1 Kậyı̣̂ ãzâ sĩ, Yésũ yî rĩꞌá lậvũꞌá lãjóꞌbá íyíkâ rî ꞌbá yí bê lạ́tı̣̂ drı̣̃ı̣̂ sĩ. Gõꞌdá drílĩyî nĩzó ãgô ãzâ ûsúlı̣́, útı̣̂ ãgô rî ꞌdĩ kó lı̣̃fı̣́ ãkó ꞌálé lésĩ. 2 Lãjóꞌbá Yésũ kâ ꞌdĩ ꞌbá yî ndrê ĩyî bê ãgô ꞌdĩ lı̣̃fı̣́ ãkó rî, drílĩyî Yésũ rî îjízó kĩ, “Tã îmbá ꞌbá, tã õnjí rî gógó ãgô nõ ꞌbã ꞌbá gólâ rî tı̣̃zó ꞌálé lésĩ lı̣̃fı̣́ ãkó nõ ãꞌdî kâ ĩꞌdî yã? ꞌDĩî tã õnjí átá lâ yí kâ ĩꞌdî ândré lâ bê, ngãtá tã õnjí gólâ rî nyãányâ kâ ĩꞌdî yã?”

3 Gõꞌdá Yésũ drí tã-drı̣̃ jãzó gólĩyî drí kĩ, “Tı̣̃tı̣̃ ãgô ꞌdĩ kâ lı̣̃fı̣́ ãkó ꞌdĩ rî âꞌdó kô tã õnjí õjílã ãzâ ãlôlâ kâ tãsĩ. Tı̣̃tı̣̃ gólâkâ lı̣̃fı̣́ ãkó ꞌdĩ, Ôvârí lẽ má drí mbârâkã íyíkâ âꞌdálé ãgô nõ rú lı̣̃fı̣́ lâ njı̣̃njı̣̃ sĩ. 4 Rĩꞌá tãndí ró ãmâ drí lôsĩ Ôvârí gólâ ámâ âjó ꞌbá rî kâ rî ꞌẽzó ngbãângbânõ ãkpãkãꞌdã ngá ậnı̣́ drẽ kô. Tãlâ ı̣̃tú õfî trá rî, õjílã ãzâ gõꞌdá yûꞌdạ́wạ́ lôsĩ ꞌẽlé ngạ́cı̣̂ sĩ. 5 Gõꞌdá nĩ ndrê drẽ, kậyı̣̂ má drí ꞌbãzó drẽ bê rĩꞌá lédrẽ-lédrẽ ró ãngó nõ ꞌá rî, mâ ĩꞌdî rĩꞌá Ngá îꞌĩ ꞌî õjílã ãngó nõ kâ drí.”

6 Gõꞌdá Yésũ âtálé bê úlı̣́ ꞌdĩ ĩtí lãjóꞌbá íyíkâ ꞌdĩ ꞌbá yî drí rî, gólâ drí ậndı̣̃zó tũ wũlı̣́ ı̣̃nyạ́kú drı̣̃ı̣̂, gõꞌdá drílâ tũ ꞌdî ônjázó ı̣̃nyạ́kú bê gõzó ũlútrạ́ lâ ꞌdĩ bẽlé ãgô ꞌdĩ lı̣̃fı̣́ ĩnyĩrĩkõ lâ ꞌá. 7 Gõꞌdá nĩngá sĩ, drílâ tã âtázó ãgô ꞌdĩ drí kĩ, “Ní nĩ ánî lı̣̃fı̣́ jĩlí ạ́pậrı̣̂ gólâ zı̣̃lı̣́ Sĩlómã*9.7 Sĩlómã Rú ꞌdĩ rî tã ífí lâ kĩ, lı̣̃mvû tíbê âjólé õjílã drí mvũlı̣́ rî. nã ꞌálâ.” Gõꞌdá ãgô ꞌdĩ drí ngãzó nĩlí ạ́pậrı̣̂ rî ꞌdĩ tı̣́ ꞌálâ. Gólâ câ bê tólâ rî, drílâ íyî lı̣̃fı̣́ jĩzó lũmvû ạ́pậrı̣̂ ꞌdĩ kâ sĩ, õzõ Yésũ drí âtálé gólâ drí rî kâtí. Kôrô ãgô ꞌdĩ lı̣̃fı̣́ lâ drí rû njı̣̃zó, drílâ võ ndrẽzó ngbángbá. Gõꞌdá ãgô ꞌdĩ drí ngãzó gõlé ꞌbã ꞌálâ.

8 Ĩtí rî, õjílã gólĩyî ꞌbã-tı̣̂-ꞌdı̣̃-ãzí gólâkâ ró rî yî gõꞌdá kpá gólĩyî gólâ rî ndrẽ ꞌbá trá sı̣́sı̣́ rĩrĩ ꞌá lạ́tı̣̂ gãrã drı̣̃ ꞌá rĩꞌá ngá zı̣̃lı̣́ õjílã tı̣́ sĩ rî drí tã âtázó kĩ, “Hé, ákĩ ꞌdĩî fí ãgô lı̣̃fı̣́ ãkó rĩ ꞌbá rĩlí ngá zı̣̃lı̣́ kárá õjílã tı̣́ sĩ lạ́tı̣̂ gãrã drı̣̃ ꞌá rî ĩꞌdî kô yã? Gólâ gõ rî ngá ndrẽlé nõ ángô tí ró yã?” 9 Gõꞌdá õjílã ãzâ ꞌbá yî kĩ, “ꞌDĩî âꞌdó kô gólâ ĩꞌdî! Ãgô ãzâ bê rĩꞌá nyé õzõ gólâ tí.” Gõꞌdá ãgô lı̣̃fı̣́ lâ drí rû njı̣̃lı̣́ trá ꞌdĩ ârílí bê tã õjílã ꞌdî ꞌbá yî drí rĩꞌá ôjálâ ĩyî lãfálé ꞌásĩ ꞌdî rî, drílâ gõzó tã âtálé gólĩyî drí kĩ, “Mâ ĩꞌdî tíbê lı̣̃fı̣́ ãkó rĩ ꞌbá ngá zı̣̃lı̣́ õjílã tı̣́ sĩ lạ́tı̣̂ gãrã drı̣̃ ꞌásĩ rî. Má rî võ ndrẽlé nõ nĩ pạ̃tı̣́ı̣̃, tãlâ ámâ lı̣̃fı̣́ njı̣̃ rû trá!”

10 Gõꞌdá õjílã ꞌdî ꞌbá yî tı̣̂ lâ yî drí ậꞌdı̣́zó ndrĩ. Gõꞌdá drílĩyî ãgô ꞌdĩ îjízó kĩ, “Ánî lı̣̃fı̣́ njı̣̃ rû ní drí rĩzó võ ndrẽlé ꞌdĩ ángô tí yã?”

11 Ãgô ꞌdĩ drí tã-drı̣̃ lôgõzó gólĩyî drí kĩ, “Ãgô gólâ rú bê Yésũ rî njı̣̃ ámâ lı̣̃fı̣́ nĩ. Gólâ wû tũ nĩ ı̣̃nyạ́kú ônjázó ĩꞌdî sĩ lâ, gõzó ũlútrạ́ lâ ꞌdĩ bẽlé ámâ lı̣̃fı̣́ ꞌá. Gõꞌdá gólâ drí ámâ jõzó nĩlí ạ́pậrı̣̂ zı̣̃lı̣́ Sĩlómã rî tı̣́ ꞌálâ ámâ lı̣̃fı̣́ jĩlí lũmvû lâ sĩ. Gõꞌdá má jĩ ámâ lı̣̃fı̣́ lũmvû nã sĩ bê rî, kôrô ámâ lı̣̃fı̣́ drí rû njı̣̃zó má drí võ ndrẽzó ngbángbá!”

12 Gõꞌdá õjílã ꞌdî ꞌbá yî drí kpá gólâ rî îjízó kĩ, “Gõꞌdá ãgô rî gógó ꞌdĩ bê ángô lé yã?” Ãgô ꞌdĩ drí tã-drı̣̃ lôgõzó gólĩyî drí kĩ, “Má nı̣̃ı̣́ võ gólâ drí ꞌbãzó ꞌá lâ rî kô.”

13 Gõꞌdá nĩngá sĩ, õjílã ꞌdî ꞌbá yî drí ngãzó ãgô lı̣̃fı̣́ lâ njı̣̃lı̣́ trá ꞌdĩ trõlé âjílí Pạ̃rúsı̣̃ yî ândrá tã lâ âꞌdálé gólĩyî drí. 14 Gólĩyî âjî ãgô ꞌdĩ Pạ̃rúsı̣̃ yî ngálâ, tãlâ kậyı̣̂ gólâ Yésũ drí ãgô ꞌdĩ lı̣̃fı̣́ lâ njı̣̃zó ꞌá lâ rî rĩꞌá kậyı̣̂ lôvô kâ ꞌî. 15 Gõꞌdá Pạ̃rúsı̣̃ yî drí ãgô ꞌdĩ îjízó kĩ, “Ánî lı̣̃fı̣́ njı̣̃ rû trá ángô tí ró võ ndrẽlé yã?” Gólâ kĩ, “Ãgô rú bê Yésũ rî ônjâ ı̣̃nyạ́kú nĩ tũ sĩ ũlútrạ́ lâ trõlé bẽlé ámâ lı̣̃fı̣́ ꞌá, gõꞌdá gólâ kĩ, má õnĩ nĩꞌá ámâ lı̣̃fı̣́ jĩlí. Gõꞌdá má jĩ ámâ lı̣̃fı̣́ bê rî, kôrô ámâ lı̣̃fı̣́ drí rû njı̣̃zó võ ndrẽlé dódó nõ!”

16 Gõꞌdá Pạ̃rúsı̣̃ yî ârílí bê úlı̣́ ãgô ꞌdĩ drí ngĩlí gólĩyî drí ꞌdĩ rî, kôrô drílĩyî ngãzó rĩꞌá tı̣̂ ânyálé ĩyî lãfálé ꞌásĩ. Ãzâ ꞌbá yî kĩ, “Ãꞌdô ĩtí rî, ãgô Yésũ ꞌdĩ tã õnjí ꞌbá ꞌî. Ôvârí âjó gólâ nĩ kô, tãlâ gólâ wã trá tã ꞌbãꞌbã ãmákâ kậyı̣̂ rãtáã kâ rî kâ drı̣̃ı̣̂ sĩ.” Gõꞌdá ãzâ ꞌbá yî kĩ ĩyíkâ rî, “Õjílã gólâ ꞌbã ꞌbá tã õnjí ꞌbá ró rî âꞌdô íyíkâ mbârâkã ûsúꞌá tã lârâkô ãmbá ĩtí ꞌdĩ ꞌẽzó ꞌdĩ ãꞌdô ꞌásĩ yã?”

17 Ĩtí rî, Pạ̃rúsı̣̃ ꞌdĩ ꞌbá yî drí ãgô ꞌdĩ îjízó kpá óꞌdí kĩ, “Nî gólâ tíbê lı̣̃fı̣́ lâ njı̣̃lı̣́ nõ, ní âtâ drẽ tã nô tãndí ró ãmâ drí. Tã ı̣̂sũ áníkâ ãgô gólâ ánî lı̣̃fı̣́ njı̣̃ ꞌbá ꞌdĩ tãsĩ rî íyíkâ ángô tí yã?” Gõꞌdá ãgô ꞌdĩ drí tã-drı̣̃ lôgõzó gólĩyî drí kĩ, “Ãgô ámâ lı̣̃fı̣́ njı̣̃ ꞌbá ꞌdĩ, gólâ rĩꞌá tã ậngũ ꞌbá Ôvârí drí âjólé rî ĩꞌdî!”

18 Gõꞌdá kpálé tã ndrĩ ãgô ꞌdĩ drí ngĩlí Pạ̃rúsı̣̃ ꞌdĩ ꞌbá yî drí ꞌdĩ ꞌbá yî ꞌásĩ rî, gólĩyî gâ ĩyî vólé dó tã lẽlé kĩ, pạ̃tı̣́ı̣̃ ãgô ꞌdĩ tı̣̃rı̣̃ lâ ꞌásĩ rî gólâ rĩꞌá lı̣̃fı̣́ ãkó, gõꞌdá Yésũ njı̣̃ lı̣̃fı̣́ lâ nĩ võ ndrẽlé dódó. Gõꞌdá drílĩyî võrã jõzó ãgô ꞌdĩ átá lâ yî vó ândré lâ bê gólĩyî ậzı̣́lı̣́ ânĩlí ĩyî ngálâ. 19 Gõꞌdá ãgô ꞌdĩ átá lâ yî âcâ bê ândré lâ bê rî, Pạ̃rúsı̣̃ ꞌdĩ ꞌbá yî drí kpá gólĩyî îjízó kĩ, “Nõô pạ̃tı̣́ı̣̃ mvá ágó ãnî drí tı̣̃lı̣́ lı̣̃fı̣́ ãkó ꞌálé lésĩ rî ĩꞌdî yã? Õzõ ãꞌdô pạ̃tı̣́ı̣̃ gólâ ĩꞌdî rî, lı̣̃fı̣́ lâ gõ njı̣̃ rû rĩꞌá võ ndrẽlé ãmbã drı̣̃ı̣̂ nõ ángô tí ró yã?”

20 Gõꞌdá ãgô ꞌdĩ átá lâ yî ândré lâ bê drí tã-drı̣̃ lôgõzó Pạ̃rúsı̣̃ ꞌdĩ ꞌbá yî drí kĩ, “Ãwô pạ̃tı̣́ı̣̃, nõô mvá ágó ãmákâ rî ĩꞌdî, mã nı̣̃ trá pạ̃tı̣́ı̣̃ kĩ, mã tı̣̂ gólâ trá lı̣̃fı̣́ ãkó. 21 Gõꞌdá mã nı̣̃ı̣́ lạ́tı̣̂ ãmâ mvá ꞌdĩ lı̣̃fı̣́ lâ drí rû njı̣̃zó rî kô, ngãtá ãꞌdî njı̣̃ lı̣̃fı̣́ lâ nĩ võ ndrẽlé yã rî. Nĩ âꞌdô îjíꞌá lâ fí gólâ tı̣́, gólâ ãâꞌdâ ró íyî tı̣̂ sĩ ãnî drí, tãlâ gólâ trá õjílã ãmbá ꞌî.” 22 Ãgô ꞌdĩ átá lâ yî ândré lâ bê âtâ ĩyî tã ꞌdî ĩtí ꞌdĩ rî, tãlâ gólĩyî ũrı̣̃ ró tã ꞌbãꞌbã Yúdạ̃ yí kâ tãsĩ kĩꞌá nĩ rî, õzõ õjílã ãzâ õlẽ tã trá Yésũ ꞌá kĩ, gólâ ãâꞌdô ꞌdíyî pã ꞌbá ꞌî rî, áâꞌdô õjílã rî ꞌdĩ drõꞌá vólé jó tã Ôvârí kâ ârî kâ ꞌásĩ. 23 ꞌDĩî tã ífí ãgô ꞌdĩ átá lâ yî ândré lâ bê drí tã âtázó Pạ̃rúsı̣̃ ꞌdĩ ꞌbá yî drí, gólĩyî ĩîjî mvá ꞌdĩ ãâꞌdâ ró bê cú íyî tı̣̂ sĩ, tãlâ gólâ trá ãmbá ró rî ĩꞌdî.

24 Gõꞌdá Pạ̃rúsı̣̃ ꞌdĩ ꞌbá yî drí ãgô lı̣̃fı̣́ lâ njı̣̃lı̣́ ꞌdĩ ậzı̣́zó kpá óꞌdí tã îjízó tı̣́ lâ kĩ. “Ní âꞌdâ drẽ tã pạ̃tı̣́-pạ̃tı̣̃ Ôvârí rî ı̣̂njı̣̃zó rî ãmâ drí Ôvârí ágálé, pạ̃tı̣́ı̣̃ ãgô rú bê Yésũ ꞌdĩ njı̣̃ ánî lı̣̃fı̣́ fí nĩ yã? Mã îjî nî nõ rî, tãlâ mã nı̣̃ trá ãgô gólâ Yésũ ꞌdĩ rĩꞌá tã õnjí ꞌbá ꞌî.”

25 Gõꞌdá ãgô ꞌdĩ drí tã-drı̣̃ lôgõzó Pạ̃rúsı̣̃ ꞌdĩ ꞌbá yî drí kĩ, “Má nı̣̃ı̣́ kô ngãtá Yésũ tã õnjí ꞌbá ꞌî yã ngãtá âꞌdó kô tã õnjí ꞌbá ꞌî yã rî. Tã má drí nı̣̃lı̣́ rî íyíkâ cé tã ãlô ꞌî, ámâ lı̣̃fı̣́ ndré võ kó kô ãkpã ámâ tı̣̃rı̣̃ lésĩ. Gõꞌdá ngbãângbânõ rî, Yésũ njı̣̃ ámâ lı̣̃fı̣́ trá, ámâ lı̣̃fı̣́ ndrê võ gõꞌdá trá dódó.”

26 Nĩngá sĩ, Pạ̃rúsı̣̃ ꞌdĩ ꞌbá yî drí ãgô ꞌdĩ îjízó kpá óꞌdí kĩ, “Ní âtâ drẽ tã mbı̣̂ rî ĩꞌdî ãmâ drí! Gólâ ꞌê ãꞌdô tã ꞌî ánî lı̣̃fı̣́ drí rû njı̣̃zó võ ndrẽlé nõ yã?” 27 Gõꞌdá ãgô ꞌdĩ drí ngãzó tã-drı̣̃ lôgõlé gólĩyî drí kĩ, “Nĩ rî ámâ îjílí kpá óꞌdí tã ãlô nõ tãsĩ ꞌdî tãlâ ãꞌdô ꞌî yã? Tí õzõ má õró tã-drı̣̃ lôgõô ãnî drí kô rî, rĩꞌá tãndí ró! Nĩ îjî mâ ꞌdĩ, tãlâ nĩ lẽ kpá trá âꞌdólé tã ârí ꞌbá Yésũ kâ ró yã?”

28 Gõꞌdá Pạ̃rúsı̣̃ ꞌdĩ ꞌbá yî drí ngãzó ạ̃wạ̃ ró úlı̣́ ꞌdĩ ꞌbá yî tãsĩ. Drílĩyî ãgô ꞌdĩ ꞌdãzó gõꞌdá tã âtázó drílâ kĩ, “Mã ndrê bê rî, nî rî gógó rĩꞌá tã ârí ꞌbá ãzâ ãlô Yésũ kâ rî ĩꞌdî. Gõꞌdá mã rî ãmákâ tã ꞌbãꞌbã Músạ̃ kâ rî ârílí gõꞌdá ꞌẽlé ĩꞌdî. 29 Tãlâ mã nı̣̃ trá kĩ, Ôvârí âtâ úlı̣́ trá ãmâ ạ́ꞌbı̣́yạ́ yî drí Músạ̃ sĩ, rĩꞌá úlı̣́ pạ̃tı̣́ı̣̃ ꞌî. Gõꞌdá mã nı̣̃ı̣́ tã ãzãkã kô Yésũ rî tãsĩ. Gõꞌdá mã nı̣̃ı̣́ võ gólâ drí ânĩzó ꞌálâ sĩ rî kpá kô.”

30 Nĩngá sĩ, ãgô ꞌdĩ drí kpá tã-drı̣̃ lôgõzó ꞌwãâ gólĩyî drí kĩ, “ꞌDĩî úlı̣́ ángô rî ĩꞌdî ãnî drí rĩꞌá âtálé ĩtí ꞌdĩ yã? Nĩ kĩ, yĩ ũnı̣̃ı̣́ võ gólâ drí ânĩzó ꞌálâ sĩ rî kô! Nĩ ı̣̂sũ tã mbârâkã gólâkâ tãsĩ. Útı̣̂ mâ rĩꞌá lı̣̃fı̣́ ãkó, gõꞌdá ngbãângbânõ rî, gólâ njı̣̃ ámâ lı̣̃fı̣́ nĩ má drí rĩzó võ ndrẽlé dódó nõ! 31-33 Ĩtí ạ̃kû lâ sĩ tã ómvó ngá ꞌásĩ rî, nĩ ârî tã ãzâ trá kĩ, õjílã mvá ãzâ bê êdê õjílã gólĩyî tı̣̃lı̣́ lı̣̃fı̣́ ãkó rî ꞌbá yî trá, gõꞌdá lı̣̃fı̣́ lâ yî drí rû njı̣̃zó võ ndrẽlé dódó yã? Õzõ mbârâkã Yésũ drí ámâ lı̣̃fı̣́ êdézó nõ ãꞌdô Ôvârí kâ kô rî, gólâ îcá tã lârâkô ĩtí ꞌdĩ ꞌẽlé kô, tãlâ Ôvârí fẽé mbârâkã íyíkâ kô õjílã gólĩyî rĩ ꞌbá tã õnjí ꞌẽlé rî ꞌbá yî drí, gólâ rî cé tã õjílã gólĩyî rĩ ꞌbá tã gólâkâ ꞌẽlé rî kâ ârílí ĩꞌdî.”

34 Gõꞌdá Pạ̃rúsı̣̃ ꞌdĩ ꞌbá yî ârî ĩyî tã ãgô ꞌdĩ drí lôgõlé ĩyî drí ꞌdĩ bê rî, drílĩyî âꞌdózó ạ̃wạ̃ ró rõô. Gõꞌdá drílĩyî tã âtázó ãgô ꞌdĩ drí kĩ, “Útı̣̂ nî lı̣̃fı̣́ ãkó ꞌdĩ ákĩ fí tã õnjí áníkâ drí sĩ kô yã? Ãmâ gólĩyî tã Ôvârí kâ nı̣̃ ꞌbá trá tãndí ró rî, ní âꞌdô ãmâ îmbáꞌá tã Ôvârí kâ sĩ ángô tí yã?” Gõꞌdá drílĩyî ãgô ꞌdĩ drõzó vólé ĩyî lãfálé sĩ.

35 Gõꞌdá Yésũ ârílí bê kĩ, Pạ̃rúsı̣̃ yî drô ãgô yí drí lı̣̃fı̣́ lâ njı̣̃lı̣́ ꞌdĩ trá rî, gólâ drí ꞌdẽzó rĩꞌá ãgô ꞌdĩ lôndãlé. Gõꞌdá gólâ ûsúlı̣́ bê ãgô ꞌdĩ rî, gólâ drí ãgô rî ꞌdĩ îjízó kĩ “Pạ̃tı̣́ı̣̃, ní lẽ tã fí trá ꞌdíyî pã ꞌbá Ôvârí drí âjólé ûrú lésĩ rî ꞌá yã?” 36 Ãgô ꞌdĩ drí tã-drı̣̃ lôgõzó Yésũ drí kĩ, “Ãmbá, ní âꞌdâ drẽ ꞌdíyî pã ꞌbá rî gógó ꞌdĩ má drí, tãlâ má lẽ ró tã bê gólâ ꞌá.”

37 Nĩngá sĩ, Yésũ drí gõzó tã-drı̣̃ lôgõlé gólâ drí kĩ, “Ní ndrê gólâ trá ánî lı̣̃fı̣́ sĩ. Gólâ rî gógó ĩꞌdî rĩ ꞌbá tã âtálé ní bê ngbãângbânõ rî.” 38 Gõꞌdá ãgô ꞌdĩ ârílí bê tã Yésũ kâ âtálé ꞌdĩ rî, gólâ drí ꞌãꞌî tı̣̃zó vũdrı̣́ Yésũ rî ı̣̂njı̣̃lı̣́. Gõꞌdá drílâ tã âtázó kĩ, “Kúmú, má nı̣̃ trá kĩ, nî ĩꞌdî ꞌdíyî pã ꞌbá Ôvârí drí âjólé trá rî. Ngbãângbânõ rî, má lẽ tã trá ní ꞌá.”

39 Tã ꞌdî ꞌbá yî vósĩ rî, Yésũ drí ngãzó tã âtálé ãgô yí drí lı̣̃fı̣́ lâ njı̣̃lı̣́ trá ꞌdĩ drí kĩ, “Má ânĩ ãngó nõ ꞌá nõ, tãlâ õjílã gólĩyî lı̣̃fı̣́ ãkó tã Ôvârí kâ nı̣̃ ꞌbá drẽ kô rî ꞌbá yî lı̣̃fı̣́ lâ yî ũnjı̣̃ ró rû bê tã Ôvârí kâ nı̣̃lı̣́, gõꞌdá gólĩyî kĩ ꞌbá nĩ, yĩ ũnı̣̃ tã Ôvârí kâ trá dódó rî, lı̣̃fı̣́ lâ yî drí ậsı̣̃zó kpạ̃ạ́kũ. ꞌDĩî tã ífí gólâ má drí ânĩzó ãngó nõ ꞌá rî ĩꞌdî ꞌdĩ.”

40 Gõꞌdá Yésũ õtírĩ rĩî úlı̣́ ꞌdĩ ꞌbá yî âtálé rî, Pạ̃rúsı̣̃ ãzâ ꞌbá yî kpá bê âdréꞌá tólâ. Gõꞌdá drílĩyî tã îjízó Yésũ tı̣́ kĩ, “Úlı̣́ gólâ ní drí âtálé ꞌdĩ ꞌbá yî ꞌásĩ rî, ní ı̣̂sũ áníkâ bê rî, ãmâ kpá lı̣̃fı̣́ ãkó yã?”

41 Yésũ drí tã-drı̣̃ lôgõzó gólĩyî drí kĩ, “Tí õzõ nĩ õró tã-drı̣̃ lẽê nõ kĩ, nĩ âꞌdô lı̣̃fı̣́ ãkó rî, nĩ âꞌdô ânĩꞌá Ôvârí ngálâ, gõꞌdá gólâ âꞌdô ãnî âyéꞌá tã õnjí ãníkâ ꞌásĩ ndrĩ. Gõꞌdá nĩ âtálé bê trá kĩ, yĩ âꞌdô cú lı̣̃fı̣́ bê võ ndrẽzó rî, nĩ âdô ꞌdĩ ãnî nyãányâ ꞌî. Gõꞌdá Ôvârí âꞌdô lâŋõ fẽꞌá ãnî drí tã õnjí ãníkâ tãsĩ.”