1 Wasina bi nawaravi dagudagune, na dam Isrel tupana siverakanibu Zin mayabine, da Kedes kubure sivitaki. Bi Miriyam name irabobo na sidogu.

2 Exo 17:1-7Bi noko kuburine rarima gegha kiiravine, na wawaya tupadi Mosis da Eron sigwagwaridi bi siviaviyedi. 3 Da gwinima Mosis siwoneni bo, “Toumii kakayovena kiirakiiyeni da warewaresimii yawata kayarabobo, Yawe God matane sirabobona naboni. 4 Awaki kiiravine touda Yawe God yana wawaya mabo kukabi kanibuveda mmko mayabine, da yada ribiribi yawata tanarabobo? 5 Awaki kiiravine kubera da Ijipt kubura kakuyoveni bi kapiika mmko kuburina berone? Mma na getana wit bo kogheya, greip bo pomegrenate,*Pomegrenate na kiiuwa tana bi Isrel damdi kadi kam tana. Bi kana kam na metemetevina, bi kana kita na ware pasiporo bi ghamanakina. bi getana rarima da niuna.”

6 Wasina bi Mosis da Eron, wawaya tupadi sikuyovedi bi sinagho Kiregoru Kabikabikuwayina matamkete bi mayiyidi siyowogha dobodobove. Na Yawe God yana kiniwa yeghanina irumaghatara toudi biiyadi, 7 bi Mosis iwoneni bo, 8 “Yam dighona kabi bi waresim Eron yawata Isrel tupadi kokwatu wiitaghomidi. Bi wawaya matadiye noko akimina kuwoneni da rarima inaveremi. Noko kedane na tam akimama rarima kunapiikeni toudi kiiravidiye, da yadi ribiribi teya sinaniuna.”

9 Na Yawe God, Mosis iwoneni na naboni ibera da naghone bi dighonina ikabi.

10 Wasina bi Mosis da Eron wawaya tupadi sikwatuvedi na akima ghamana naghone sivitaghomidi, bi Mosis iwona bo, “Kowaiyana, tami wawaya kawakeekeemi, bo mmko akiminama rarima kanapiikeni kiiravimiye?”

11 Bi Mosis yana dighona imane na irukabepi da akimina irouvi raghani bata, na rarima ivitosiyo ikanibu da wawaya tupadi da yadi ribiribi yawata siniuna.

12 Bi gegha da Yawe God, Mosis da Eron iwonedi bo, “Tami Isrel damdi matadiye gekoyitumaghanegu bi gekoyiyeveveyana da Tagu kabikabikuwayigu kiiravine, na mmko damna kate gekoninaghovedi meko kuburina avisuwona da ayaveredina nabo.”

23 Bi Idom kubura kana wiibarabarate, Hor Koyane Yawe God, Mosis da Eron iwonedi bo, 24 “Tami kubura Meriba rarimine gekoyakabisisiregu kiiravine, na Eron gerubana noko kuburina Isrel damdi avereveredi na inarughuna, bi touna mma inarabobo. 25 Na Eron da natuna Eliesa kurutayinidi kogae Hor Koyana debane. 26 Bi name prist garadi Eron gwabine na kabitavetaveyana bi natuna Eliesa kikounayi, kiiravine Eron nama inarabobo da inanagho nosinosinanakim biiyadi.”

27 Mosis awaki tupana Yawe God iwoneni na naboni ibera. Da wawaya tupadi matadiye bi Hor Koyana saghiini sigae. 28 Mosis, Eron kana gara ikabitavetaveyana bi natuna Eliesa ivikounayi, bi Eron name koya debane irabobo. Wasina bi Mosis da Eliesa koyama siveramagha siyowogha, 29 bi raghanina dam Isrel akowa sikabi da Eron irabobo, na tupadi gabudara 30 kiiravine sidou.