42
Job, Yawe God iwonabodeni
1 Wasina bi Job ivisisiya magha Yawe God biidi iwona bo,
2 “Akovim Yawe God, tam rubana bera tupadi kunabera,
da getana iiyabo inigesiyem da awaki kwanoghonoghosi kuyabera na gekunaberana.
3 Job 38:2Tam kuvitarakiyanegu bo, ‘Metagha bi tam, yagu nuwagiura kiiravine
yam sisiya kwebudima kwiitarakiiyana?’
Wiisuwona, tagu sawara geayakowa na kiiravidiye avisisiyana,
parapa sawara ghamanakidi gerubana akovidi ayayouna na kiiravidiye avisisiya.
4 Job 38:3Tam kuwonegu bo, ‘Kuwaiyana bi anisisiya!
Tagu anitarakiiyanem, bi tam kunawonabodeyana.’
5 Naghove na wawaya mududi tam kiiravimve siwonegu na touna kawagha akovi,
bi katana tagumani mataguma akitam.
6 Na yagu sisiya tupadi kiiravidiye na iisinimayagha,
bi popoku da yapukare kamodiye amakamake,
noko yagu miiriwamira kanawiiyeveveyana.”
Yawe God, Job ivimiiseyeni
7 Yawe God mmkodi sisiya Job biidi ivisisiya ikovi murine, na Teman kwanatuna kamonama tomogha kana waghawagha Elipas biidi ivisisiya iwona bo, “Tagu nuwanuwagu ipughu tam da turaturam yadi bata biiyadi, basuna kiiraviguve gewiisuwona koyisisiyeni ware yagu wiitamariyana Job iberana naboni. 8 Na kata kau makidi 7 da sip makidi 7 koyouna bi konagho yagu tamariyana Job biidi da puyo gabugabunidi konasuwara tamimani kiiravimiye. Touna kiiravimiye inarupari, bi metagha inibabiiguna naboni kiiravimiye anabera, da bagune bera berona kobera bi gesinimayagha anaveremina. Tami, gegha wiisuwona sisiyidi kiiraviguve koyaberana, ware Job ibera na naboni.”
9 Na Teman kwanatunama tomogha Elipas, bi Bildad yana kubura Sua da Naamat tomogha Jopar metagha Yawe God iwonedi na naboni sibera, bi Yawe God na metagha Job ivibaba na naboni ibera.
10 Job 1:1-3Job turaturana kiiravidiye irupari ikovi murine, na Yawe God ibera da Job imouramagha. Sawara tupadi naghove rapenena Yawe God iveremayeni bi bada debane iviagagumayeni. 11 Job warewaresina da genegeneghuna tupadi da iiyawogha naghove sakovina, sipiika yana bareye da yawata siyakam patapata. Piropiro tupadi Yawe God ipiikedi Job biidi kiiravine na sivinuwapoyeni bi siwona wiitoratorani. Bi wawaya tatadigegha mane mududi da imakwaki gouldma beraberadi sikabigunaveni.
12 Job yana make yawana damona Yawe God ivimiiseyena kirakiiyeni geware yana make yawana dagudagune naboni. Na kata Job ribiribi ivirapeneyana na erenonoyina sip yadi 14,000 bi kamel yadi 6,000 bi kau yadi 1,000 da donki yagayagaridi yadi 1,000. 13 Bi kate bada natunatuna tomotomogha yadi 7 bi wasiwasike yadi 3. 14 Natuna wasike iyarokona iviwaghawaghayeni Jimaima, tububasuna iviwaghawaghayeni Kisaiya, bi wiiarobina na Keren-Hapuk.*Hibru gamodima mmkodi waghawagha tatadigegha na waiyanidi naboni sisiya kepamara. Bi yadi basuna na Jimaima basuna ayabo, Kisaiya yana basuna wane ghabughabu, wasiwasike kiiravidiye bi Keren Hapuk basuna na dedewaga gisina, wane ghabuhabu kana dedewaga. 15 Kubura tupana debane na getana wasiwasike nama siyikepamara ware Job natunatuna wasiwasikedi naboni. Job iwonedi da raghanina inarabobo bi murine na yana moura sinarereyi da riba 10 bi ededidi tatadigegha na riba tanagha sinakabi, genatunatuna tomotomogha kawaghana, bi gegha da natunatuna wasiwasike yawata.
16 Mmko murine na Job imake da bodu 140. Na parapa imake da raghani gurina bi tubutubuna ikitadi da kate tubutubuna natunatudi bi iyowogha inagho da kimta ruwamaruwa. 17 Bi raghanina Job imoraba kirakii, na irabobo.
*42:14: Hibru gamodima mmkodi waghawagha tatadigegha na waiyanidi naboni sisiya kepamara. Bi yadi basuna na Jimaima basuna ayabo, Kisaiya yana basuna wane ghabughabu, wasiwasike kiiravidiye bi Keren Hapuk basuna na dedewaga gisina, wane ghabuhabu kana dedewaga.