19
Okuekhoogo!
Onana o dọsẹ se, mhi suọ uruli ni o li abi okeke oniẹmhi oyi ebubu ẹgbọ obini iloghie khi oo tsẹsẹ, oo liẹ,
“Okuekhoogo,
Imiepfuese ali ufumhi
ali ekpabọ khi
eyi Ẹshinẹgba ọyawa.
Irari khi iguẹzọ oyọli
eyi igẹsikia ali
eni e sheshe e khi.
Ọ she pfa ẹzọ mu
adegbe ọnọfunẹ,
ọni ọ she ri okia eyọli
yese ekẹ agbọ-a.
Ẹshinẹgba ọ she ye okhọli
to ọlia eyi eni ẹẹ ga eyọli.”* Li zẹ iDẹut 32.43; 2 Ighie 9.7
Ighọ e gbo tsẹsẹ, e liẹ,
“Okuekhoogo!
Ewọli eyọli e she ẹ nga
idane agbọagbọ.” Li zẹ Aza 34.10
Ighọ egbhali uye ali aane ali elamhakọ aane, e de yẹshi, e ga Ẹshinẹgba ni ọ shitọ oni ukpẹkhomhi oghie, e liẹ,
“Atsẹ! Okuekhoogo!”
Uruli o rọte oni ukpẹkhomhi oghie ngme ọọ liẹ,
“A kuẹghiẹ
Ẹshinẹgba ọyawa,
ẹẹ ni ẹẹ ga eyọli nya,
ẹẹ ni a na ulishi oyọli,
ghe ẹgbọ ni e fu
ali eni e shẹ!” Li zẹ Iwolo 115.13
Ighọ mhi suọ uruli ni o li abi uruli oniẹmhi oyi ebubu ẹgbọ ni o li abi ingmolo oyi okẹ ni ọọ tu, ni o gbo li abi ingmolo oyi akphala. Ee liẹ,
“Okuekhoogo!
Irari khi Ẹshinẹgba
Ọnọmhuẹ oyawa Nọfunẹ nya,
lọli ọ le oghie!§ Li zẹ Ezik 1.24; Iwolo 93.1; 97.1; 99.1
Awa ke ghẹlẹ,
egbe ke mu awa,
awa ri ufumhi nali!
Irari khi izu-ode oyi
ọni Omi Osumha
o she ramhi,
ọmueshi ọ she mu egbe shi ekẹ.
Ode opfopfo
ni o dala ni o pfuasẹ,
a rọ nali sọ.”
(Oni Ode opfopfo, iguẹ ngeli oyi eni a pfa na o migha shi.)
Ọni agẹni ọọ mhẹ, “Kẹkẹ khi. ‘Ikhivọsẹ o khi na ẹgbọ ni a lu shi oni ukue aruele oyi izu-ode oyi ọni Omi Osumha.’ ” Ọ gbolo ẹ mhẹ, “Ingmemhi enana, egbegbi ingmemhi eyi Ẹshinẹgba e khi.”* Li zẹ iMat 22.2-3
10 Ighọ mhi de ya wugha li awẹ ni mhi ga li. Ama ọọ mhẹ, “Khi li ghọ! Ọni ọọ ga nabi yẹyẹ ali ọnabi inyọghuo ẹ enekpọle mhi khi ni e mu ọtsẹlẹ oyi iJesu mhuẹ. Ga Ẹshinẹgba! Irari khi ọtsẹlẹ oyi iJesu o khi ayẹmhẹ imekẹguele.”
Ọni ọ nga achi ọpfopfo
11 Ighọ mhi mẹ khi iloghie o khueghie-a mhi mẹ achi ọpfopfo. Ọni ọ nga li a lu ọzẹ-regbenga ali ọni ọ khi igẹsikia. Odẹ ni ọa mhuẹ azẹba ọ te ẹ sọ ẹzọ, ni ọ te ẹ khọli. Li zẹ Ezik 1.1; Iwolo 96.13; Aza 11.4 12 Ikpamhi alo eyọli e li abi ẹlẹmhi erẹ. Ọ rughu irula oghie ni e bu. Ọ mhọli eva ni a kẹkẹ shi ọli egbe ni ọgbọ ọlese ọa lẹsẹ, se ni lọli ghuo kpele. Li zẹ iDan 10.6 13 Ọ sọ awulu ni a sọ ọlia. Eva ni a lu ọli khi, “Ungmemhi oyi Ẹshinẹgba.” 14 Ekhọli-okhuẹ ni e la iloghie e deba li kia, e sọnọ itsua epfopfo ni e dala ni e pfuasẹ, e nga ichi epfopfo. 15 Itakobi ni ọọ mu o rọte unu oyọli lasele, ni ọ rọ ya khọli eni ishishi. Ọtsuọdu akhuli ọ rọ ya ke mhẹsẹ na eni ishishi. Ọ ya rọte ashini a te ẹ mino-onyọ mino onyọ lasele, Ikhi onyọ no khi ofu oniẹmhi oyi Ẹshinẹgba Nọfunẹ nya.§ Li zẹ Iwolo 2.9; Aza 63.3; iJọẹ 3.13; Irọ 14.20 16 A kẹkẹ eva, “Oghie Ni ọ Mhọli Ighie, Ali Ọnọmhuẹ Ni ọ Mhọli Ekhẹmhuẹ,” shi awulu na dogo oyọli ali ukhiowẹ oyọli. 17 Ighọ mhi mẹ agẹni khi ọ migha ovọ, ni ọ viẹ lasele leghe lui ipfeli ni e la irarogbe ẹ fiala, “A bhale a ka legba shi aruele ogbọmhi oniẹmhi oyi Ẹshinẹgba. 18 Ẹghẹghẹ aghọ ni a le elamhi idiegbe oyi ighie ali ega ekhọli-okhuẹ ni e ri ekhọli-okhuẹ ẹ ye okhuẹ, ali elamhi idiegbe eyi ẹgbọ nefunẹ, shi elamhi ichi ali eni e nga wẹ, ali elamhi idiegbe ẹgbọ nya, shi ighumha ali eni ẹa khi ighumha ghe ẹgbọ enikeke ali ẹgbọ eniẹmhi.”* Li zẹ Ezik 39.17-20
19 Ighọ mhi mẹ ọni inyagbemhi ali ighie na ekẹ agbọ ali ekhọli-okhuẹ eyọli khi e lona kugbe, ni e rọ nu ọni ọ nga ọni achi ali ekhọli-okhuẹ eyọli khọli. 20 Ama a mu ọni inyagbemhi ma ọmekẹguele ọyi ẹgbhọli ọyọli, ọni ọ ri eva oyọli gbe irọkhasẹ ọnyaloa. Eni irọkhasẹ ena ọ rọ di ẹgbọ ni e mie eni ọlẹlẹ eyi ọni inyagbemhi shi egbe, ni e ga irọkhọkhọ oyọli ni a khali. Ọni inyagbemhi ali ọni ọmekẹguele ọyi ẹgbhọli, a mu wẹ pfilo uyele erali ni ofulu o la to kua yala. Li zẹ Irọ 13.1-18 21 Eni e kpọle, a ri itakobi oni o rọte unu oyi ọni ọ nga ọni achi gbolo wẹ-a. Eni ipfeli nya e ri elamhi idiegbe eyẹwẹ le.

*19:2 Li zẹ iDẹut 32.43; 2 Ighie 9.7

19:3 Li zẹ Aza 34.10

19:5 Li zẹ Iwolo 115.13

§19:6 Li zẹ Ezik 1.24; Iwolo 93.1; 97.1; 99.1

*19:9 Li zẹ iMat 22.2-3

19:11 Li zẹ Ezik 1.1; Iwolo 96.13; Aza 11.4

19:12 Li zẹ iDan 10.6

§19:15 Li zẹ Iwolo 2.9; Aza 63.3; iJọẹ 3.13; Irọ 14.20

*19:18 Li zẹ Ezik 39.17-20

19:20 Li zẹ Irọ 13.1-18