17
Elaija iwona da kapoe inatubugha
1 Peroveta tana kana waghawagha Elaija,*Hibru yadi gamoma waghawagha Elaija yana basuna Yawe na God. bi yana kwanatu na Tisbi, Giliyed kubura kamone, inagho kiiwawo Aheb biidi bi iwoneni bo, “Wiisuwona, Isrel kana God, Yawe na Makewaghawaghasina bi tagu na yana wiitamariyana. Bi kana waghawaghae tagu awonawona da geamra†Kenen damdi yadi God Baal siyitumaghaneni da touna amra iyibadeni, taraghaniye na yadi god kana waghawagha Mot, yana basuna “rabobo,” Baal yakasunuyi. Bi raghanina Baal yayawa magha na rubana kubura rarima inaveremayeni. Elaija, na Baal iyiaviyeni iyawonawona da touna “God Makamakewaghasina” yabagibagiyeni bi God na amra da kate rabobo yibadeni. bo youra sinayowogha, mmkodi bodu sapiipiikana kamodiye patana da gamogu anatore na wasina.”
Metagha na naboni itubugha. Da raghani gurina nama amra gegha, na getana awaki da wawaya siyakam.
Kwabura, Jerepet meyagiine
8 Wasina bi Yawe God, Elaija iwoneni bo, 9 “Kunagho da Jerepet meyagiine‡God, Elaija ivipora inagho Saidon kubure meme wawaya parapa Baal siyakabekabepepina. Mmkona Aheb rawananaki tomoyina Eetbaal yana kubura, bi mmko raghanine, na Elaija, Aheb gwabinama iyakowokowogha. kunamakae, Saidon kwanatuna ririne. Name na kwabura tana awoneni da tam inikanim.”
10 Na Elaija inagho Jerepetma. Bi raghanina iverakanibu meyagii matamketane, na kwabura tana ikita kiiraberabega iyatoghutoghura, na ivitarakiiyaneni bo, “Rubana bo gegha da rarima gisina kiyabu kamone kuyakawari kuyapiika da ayaniuna?” 11 Bi wasikena itouya iyanono rarima kabina biidi, na ikwatukwavini bo, “Bi kate bred viya teya kuyouna da anakam.”
12 Bi wasikena iwona bo, “Yawe yam God makewaghawaghasina kana waghawaghae awonawona da wiisuwona tagu getana da bred gwabiguve. Tagu gwabiguve na parawa yoghoyoghona kaboma kamone da kate oliv oil kabikabiwiitaghoma gisina kamone. Tagu kiiraberabega atoghutoghura bi anakawara anaveramagha bareye da awaki pinimina gwabiguve na anakabununayi, natugu teya kiiravimiiye da kanakam, bi muriye na vitonana inirabobomii.”
13-14 Bi gegha Elaija, wasikena iwoneni bo, “Gekuninuwapoyana! Yawe, Isrel kana God iwona da, ‘Parawa da oliv oil na nonowa yami kabikabiwiitaghoma kamodiye sinamakamake patana da Yawe amra inipora na pei sinagogo maghana raghanine.’ Na kunagho da metagha kuvisisiya na naboni kubera, bi dagudagune na bred gisina kiiraviguve kugabuni da kawari piika. Bi muriye na kabiwiiririyina kabununayi, tam bi natum teya kiiravimiye.”
15 Wasikena inagho da metagha Elaija iwoneni na naboni ibera, na Elaija da kwabura bi yana rakaraka yawata gabudara patepatena na kam siyakamkam. 16 Bi metagha Yawe God ivisuwona, na naboni da Elaija metagha ivisisiya na nunune, da parawa kabomina geiyakovi bi oliv oil kabikabiwiitaghome geiyamamana.
17 Raghani viya sikovi murine, na noko kwaburina iiyabo bare rapene, na natuna igubaga. Kanagubaga iragata kamokamogha da tughurine na irabobo. 18 Wasina bi wasikena, Elaija iwoneni bo, “Tam na God yana peroveta, awaki kiiravine na naboni kubera tagu biidi? Bo mabo kupiika yagu tamumu§Noko raghanine wawaya siyitumaghana da gubaga da rabobo na God yana aro, tamumu kiiravine. Kwabura iyitumaghana da Elaija yana bareye iyamakamake bi ibera da God matane na touna biidi itore da yana tamumu ikita, noko biidi iberana natuna tomogha gisigisi irabobo. wiiyevevegu kiiravine da natugu kasunuyina biidi?”
19 Bi Elaija iwona bo, “Natum kuveregu.” Na tomogha gisigisina sinananaki imane bi ikabaro, da teteboruborugha ikawari igae da tupayaragha meme touna iyamakamake, na name yana kenakena debane ivikeneni. 20 Bi Yawe God biidi irupari iwona bo, “Oo Yawe yagu God, awaki kiiravine nuwapoya ghamana mmko kwaburina kuvereni? Touna iviwaghasinegu da yana bareye amakamake, bi kata natuna kubera da irabobo!” 21 Wasina bi Elaija iroroni da raghani aroba tomogha gisigisi debane bi irupari Yawe God biidi iwona bo, “Oo Yawe yagu God, mmko tomogha gisigisina yana yawa kuveremayeni!” 22 Yawe God, Elaija yana pari iwaiyaneni, na tomogha gisigisi yawiina tavenina idagumayeni da iyawamagha.
23 Wasina bi Elaija, tomogha gisigisina irubevi bi ikawari iyowogha tupayaragha ghamane. Da sinananaki iviruvereni bi iwona bo, “Kita, natum iyawamagha!”
24 Wasina bi wasikena, Elaija iwoneni bo, “Kata akovi da tam na God yana peroveta, bi Yawe God gamona tam kawamma sakanikanibu na wiisuwona.”
*17:1: Hibru yadi gamoma waghawagha Elaija yana basuna Yawe na God.
†17:1: Kenen damdi yadi God Baal siyitumaghaneni da touna amra iyibadeni, taraghaniye na yadi god kana waghawagha Mot, yana basuna “rabobo,” Baal yakasunuyi. Bi raghanina Baal yayawa magha na rubana kubura rarima inaveremayeni. Elaija, na Baal iyiaviyeni iyawonawona da touna “God Makamakewaghasina” yabagibagiyeni bi God na amra da kate rabobo yibadeni.
‡17:9: God, Elaija ivipora inagho Saidon kubure meme wawaya parapa Baal siyakabekabepepina. Mmkona Aheb rawananaki tomoyina Eetbaal yana kubura, bi mmko raghanine, na Elaija, Aheb gwabinama iyakowokowogha.
§17:18: Noko raghanine wawaya siyitumaghana da gubaga da rabobo na God yana aro, tamumu kiiravine. Kwabura iyitumaghana da Elaija yana bareye iyamakamake bi ibera da God matane na touna biidi itore da yana tamumu ikita, noko biidi iberana natuna tomogha gisigisi irabobo.