1 Mee daa yiba petamanii naagoo pedeo komaa, pe-aweeniino taa kaboo da Maria Magdalena mee Yesus ogoo da kaa peega. Peemaata kaama deamaagi too ko Wa ogoo da kaa takeata oma damaa to geboo da kaa dogeamaata topa. 2 Kisee deeta kaama mani yiibaga peedoota Simon Petrus ma, Yesus me topenaa see bagee kuwa Wa me esee epa gaataa see mée mee ma ekea paagoo peemaata kaama asiino, "Tuhan bootaa da ogo maataamea yoo kaama mée me masedoo peegea. Okoo me doodoota pe-ekeasegea yoo inii ewo" see asega.

3 Kisee asega naadi Petrus ma, mee apanaa topenaa see mée to ma ekea paaya Yesus ogo maataamea yoo peegea. 4 Ekea paaya epo enaataa yiibaga peegea kiya ena mee moga yoka wa keta peemaagi. 5 Peemaata kaama peenaa kagu esee-ituunta mokoo kaama ogo wogaa-wogaa see deamaagi naaki Wa kaa bebenataata dokaa yuwa topa. Kisee deegi kiya kitaa seemaano taa. 6 Simon Petrus mee uuto kaama peemaata mee ogo maapea taa kisee ki seemigi. Seemeta kaama deamaagi ko bootaa da kaa bebenataata dokaa yuwa kuwa wa too, 7 bedaa mumoo to taa bebenataata dokaa da mee daamaa wa too denemaata topa. 8 Kiyoo kaama Wa me topenaa see mée ena mee, wa keta peemaagi mée waa miya seemigi. Kuwa yuwa deeta kaama Yesus mikee aya andoo peepi ii see gaagi. 9 Aya andoo peepi kiya Ogatamee me menaa yiba "Waa boota kaama aya andoo poono gaano pedeo" see ebeamaata menaa mee ekea miya nekeeniino taa.

10 Kuwa topenaa see bagee wiya kuwa ee kaa peegea 11 kiya Maria mee se peega. Yesus ogo maataamea yoo geboo da kaa kiyoo yiinaageeta yegeeka. Yegee taaka too peenaa kagu ituunta mokoo kaama ogo maapea taa deamaaga naaki 12 malaikat bagee ekea wiya Yesus bootaa da ekeasemea yoo kiyoo topea, ena mee mumo yaato, ena mee badaato yaato, kisee animaata toomuu taakea. 13 Ekea me asiino, "Apii to, wae. Aa kaasee kaa yegee taake?" asegea naaki Maria me asiino, "Ni epoo Mée Tuhan Wa bootaa da maseageeta kaama pe-ekeasegea yoo anii ewo yoka" see asega. 14 Kisee aseta kaama waa oko maataata kaama deamaaga naaki Yesus tupi. Wa me kisee deega kiya 'Mee Yesus yoka' see kuwa se nekeenega.

15 Yesus me asiino, "Apii to, aa kaasee kaa yegee taake? Aa maamee abanaake naa ya?" see asigi. Maria me gaano, 'Waa ko mee bugii yaagee see mée to' see gaata kaama asiino, "Neataagi, aa Wa bootaa da mee doope kepa ko a me ekeasege yoo mee nasii, anii masigiinaka yoka" see asega.

16 Yesus me "Maria, wae" asigi naaki Maria mee ikigi pe-maataata kaama "Rabuni" asega. Rabuni see menaa mee wegayu ko Ibrani menaa kaa mée topetaa see mée see mee.

17 Yesus me asiino, "Anii Neataagi paagoo pakaamagaano taa yoka Anii se napeneasii. Eto ko peedoota Nii ma kenaa bagee paagoo kisee pe-naasii: 'Anii Neataagi paagoo, bedaa ikii miya Ikiitaagi paagoo pakaanaka, mee ko Ni me Eboo Ogatamee paagoo, bedaa ikii miya ikii me Eboo Ogatamee paagoo pakaanaka' see kisigi see pe-naasii" see asigi. 18 Maria Magdalena mee peedoota Yesus me topenaa see bagee yuwa paagoo peemaata kaama asiino, "Anii Tuhan ma aadee sepa nao" see asega. Wa me asigi menaa yuwa miya eewegaga.

19 Mee naagoo, mee daa yiba petamanii naagoo, uwaapeata digiyoo takiinega see kaboo Wa me topenaa see bagee yuwa me Yahudi kaa ebo-ebo yuwa weda kaa okoo me toogee see ee to kaa kutuu semaata kene yuwa munitaata koogo totaakea. Taka ena Yesus mee okoo paagoo awee da kaa keta kaama "Epao, koogo adumeta dimii masii" see asigi.*"Koogo adumeta dimii masii" see menaa mee ko Ibrani menaa kaa syalom see mee. Mena kegaa ena ma agoo, mee ko Ogatamee ma emee-emee kisiyaayaa see mee. 20 Aseta kaama Wa me yagaa ma, Wa me pamee da ma kuwa deeyaagi naaki okoo Tuhan nao naadi esee ede kegea.

21 Bedaa Yesus me asiino, "Koogo adumeta dimii masii. Neataagi Wa me 'Aa mée paagoo pooi' see naseta mokoo kisee Ani me miya ikii mée paagoo pooi see kisega" see asigi. 22 Kiyoo kaama Waa okoo kaa ebe noogaa da puu aseta kaama asiino, "Roh Kudus mee ikii daamaa masii. 23 Eto ko mée waa ena wa me pedeo yuwa ikii me epa yaekeasiyu ko Ogatamee Wa me miya waa epa ekeasiyaa, bedaa wa me pedeo yuwa ikii me epa si yaekeasiyu ko Ogatamee Wa me miya waa epa se ekeasiyaa, kuwa waa Ogatamee ma menaa yuwa si yataa kiyaayaa, kisee toopa" see asigi.Mat 16:19, 18:18

24 Yesus Waa okoo paagoo meemaata kaama eetoomuu sipi kaboo Yesus me topenaa see mée ena, mee ko Tomas mee, Didimus see ekaa miya weakee mée waa okoo ma enaataa eetoono taa. 25 Wa me topenaa see bagee apa yuwa me Tomas asiino, "Tuhan mee inii aadee sepe nao" see asegea naaki wa me asiino, "Anii Wa me yagaa da kaa kuwa paku wogeta ebee yuwa deeyu too, bedaa kuwa paku wogeta ebee yuwa taa ni me kepoo to me yaadee sepa gaayu too, bedaa ni me yagaa da me Wa me pamee da kaa abuu yobee da taa miya yaadee sepa gaayu too anii mikee nao see gaayaa, taa gaayu ko mikee se gaayaa" see asigi.

26 Unu petoo omemaata kaama wagaagoo to naagoo Wa me topenaa see bagee yuwa kaagaa ena ma ee yiba koogo toomuu taakea, Tomas waa miya tupi. Kene yuwa munitaata kaama ee yiba toomuu taakea kaboo Yesus mee okoo paagoo meemaata kaama asiino, "Epao, koogo adumeta dimii masii" see asigi. 27 Bedaa Wa me Tomas asiino, "A me kepoo to me nakaayoo mee-nayaadee sede, Ni me yagaa kuwa daamaa nadeede, bedaa A me yagaa da me Ni me pamee da taa daamaa nayaadee taai. A me mikee se nagaano dimii mee ekeata mikee nao see dimii mee too nagaai" see asigi. 28 Tomas me asiino, "Mikee, Ni epoo Mée Tuhan, ni me Eboo Ogatamee" see asigi.

29 Yesus me asiino, "A me Anii nadeege kemaata Anii mikee nao see nagaage. Okoo Anii nadiino taa kiya Anii mikee nao see nagaayaa bagee kuwa daamaa, ede nao" see asigi.1Pet 1:8

30 Yesus me kisee nekeensi naadi dimi nagii-nagii agiyoo apanaa miya maamaa eebaa Wa me topenaa see bagee emaa dagii da kaa ukuwanaa segee seta kiya mee kapogee yiba ebeano taa. 31 Kiya mee kapogee kaa ikii kiebeamaaga menaa kuwa ko Yesus Waa mikee Ogatamee me ebo toowoosi naadi wigintaata Mée Ebo Kristus mee, Ogatamee Yoopaa ii see kuwa ikii mikee gaawoosea naadi kiebeamaaga, bedaa ikii Waa mikee nao see gaawoo naadi kaama Wa ekaa yiba daamaa umiwoo, toowoosea naadi kuwa menaa yuwa kiebeamaaga.