4
Ugamhi na iloghie
Abi mhi rọ mẹ ena dọsẹ se, mhi ke gbo mẹ imekẹ olese. Mhi mẹ khi odẹ o khueghie-a shi iloghie, mhi suọ khi uruli ni o kpẹ nu mẹ mhẹ ngme abi akala. Ọọ mhẹ, “Bhale odane ana, khi mhi ya rẹ khasẹ emini a ya mẹ ini ena e dọsẹ sẹ.” Utoghuo kpe mhi la elemhi Ayẹmhẹ, mhi mẹ odalo oyẹmhẹ khi ukpẹkhomhi o migha iloghie, khi ọgbọ ọ shitọ nga ọ. Ọni ọ shitọ ọ, ọ li abi ẹchẹ ni ọọ gẹ ni a lu ijasipa ali ikanẹliani. Ogaji ni o li abi ẹchẹ ughegbe ni a lu ẹmẹradi o vi gasẹ oni ukpẹkhomhi.* Li zẹ Ezik 1.26-28; 10.1 Ikpẹkhomhi uye ali ene elese e la gasẹ oni ukpẹkhomhi. Egbhali uye ọgbọ ali aane e shitọ eni ikpẹkhomhi. E sọ itsua epfopfo, e rughu irula oghie igolu shi ukhomhi. Rọte oni ukpẹkhomhi oghie, inyamhisalo amẹ ali ingmolo oyi akphala e te ọ ọ lasele. Rọte oni ukpẹkhomhi oghie ikpa ishilua e lala ni e khi Ayẹmhẹ ishilua eyi Ẹshinẹgba. Li zẹ Okiali 19.16; Irọ 8.5; 11.19; 16.18; Ezik 1.13; Irọ 1.4; iZaka 4.2 Ali khi oni ukpẹkhomhi khi emini o li abi okẹ ighegbe oniẹmhi o la odalo ọli ni o pfuasẹ ni a te ẹ mẹ ekẹ gboo.
Elamhakọ aane ni e mhuẹ ayẹmhẹ ni e zẹ alo gasẹ egbe odalo ali ukhokho, e le gasẹ oni ukpẹkhomhi oghie rọli shi iteva. Emini ọ mhuẹ ayẹmhẹ ọnododẹ ọ li abi idu, ọnuzava ọ li abi ẹna, ọnuzasẹ ọ zẹ alo abi ọgbọ, ọnuzi-aane o li abi ākpā ọ̄degbe ni ọọ fiala. Li zẹ Ezik 1.22,5-10; 10.14 Eni elamhakọ aane ena e mhọli ipfua esesa esesa, e mhọli ikpamhi alo gasẹ idiegbe, li ghe elemhi ipfua eyẹwẹ, Ẹlẹ ọguota ali ẹlẹ iyọsẹ ẹa tigbe ẹ yẹmhẹ-a, eri e lẹsẹ liẹ,
“Ipfuasẹ, ipfuasẹ, ipfuasẹ
khi Ẹshinẹgba Ọnọmhuẹ
Nọfunẹ nya,
Ọni ọ khi lọli,
ni ọ kie kpẹ khi lọli,
ali ni ọ ya bhale.”§ Li zẹ Ezik 1.18; 10.12; Aza 6.2-3
Ini eni elamhakọ aane eghọ e da ri ufumhi ali ekpẹ ali ikphẹmhi na ọni ọ shitọ oni ukpẹkhomhi oghie ne, ni ọ laọ a lẹ ẹlẹ na agbọagbọ, 10 eni egbhali uye ọgbọ ali aane eghọ, e de ya yẹshi na ọni ọ shitọ oni ukpẹkhomhi, e ri kphẹmhi na ọni laọ a lẹ ẹlẹ na agbọagbọ. E gueghie irula eghiele eyẹwẹ shi ekẹ odalo oni ukpẹkhomhi oghie, ẹẹ liẹ.
11 “U tẹọ Ọnọmhuẹ ali
Ẹshinẹgba ọyanye,
Ni ọ mie ufumhi
ali ekpẹ ali ekpabọ,
Irari khi yẹyẹ u ma emhikpa.
Ọghuẹmhẹ oyẹ u rọ ma wẹ,
lọli e gbo rọ laọ abi a li ma wẹ.”

*4:3 Li zẹ Ezik 1.26-28; 10.1

4:5 Li zẹ Okiali 19.16; Irọ 8.5; 11.19; 16.18; Ezik 1.13; Irọ 1.4; iZaka 4.2

4:7 Li zẹ Ezik 1.22,5-10; 10.14

§4:8 Li zẹ Ezik 1.18; 10.12; Aza 6.2-3