40
Redu kana verevereyana da kam kadi gabugabuna
1 Raghani viya murine, na Pero*Ijipt damdi yadi kiiwawo sakwatuveni Pero. Mmkona gegha kana waghawagha waghatana. Sikabigubawosi. yana redu verevereyana badana†Mmko tomoyina yana bagibagi na kiiwawo kana rarima da kam inakaratowogha yaininagha da gegha wawaya, kiiwawo tuwamorobama sinaburavina, muriye na kiiwawo inavereni inaniuna. da kam gabugabuna badana bera berodi mududi sibera yadi kiiwawo biidi. 2 Na nuwanuwana ipughu nokodi yana bagibagi damdi bata biiyadi, 3 da biwa gawarina, bare kana koyakoyagha kadi bada yana bareye sitorerughuvedi, gawarina tanagha meme Jousep sitorena. 4 Bi biwa gawarine simake raghani iguri, na koyakoyagha kadi bada, Jousep irupoyedi da yadi wiitamariyana. Bi biwa gawarina kamone siyamakamake. 5 Da nubabasu tana tomotomoyidi bata - redu verevereyana badana da kam gabugabuna badana simimeu, bi yadi mimeu na basudi bogaebogae.
6 Didibare raghanina Jousep ipiika toudi biidi na ikitadi da siyinuwabero. 7 Na ivitarakiiyanedi bo, “Awaki kiiravine kata mayiyimi sibero kirakii?”
8 Bi siwonabodeni bo, “Toumii kamimeu, bi getana iiyabo mma da yama mimeu basudi iyawonemii.”
Na Jousep iwona bo, “Wasina, God kawagha yiwiita da mimeu yawonawiiakowa. Yami mimeu kowonegu.”
9 Wasina bi redu verevereyana badana iwona bo, “Yagu mimeu kamone na greip uravina naghoguve akita, 10 debane na ragharaghana aroba. Bi raghanina rugurugudi sirumaghatara, da sipopo bi suwagha da simeni. 11 Na uwana ayouna bi kiiwawo yana redu imaguve na arubotoboto kamone bi kiiwawona avimakabi.”
12 Wasina bi Jousep iwona bo, “Mma naboni: da nokodi ragharagha aroba na yana basuna gabudara aroba. 13 Bi gabudara aroba murine na kiiwawo inikanibuvem da yam gawara inaverem, bi yana redu imane kuni imakabi ware yana redu kana verevereyana roro kuyaberaberana naboni. 14 Bi raghanine bera inarotomana tam biidi na kunoghosigu bi yam miisena anakita, da kiiraviguve; kiiwawo biidi kunikawa da mmko gawarinama anikanibutaveyana. 15 Kiiravine wawaya tupeyenama Hibru damdi tanavidima sipiikegu, bi bada mma Ijiptne, na gegha awaki berona ayabera da biwa gawarine sitorerughuvegu.”
16 Wasina bi kam kadi gabugabuna badana iwaiyana da redu verevereyana badana yana mimeu kana wonavereyana irotomana na Jousep iwoneni bo, “Tagu teya naboni amimeu da bred irigidi aroba gayamiguve akunapa. 17 Bi iriga wowone na kam gibugibudi bogaebogae kiiwawo kiiravine, bi manu irigina kamonama siyakamkam.”
18 Na Jousep iwona bo, “Mma naboni: da nokodi iriga aroba na yana basuna gabudara aroba. 19 Bi gabudara aroba murine na kiiwawo inikanibuvem da kanighom sinakasiyarayi! Bi tubuyim kiiye sinakuwiirorogi bi manu vighom sinakani.”
20 Wasina bi gabudara aroba murine, na kiiwawo yana tubugha gabudarine, na kepo tana ibera yana ababagibagi damdi kadi babada ghamaghamadi kiiravidiye; redu kana verevereyana badana da kam kadi gabugabuna badana ivikanibuvedi yana ababagibagi damdi kadi babada naghodiye. 21 Redu verevereyana badana yana gawara iveremayeni, da kiiwawo imane bada redu inimakabimayeni, 22 bi iwonana kam kadi gabugabuna badana kanighona sikasiyarayi bi sikuwiirorogi, metagha Jousep yana wonawiiakowa iwonedi na naboni itubugha. 23 Bi redu kana verevereyana badana gegha Jousep iyanoghosina; touna Jousep ivinuwawapi.