7
Mãlãyíkã lôꞌbã lãmbé õjílã ífífí Ôvârí kâ rî rú ngĩî õjílã ndrĩ ãngó ꞌá rî ꞌbá yî drı̣̃ı̣̂ sĩ
1 ꞌDĩî vósĩ rî, má drí kpá tã ãzâ ndrẽzó. Tã má drí ndrẽlé rî rĩꞌá mãlãyíkã ãzâ ꞌbá yî zãlô sû rĩꞌá ĩyî âdréꞌá ẽsê ãngó kâ drı̣̃ı̣̂, ngá ndrîngî lâ sû rî ꞌbá yî ꞌásĩ ndrĩ. Gólĩyî rĩꞌá cú drı̣́-ãcê bê Ôvârí ngá lésĩ ĩlî ândrê õnjí tẽtẽ âyézó vı̣̃lı̣́ ãngó drı̣̃ı̣̂ sĩ ndrĩ. Gólĩyî rû ĩlî ândrê ngá ndrîngî sû ꞌdĩ ꞌbá yî ꞌásĩ rî trá gạ́gạ́, tãlâ ĩlî ngá ndrîngî sû ꞌdĩ ꞌbá yî ꞌásĩ rî õzó rĩî kô vı̣̃lı̣́. Ĩtí rî, ĩlî vı̣́ gõꞌdá kô võ ãzãkã ꞌá ãlôlâ, gõꞌdá lé lı̣̃mvû drı̣̃ı̣̂ sĩ fê yí bê.
2 Gõꞌdá nĩngá sĩ, má drí kpá mãlãyíkã Ôvârí kâ ãzâ gólâ ânĩ ꞌbá õjí lésĩ ró rî ndrẽzó. Gólâ cú rĩꞌá kạ́ngạ́ Ôvârí kâ bê yí drı̣́gạ́ lãmbé ró. Nĩngá rî, gólâ drí mãlãyíkã sû ꞌdĩ ꞌbá yî ậzı̣́zó gõꞌdá tã âtázó gólĩyî drí kĩ, ꞌdõvó gólĩyî ãâyê drẽ drı̣́ kô ĩlî rú sĩ ãngó fũlı̣́. 3 Gólĩyî õtẽ drẽ té bũúũ õzõ óõlôꞌbã lãmbé Ôvârí kâ trá ndrĩ kậkậrậ ngá ꞌẽ ꞌbá Ôvârí kâ rî ꞌbá yî ándrá-gạ́-sı̣́lı̣́ lâ yî ꞌásĩ rî.
4 Gõꞌdá nĩngá sĩ rî, õjílã dũû lãmbé Ôvârí kâ lôꞌbãzó trá ándrá-gạ́-sı̣́lı̣́ lâ ĩyî ꞌá kạ́ngạ́ sĩ rî ꞌbá yî âꞌdázó ndrĩ má drí. Ólã gólĩyî cãlé kútũ kámá-ãlô-drı̣̃-lâ-ngâ-nyâꞌdî-rı̣̃-drı̣̃-lâ-sû (144,000). Gólĩyî rĩꞌá ꞌbạ̃súrú mûdrı̣́-drı̣̃-lâ-ngâ-rı̣̃ õrĩ õjílã Ĩsĩrãꞌélẽ kâ rî ꞌbá yí kâ ꞌásĩ ndrĩ. 5-8 Gólĩyî rĩꞌá õzõ rãlé trá nõ kâtí,
Kútũ mûdrı̣́-drı̣̃-lâ-ngâ-rı̣̃ ꞌbạ̃súrú Yúdạ̃ kâ rî ꞌásĩ
Kútũ mûdrı̣́-drı̣̃-lâ-ngâ-rı̣̃ ꞌbạ̃súrú Rũbénẽ kâ rî ꞌásĩ
Kútũ mûdrı̣́-drı̣̃-lâ-ngâ-rı̣̃ ꞌbạ̃súrú Gádã kâ rî ꞌásĩ
Kútũ mûdrı̣́-drı̣̃-lâ-ngâ-rı̣̃ ꞌbạ̃súrú Ãsérã kâ rî ꞌásĩ
Kútũ mûdrı̣́-drı̣̃-lâ-ngâ-rı̣̃ ꞌbạ̃súrú Nãfãtálĩ kâ rî ꞌásĩ
Kútũ mûdrı̣́-drı̣̃-lâ-ngâ-rı̣̃ ꞌbạ̃súrú Mãnásẽ kâ rî ꞌásĩ
Kútũ mûdrı̣́-drı̣̃-lâ-ngâ-rı̣̃ ꞌbạ̃súrú Sĩmónã kâ rî ꞌásĩ
Kútũ mûdrı̣́-drı̣̃-lâ-ngâ-rı̣̃ ꞌbạ̃súrú Lạ́vı̣̃ kâ rî ꞌásĩ
Kútũ mûdrı̣́-drı̣̃-lâ-ngâ-rı̣̃ ꞌbạ̃súrú Ĩsãkárã kâ rî ꞌásĩ
Kútũ mûdrı̣́-drı̣̃-lâ-ngâ-rı̣̃ ꞌbạ̃súrú Zạ̃bũlạ́nạ̃ kâ rî ꞌásĩ
Kútũ mûdrı̣́-drı̣̃-lâ-ngâ-rı̣̃ ꞌbạ̃súrú Yõsépã kâ rî ꞌásĩ
Kútũ mûdrı̣́-drı̣̃-lâ-ngâ-rı̣̃ ꞌbạ̃súrú Bẽnjĩmónã kâ rî ꞌásĩ.
9 ꞌDĩî vósĩ rî, má drí õjílã tı̣́lı̣́lı̣́ ndrẽzó. Íîcá kô gólĩyî lãlé. Õjílã õrĩ ꞌásĩ cé tı̣̂tı̣̂, gõꞌdá võ ãngó ꞌásĩ rî ꞌbá yî ꞌásĩ ãkí ãkó, gõꞌdá tı̣̂ õjílã drí rĩꞌá âtá bê lâ rî ꞌbá yî cé tı̣̂tı̣̂ ndrĩ ꞌdó bê rĩꞌá tólâ. Gólĩyî bê rĩꞌá âdréꞌá võ gólâ Ôvârí drí rĩzó kı̣́tı̣̃ íyíkâ drı̣̃ı̣̂ gõꞌdá Kạ́bı̣̃lı̣́kı̣̃ drı̣̃ tĩtĩ kâ ró rî bê rî ândrá. Gólĩyî sõ ꞌdó ítá mvẽêmvê ꞌî, gõꞌdá kpá rĩꞌá mbı̣́rạ́ bı̣́ bê ĩyî drı̣́gạ́ sĩ. 10 Gõꞌdá gólĩyî ndrĩ ꞌdó rĩꞌá lôngó ngõꞌá ĩyî kĩ nĩ rî,
“Ôvârí kúmú ãmákâ, mã lûyı̣̂ nî, tãlâ ní pâ ãmâ trá.
Kạ́bı̣̃lı̣́kı̣̃ drı̣̃ tĩtĩ kâ ró, mã lûyı̣̂ nî, tãlâ nî rĩꞌá ãmâ pã ꞌbá ꞌî.”
11 Mãlãyíkã ndrĩ Ôvârí kâ rî ꞌbá yî âdrê ĩyî trá kı̣́tı̣̃ ạ́ngı̣́ gólâkâ ꞌdĩ rú sĩ, gõꞌdá kpá gólĩyî sı̣́sı̣́-lésĩ ró rî ꞌbá yî ndrĩ ngá lédrẽ-lédrẽ sû ꞌdĩ ꞌbá yí bê. Gólĩyî ngâ ndrĩ ꞌdó ĩyî lı̣̃fı̣́ âkólé vũdrı̣́ gõꞌdá Ôvârí rî ı̣̂njı̣̃zó. 12 Gõꞌdá gólĩyî kĩ nĩ rî,
“Ãwô-ꞌdĩ, ãwô-ꞌdĩ. Rĩꞌá Ôvârí ãmákâ rî ĩꞌdî,
îcâ trá õjílã ndrĩ drí ánî lûyı̣́lı̣́,
ãwô-ĩtí ꞌẽzó ní drí gõꞌdá kpá ánî ı̣̂njı̣̃lı̣́.
Nî ĩꞌdî mbârâkã ndrĩ lı̣́pı̣̂ ꞌî, gõꞌdá kpá tã nı̣̃nı̣̃ lı̣́pı̣̂ ꞌî,
gõꞌdá kũmũ bê zãâ gbạ́dú. Ãâꞌdô ĩtí.”
13 Gõꞌdá nĩngá sĩ, sı̣́sı̣́ lé ꞌbá ãlô drí ngãzó ámâ îjílí kĩ, “Ní nı̣̃ õjílã ítá mvẽêmvê sõ ꞌbá nõ ꞌbá yî trá yã? Ní nı̣̃ võ gólĩyî drí ânĩzó rî trá yã?”
14 Ĩtí rî, má drí tã-drı̣̃ lôgõzó gólâ drí kĩ, “Ãmbá ámákâ, ní âꞌdô îcáꞌá nĩ tã ꞌdî âꞌdálé má drí.” Ĩtí gólâ kĩ má drí rî,
Nõô ꞌbá yî rĩꞌá õjílã gólĩyî lâŋõ ândrê njı̣̃ ꞌbá trá ĩyî drı̣̃ı̣̂, gõꞌdá rĩ ꞌbá ĩyî trá tã lẽlẽ sĩ Ôvârí ꞌá rî ꞌbá yî ĩꞌdî. Gólĩyî jĩ ítá ĩyíkâ rî ꞌbá yî trá Kạ́bı̣̃lı̣́kı̣̃ drı̣̃ tĩtĩ kâ ró rî ãrí lâ sĩ, ãꞌdô ró bê ítá rî ꞌdĩ ꞌbá yî drí wãzó bê ngbángbá kólâ-kólâ.* 7.14 Nõô úlı̣́ mãnĩgõ ꞌî kĩ, gólĩyî lẽ trá kĩ, Yésũ drã trá ĩyî drı̣̃ tĩlí, tãlâ Ôvârí ãâyê ró tã õnjí ĩyíkâ bê. 15 Tã ífí gólĩyî drí rĩzó âdrélé kı̣́tı̣̃ Ôvârí kâ ândrá ũrı̣̃ ãkó rî ĩꞌdî rĩꞌá ꞌdĩ. Gólĩyî rĩꞌá Ôvârí rî lûyı̣́ꞌá ı̣̃tú gõꞌdá ngạ́cı̣̂ zı̣̃ jó Ôvârí kâ ꞌá. Gõꞌdá Ôvârí rî gógó ífífí lâ âꞌdô sũꞌá gólĩyî rú, tãlâ tã ãzãkã õzó gólĩyî dõô kô. 16-17 Lõfó ꞌé gólĩyî kô óꞌdí gõꞌdá kpá lı̣̃mvû lôvó bê. Ị̃tú ãmé zãá gólĩyî kpá kô óꞌdí, tãlâ Kạ́bı̣̃lı̣́kı̣̃ drı̣̃ tĩtĩ kâ ró kúmú gólĩyíkâ ró rî âꞌdô gólĩyî vó ndrẽꞌá õzõ lôkí ꞌbá drí kạ́bı̣̃lı̣́kı̣̃ íyíkâ vó lâ ndrẽrẽ kâtí. Gólâ âꞌdô gólĩyî bı̣̃ꞌá âjílí lı̣̃mvû lédrẽ-lédrẽ âfẽ ꞌbá rî mvũlı̣́ óró sẽ ꞌbá kô rî ꞌálâ. Gõꞌdá Ôvârí âꞌdô ı̣̃lı̣́ndrı̣̂ lĩꞌá ngbá gólĩyî lı̣̃fı̣́ sĩ. Ĩzã lâŋõ kâ îcá gõꞌdá kô gólĩyî ꞌẽlé kpá óꞌdí.
*7:14 7.14 Nõô úlı̣́ mãnĩgõ ꞌî kĩ, gólĩyî lẽ trá kĩ, Yésũ drã trá ĩyî drı̣̃ tĩlí, tãlâ Ôvârí ãâyê ró tã õnjí ĩyíkâ bê.