67
Ayi wiikiikiiwa kiiravine
Kabepepa ayidi badana kiiravine. Inawa ere uravidima. Psam, bo Ayi.
1 O God, kinuwanuwaghanemii, da kimiiseyemii
bi mayiyim kubera da inarukarata toumii biiyadi.
2 Wasina bi wawaya tupadi kubura debane
sinakovi da tam awaki kwakayokayoveni da toudi sinabera,
dam bi dam tupadi sinakovi da tam rubana kuniyawiidi.
3 Na dam bi dam tupadi tam sinakabepepim,
O God, wawaya tupadi na tam sinakabepepim!
4 Dam tupadi kubura debane na nuwamiiseye sinatawora
basuna tam keda rotomanidiye wawaya kwiibadedi,
bi dam tupadi kubura debane kwiinaghovedi.
5 Na dam bi dam tupadi tam sinakabepepim,
O God, wawaya tupadi na tam sinakabepepim!
6 Na kwabu kabipura miisena inavereyana,
bi yada God parapa miisena inabera touda biiyadi.
7 Wonawaghata, God wiimiiseyana inavereda
bi meghamegha mmko kuburina debane,
na wawaya God sinakabikarawayeni.