kono no litos ka oghimuon din, ogparagason din do duon.

12 Ogsuguon ku si Artimas woy ko si Tikiku dio to koykow. No ko ogdatong on, ol-olog ka no magaan ka ro hondii kanak to lunsud to Nikapolis su tuud ku ko dio a og-ugpo ko tig-uran. 13 Ko oghipanow on ka abogaru no si Sinas woy si Apulus, buligi nu sikandan oyow waro ogkaawos dan ko diad on to dalan. 14 Og-anaron ta ka mgo otow no ogtuu to, og-awoson ta to kono ki oghimu to waro pulus di ogpoomotan ta no oghimu to maroyow oyow ogkabuligan ta ka mgo otow no og-awoson lagboy to duon ogbulig kandan. 15 Ka tibo no mgo duma ku kai, ogpanangon koykow to igparoromdom dan koykow. Woy songo igpanangon noy rod ka igparoromdom noy to duma no mgo otow no nigtuu on ki Hisus no duon goinawa ran kanami su ligkat to pogtuu ta.

Ogbuyu a to oyow ogkohoy-uan kow tibo to Magboboot.