1 Kuwa kaboo da Domba Pooduu to me kuwa kapoge kaa tabintaata agiyoo yuwa petaagoo to mee oseepeasigi naaki epoo to wodoo mena ena ma taa, kisee setengah jam mokoo kuwa koogo totaa see. 2 Kuwa kaboo da anii deeyaa naaki Ogatamee ikigii to kaa malaikat bagee petoo to kuwa yiinaageeta topea. Ebo puusee petoo okoo gakata manegea.

3 Kuwa kaboo da malaikat bagee mée ena ma peedoota Ogatamee paagoo agiyoo ekega-manee taa see yoo geboo da kaa kiyoo peemaata kaama yiinaageeta totaaki. Waa wunu daamaa peeyaa agiyoo yeeyee biyaa iyee taano see naadi emas otaawee ena peneasigi. Kuwa agiyoo yeeyee eebaa Ogatamee paagoo biyaa iyeesi naadi waa manegea. Bedaa kuwa Ogatamee me daamaa wa too wigintaata bagee uduma okoo me sembahyang menaa yuwa ma enaataa aatabi taagi. Aatabi taata kaama Ogatamee me ebo animagaano yoo ikigii to kaa emas kaa wunu daamaa peeyaa agiyoo yeeyee biyaa iyee taa see yoo kiyoo kuwa agiyoo yuwa enaataa biyaa iyeetaaki. 4 Kuwa wunu daamaa peeyaa agiyoo yuwa ma, Ogatamee me daamaa wa too wigintaata bagee okoo me sembahyang menaa yuwa ma kuwa biyaa kaa yuwitaagi naaki biyaa utuu da mee malaikat see mée to wa me yagaa da kaa otaawee yiba kaama Ogatamee paagoo pakaamaaga. 5 Kuwa kaboo da mee malaikat see mée to me mee biyaa yuwitaa see yoo biyaa masegeeta kaama emas otaawee da yiba awetaagi. Awetaata kaama magaa da kaa tamekomeegi naaki keemuu, tukuu ebo, bego-bego, maga pigii, kisee agiyoo eebaa kedaaka kuwa dimi nagi, kisee ukuwaanega see kuwa anii deepa.

6 Kuwa kaboo da kuwa puusee petoo to agoo see malaikat bagee kuwa okoo puusee taano see naadi koo taakea.

7 Malaikat bagee petamanii mee wa me puusee da puu asigi naaki es dekaa, oma patagu keenda see dekaa agoo kedaaka. Kuwa agiyoo ma, biyaa ma, tadaa ma kuwa uduma aatabi naadi kaama magaa da kaa tamekomeegi. Tamekomeeta kaama maga ena biyaa me poonooga, maga wiya kisee taa, maga ena biyaa me poonooga, maga wiya kisee taa, kisee magaa da kaa maga wedaagoo to yaato magaa kuwa biyaa me pooneepeasega. Piya yuwa uduma wedaagoo to yaato piyaa kuwa miya biyaa me poonooga. Boobaa yuwa uduma miya kisee biyaa me poonooga.

8 Kuwa kaboo da malaikat bagee wiyaagoo to mee wa me puusee da puu asigi naaki apanaa agiyoo mokoo, biyaa ebo, maga bagoo to biyaa peetaaka keenda. Kuwa uduma maakaa piku yiba tamekomeegi naaki maakaa pikuu da wedaagoo to yaato uwoo kuwa tadaa kedaaka. 9 Maakaa piku yiba aya tookee agiyoo uduma wedaagoo to yaato agiyoo kuwa miya boodaakea. Kapal komaa yuwa kuwa uduma miya wedaagoo to yaato kapal kuwa pedeo kedaaka.

10 Kuwa kaboo da malaikat bagee wedaagoo to mee wa me puusee da puu asigi naaki okadee damaa to, peto gada peetaaka see deeyaa mokoo epoo to kaa kaama magaa da kaa eseanigi. Uwo yuwa uduma wedaagoo to yaato uwoo yuwa kaa eseanigi, uwo muma uduma wedaagoo to yaato uwo muma yuwa kaa miya eseanigi. 11 Mee okadee to ekaa da ko Uu. Kuwa uwoo yuwa kaa eseanigi naaki wedaagoo to yaato uwoo kuwa uu kedaaka. Kuwa uwoo yuwa uu kedaaka kemaata mée eebaa noomaata kaama boodaakea.

12 Kuwa kaboo da malaikat bagee wogeagoo to mee wa me puusee da puu asigi naaki epoo to kaa ago peeyaakee agiyoo yuwa dakamegea mokoo. Dakamemaata kaama peenaa digiyoo takiinega. Kenoo to wedaagoo to yaato ma, keno agoo da wedaagoo to yaato ma, okadee yuwa wedaagoo to yaato ma kuwa se wikiindaakea naadi peenaa digiyoo takiinega. Egapi yaato awee kuwa wedaagoo to yaato ago se peega, daatooyiba miya wedaagoo to yaato ago peeyaakee agiyoo kuwa ago se peega.

13 Kuwa kaboo da anii deeyaa naaki tokee see bedoo ena epaawee da taa uwaanaa, peenaaka. Wa me mena ebo kaa wegaano, "Yaai, pedeo nao, pedeo nao. Kuwa malaikat bagee apanaa wedoo to okoo me puusee yuwa puusee taano see kookea yoka magaa da kaa bagee kuwa pedeo kaanakea yaai" see wegagi menaa kuwa anii yeetaa.