15
Mosis kana ayi
1 Wasina bi Mosis da Isrel damdi Yawe God biidi mmko ayinama sikabepepa, mma naboni sitawora,
“Tagu, Yawe God anakabepepi,
basuna kana aviya parapa igeiwayidi;
bi hosi da seriyot ere aviya badadi
yegiiye ivitavenayowoyedi.
2 Yawe God na kagu wiiwiita maragasina na
ayima anakabepepi;
touna iviyawiigu.
Touna na yagu God na anakabepepi,
bi tamagunaki yana God na anakabikuwayeni.
3 Kana waghawagha na Yawe God
bi touna wiiyogha tomoyina.
4 Ijipt kana kiiwawo yana seriyot da iyo tomotomogha
yegiiye ivitavenayowoyedi;
bi kiiwawo yana babada miisedi
Yegii Idurine iviniudonadi.
5 Bi rarima wautapudi isowodi;
na sinibuka siyowogha sinagho
yegii dibune ware akima.
6 Oo Yawe God, katiiyam na ivimaragata kirakii;
bi yam maragatama na aviya damdi kuvitugaogaoworidi.
7 Tam wiisuwona kugekirakii na
noko biidi kam aviya kugeiwayidi.
Yam nuwapughu kuvikanibuveni na
iviberodi ware keyama rei iyakarakarasina naboni.
8 Yawiimma yegii kuveni na
rarima ivitaghotaghoma mayeni,
bi yabarata simiirikikita ware papa;
bi rarima wautapudi yegii nuwanuwane na sikakokako.
9 Bi aviya damdi siwona bo, ‘Kanaverakwavinidi,
da kana kabitawanidi,
yadi moura tupadi kanayouna
bi kate awaki kakayokayowana na kanayouna,
yama seri kanatayina kanikanibuwana da kanunugha.’
10 Bi gegha da, yawiimma yegii kuvenatatabi
na isowomumudi;
da yabarata maragasidi kamodiye
sinibuka ware akima vitadi.
11 Yawe God, god tana meme tam naboni bo? Gegha!
Tam wiisuwona kabikabikuwayim,
yam maragata iragata na kanaghanagharem,
bi berakayowiiwiiyaka kwaberabera!
12 Tam katiiyam kukoghasi ikanibu,
na kubura kawana itatari da kam aviya ivitonanidi.
13 Yam nuwayuyuna nuwakayowaninama, kuvisuwona na naboni da,
yam wawaya kuvinaghovemii,
toumii kama aviya gwabidima kuviyawiimiina.
Tam yam maragatama kuvinaghovemii tanagho
gawara kabikabikuwayine meme kwamakamakena.
14 Dam mududi awaki kuberana sisiyidi siwaiyana na naghara ikabidi.
Pilistiya damdi naghara ghamana ivibonuvidi;
15 Idom kubura kana dogadogara sinaghara kirakii;
bi Moab kubura kana babada ghamaghamadi
sinaghara na siyakirokiroro;
bi Kenen damdi tupadi yadi noghota ibeku da gesiyimaragatana.
16 Naghara ghamanakina tupadi debadiye ibeku.
Oo Yawe God, yam maragata ghamana sikita
na simiiri waghata ware akima,
patana da toumii yam wawaya
kapepewa da kaveratupiiredi,
nokodi wawaya wiibaguranama kugimona mayemiina.
17 Yawe God, tam kunakabirughuvedi
da koya rapemve debane sinamake,
meko gawarina kuvineyi da kunamakena,
gawara kabikabikuwayina touna imamma kuberana.
18 Yawe God na inikiiwawo waghata.”
19 Isrel damdi yegii sirughuwoneni tanawa kanakananagha sipepewa. Bi raghanine Ijipt kana kiiwawo yana hosi da seriyot bi kate seriyot kadi babada yegii kamone siyowogha, na Yawe God rarima ikabiwiiveramayi da tupadi isowomumudi.
Miriyam kana ayi
20 Eron toghanaru Miriyam na peroveta wasikena tana. Bi inawa gisina ikabi bi wasiwasike mududi yawata sikanibu da inavidi gisigisidi siyarourouwa bi siyarikuriku.
21 Miriyam mma naboni itawora,
“Yawe God ayima tanakabepepi,
kiiravine kana aviya parapa igeiwayidi,
basuna hosi da seriyot ere aviya badadi
yegiiye ivitavenayowoyedi.”
Rarima berona imiise magha
22 Wasina bi Mosis, Isrel damdi ivinaghovedi da Yegii Idurina sikuyoveni bi sinagho sirughu Sur mayabine. Bi gabudara aroba mayabe sipepewa bi getana rarima siyabananina. 23 Bi raghanina sipiika Mara kubure na rarima sibanani, bi damina na ibero kirakii na gerubana siyaniuni (Noko biidi gawarina sikwatuveni Mara).*Hibru yadi gamoma mara yana basuna tomatoma.
24 Na wawaya Mosis biidi siyagwinigwini, siyawonawona bo, “Katana awaki tananiuna?”
25 Na Mosis wiiwiita kiiravine irupari Yawe God biidi na kii raghana gisina iviyeveveni. Raghanina Mosis kiina raghana ivitavenayowoyeni rarima kamone, na rarimina iwaratete ninina kiiravine.
Noko gawarine Yawe God wawaya yadi makamake siradi iveredi, bi iruyaghadi da iyakita memeda siyakabisisireni bo gegha. 26 Na iwona bo, “Memeda yagu sisiya konawaiyana wiimasi bi yagu noghota miisedi konakivina da yagu gwara konakabisisiredi, na gubagidi mayimayiyidi gegha anaveremina ware Ijipt damdi averedina. Tagu na Yawe God, iiyabo yaberami da koyawa.”
27 Muriye na sipiika Elim kubure. Noko gawarine na wusira yadi 12 bi kate notuveya kiidi yadi 70. Bi nama rarima ririne sivitaki.