1 Ámâ ậdrúpı̣̃ yî ámâ îzó yí bê, tã gólâ má drí lẽlé rõô pı̣̃pı̣̂sı̣́lı̣́ ãlô sĩ rî rĩꞌá Ôvârí drí õjílã ámâ nyãányâ Yúdạ̃ yí kâ rî ꞌbá yî pãlé. Má rî rãtáã ꞌẽlé rõô Ôvârí drí, tãlâ gólâ õpâ ró gólĩyî tã õnjí gólĩyíkâ rî ꞌbá yî ꞌásĩ. 2 Má âtâ nõ tã pạ̃tı̣́ı̣̃ ꞌî ãnî drí, gólĩyî rĩꞌá lı̣̃fı̣́ ꞌbãꞌbã bê Ôvârí drı̣̃ı̣̂ pı̣̃pı̣̂sı̣́lı̣́ ãlô sĩ, ãꞌdô ró bê gólâ drí ĩyî ndrẽzó õjílã mbı̣̂mbı̣̂ ró. Gõꞌdá gólĩyî lẽé kô lạ́tı̣̂ gólâ mbı̣̂ Ôvârí drí âꞌdálé gólĩyî drí âꞌdózó ꞌálâ sĩ mbı̣̂mbı̣̂ ró rî trõlé. 3-4 Ôvârí âfẽ Yésũ trá drãlé lạ́tı̣̂ gólâ cé ãlô õjílã drí ngá pãzó rî ró. Ĩtí rî, gólĩyî tã lẽ ꞌbá trá Yésũ ꞌá rî ꞌbá yî rĩꞌá gólĩyî Ôvârí drí ndrẽlé õjílã íyíkâ mbı̣̂mbı̣̂ ró rî ꞌbá yî ĩꞌdî. Gõꞌdá õjílã Yúdạ̃ yí kâ gã tã ꞌdî trá dó. Gõꞌdá gólĩyî ûjũ tã trá kpı̣̃ı̣̂ ꞌdẽzó lạ́tı̣̂ ĩyî nyãányâ kâ rî ꞌásĩ tãlâ âꞌdózó bê mbı̣̂mbı̣̂ ró Ôvârí lı̣̃fı̣́. Gõꞌdá Yésũ ânĩ bê drãlé tã õnjí ãmákâ rî ꞌbá yî tãsĩ rî, tã gólâkâ îcâ nĩ ãmâ tã lẽ ꞌbá ró rî ꞌbá yî ꞌbãlé mbı̣̂mbı̣̂ cú ĩtí. Îcá kô tã ꞌbãꞌbã ꞌẽꞌẽ ãmákâ drí ãmâ ꞌbãlé âꞌdólé mbı̣̂mbı̣̂ ró Ôvârí lı̣̃fı̣́.

5 Tãlâ lạ́tı̣̂ gólâ mbı̣̂ Ôvârí rî ûsúzó rî tãsĩ rî, Músạ̃ îgĩ tã trá ạ̃kû ró nã sĩ tãlâ tã ꞌbãꞌbã gólĩyî Ôvârí drí ꞌbãlé õjílã drí ꞌẽlé rî ꞌẽꞌẽ lâ tãsĩ kĩ nĩ rî, “Õjílã gólâ lẽ ꞌbá trá rĩlí õjílã Ôvârí kâ ró rî, îcâ trá gólâ drí rĩzó rĩꞌá tã gólĩyî ndrĩ Ôvârí drí ꞌbãlé õjílã drí ꞌẽlé rî ꞌbá yî ꞌẽlé ĩꞌdî ãkí ãkó.”10.5 Tã ꞌBãꞌbã Ândâ 18.5. 6 Gõꞌdá Ôvârí ndrê ãnî yí lı̣̃fı̣́ õjílã mbı̣̂mbı̣̂ íyíkâ rî ꞌbá yî ró, tãlâ nĩ lẽ tã trá pı̣̃pı̣̂sı̣́lı̣́ ãlô sĩ Yésũ ꞌá. Gólâ âꞌdâ tã rî ꞌdĩ trá trậ tã îgĩ íyíkâ rî ꞌá kĩ, “ꞌDõvó nĩ îjî tã kô kĩ nĩ rî, ‘Ãꞌdî âꞌdô ngãꞌá nĩlí ꞌbũû ꞌálâ Yésũ Krístõ rî âtrõlé vũdrı̣́ ꞌá nõlé ãmâ drí rî nĩ yã?’ 7 Gõꞌdá nĩ îjî tã ãnî nyãányâ ꞌá kô kĩ, ‘Ãꞌdî âꞌdô nĩꞌá nĩ bũúũ võ gólâ õjílã ôdrã ꞌbá trá rî ꞌbá yî drí rĩzó rĩlí rî ꞌálâ, nĩꞌá Krístõ rî âtrõlé tólâ sĩ âjílí ãmâ drí ı̣̃nyạ́kú drı̣̃ı̣̂ ãmâ pãlé rî nĩ yã?’ ” 8 ꞌDĩî võ lâ ꞌá rî, õjílã gólĩyî tã lẽ ꞌbá trá Ôvârí ꞌá rî ꞌbá yî îcâ trá úlı̣́ âtálé kĩ, “Âꞌdó kô âmbâ-âmbâ ró tã âtî-âtî tãndí Ôvârí kâ nı̣̃zó. Nĩ âꞌdô îcáꞌá tã lâ nı̣̃lı̣́ dódó ãnî pı̣̃pı̣̂sı̣́lı̣́ ꞌásĩ gõꞌdá kpá tã lâ âtálé dódó.”10.8 Tã ꞌBãꞌbã Ândâ 30.12-14. Tã âtî-âtî tãndí Ôvârí kâ ãmâ drí rî kĩ, ꞌdõvó mã lẽ tã Yésũ Krístõ ꞌá gólâ ãmâ drí tã pẽzó tã lâ sĩ kĩꞌá nĩ rî, 9-10 õzõ õjílã ãzâ ãlô ãnî ꞌásĩ õlẽ tã trá pı̣̃pı̣̂sı̣́lı̣́ ãlô sĩ kĩ, Ôvârí ꞌê Yésũ trá lîdrílí lédrẽ-lédrẽ ró õdrã ꞌásĩ, gõꞌdá õzõ gólâ ãâtâ tã íyî tı̣̂ nyãányâ sĩ ãzí-ãzí ãzâ ꞌbá yî ândrá kĩ, Yésũ ĩꞌdî rĩꞌá Kúmú gólâ Ôvârí drí âjólé ãmâ pãlé rî, ĩtí Ôvârí âꞌdô gólâ rî pãꞌá tã õnjí gólâkâ rî ꞌbá yî ꞌásĩ âꞌdólé yí drí ndrẽlé tã mbı̣̂ ꞌbá ró yí lı̣̃fı̣́. 11 Gõꞌdá tã îgĩ Ôvârí kâ Yésũ rî tãsĩ rî kĩ, “Õjílã ndrĩ gólĩyî tã lẽ ꞌbá Yésũ ꞌá ꞌdíyî pã ꞌbá ró rî ꞌbá yî âꞌdô nı̣̃ꞌá lâ kĩ, pạ̃tı̣́ı̣̃ Ôvârí âꞌdô gólĩyî pãꞌá trá tã õnjí ꞌásĩ õrẽ íyíkâ fẽzó drílĩyî õjílã íyíkâ ró.” 12 Nĩ ndrê drẽ, Ôvârí rî õjílã ndrĩ pãlé lạ́tı̣̂ ãlôlâ ꞌdĩ ꞌásĩ. Ĩtí rî, gólâ rí kô õjílã Yúdạ̃ yí kâ pãlé lạ́tı̣̂ ngĩî lâ ãzâ ꞌásĩ lạ́tı̣̂ gólâ drí rĩzó õjílã õrĩ ãzâ ꞌbá yí kâ pãlé rî rú sĩ. Yésũ ĩꞌdî rĩꞌá kúmú ãlô gólâ Ôvârí drí ꞌbãlé drı̣́-ãcê bê õjílã íyíkâ drı̣̃lı̣́ õrĩ ndrĩ ngĩíngî rî ꞌbá yî ꞌásĩ. Yésũ fẽ õrẽ trá ãmbá õjílã ndrĩ gólĩyî lâkpã ꞌbá trá gólâ rú rî ꞌbá yî drí. 13 Tã îgĩ Ôvârí kâ kĩ, “Õjílã ndrĩ gólĩyî Kúmú ãmákâ ꞌdĩ ậzı̣́ ꞌbá ânĩlí ĩyî pãlé rî áâꞌdô gólĩyî pãꞌá.”10.13 Yõwélẽ 2.32.

14 Gõꞌdá õjílã ãzákôlâ ꞌdĩ âꞌdô tı̣̂ ânyáꞌá tã îjî sĩ kĩ, “Âꞌdô kó îcáꞌá ángô tí ró õjílã drí nĩzó Kúmú Yésũ ngálâ ĩyî pãlé, õzõ ngã gólĩyî õlẽ tã gólâ ꞌá kôꞌdáwá rî yã? Gõꞌdá gólĩyî âꞌdô îcáꞌá ángô tí ró tã lẽlé Yésũ ꞌá, õzõ lạ́tı̣̂ ãꞌdô trá yûꞌdạ́wạ́ gólĩyî drí tã ârízó gólâ rî tãsĩ rî yã? Ngã gõꞌdá õzõ õjílã ãzâ ãꞌdô trá yûꞌdạ́wạ́ Yésũ rî tã pẽlé gólĩyî drí rî, gõꞌdá âꞌdô îcáꞌá ángô tí ró gólĩyî drí tã nı̣̃zó gólâ rî tãsĩ yã? 15 Ngã gõꞌdá Ôvârí õjô tã pẽ ꞌbá kô õjílã rî ꞌdĩ ꞌbá yî drí rî, gõꞌdá õjílã ãzâ âꞌdô nĩꞌá tã pẽlé gólĩyî drí Yésũ rî tãsĩ rî ángô tí ró yã?” Nĩ ndrê drẽ, tã îgĩ Ôvârí kâ âtâ tã ãmâ drí kĩ, “Õzõ õjílã ãzâ ꞌbá yî õcâ õjílã ngálâ tã Yésũ kâ pẽlé rî, tã gólĩyíkâ âꞌdô õjílã gólĩyî tã âtî-âtî gólĩyíkâ Yésũ rî tãsĩ rî ârí ꞌbá rî ꞌbãꞌá âꞌdólé ãyĩkõ ró tã âtî-âtî ꞌdĩ tãsĩ.”*10.15 Úlı̣́ lâ yî âtâ tã kpá kĩ, õjílã gólĩyî tã âtî-âtî ꞌdĩ ârí ꞌbá ꞌdĩ ꞌbá yî âꞌdô gólĩyî lûyı̣́ꞌá õjílã sũsũ ró. Ĩsáyã 52.7

16 Õzõ gõꞌdá õjílã ãânĩ trá tã âtî-âtî tãndí Ôvârí kâ Yésũ rî tãsĩ rî pẽlé õjílã ãmákâ Yúdạ̃ yí kâ rî ꞌbá yî drí rî, cé rĩꞌá õjílã rî gógó Yúdạ̃ yí kâ ũrûkậ ꞌbá yî lẽ ĩyî tã nĩ úlı̣́ rî ꞌdĩ ꞌbá yî ꞌá âꞌdólé tã pạ̃tı̣́ı̣̃ ró. Ạ̃kû ró nã sĩ rî, tã ậngũ ꞌbá Ĩsáyã âtâ úlı̣́ trá gólĩyî tãsĩ õjílã gólĩyî tã lẽlẽ ãkó rî ꞌbá yî ró. Gõꞌdá gólâ îjî tã kĩ nĩ rî, “Õjílã ãzãkã fí bê rĩꞌá gólâ tã âtî-âtî ámákâ ánî tãsĩ rî lẽ ꞌbá trá rî ró yã?”10.16 Ĩsáyã 53.1. 17 Nĩ ndrê drẽ, õzõ õjílã Ôvârí drí jõlé rî ãâtâ úlı̣́ trá Yésũ Krístõ rî tãsĩ rî, ꞌdĩî Ôvârí njı̣̃ lạ́tı̣̂ trá trậ õjílã drí tã âtî-âtî tãndí íyíkâ Yésũ rî tãsĩ rî ârízó. Gõꞌdá õzõ gólĩyî ãârî tã âtî-âtî rî ꞌdĩ trá rî, ꞌdĩî gólĩyî îcâ trá tã lẽlé ꞌá lâ.

18 Gõꞌdá má îjî drẽ tã ãnî tı̣́ kĩ, “ꞌDĩî fí rĩꞌá tã pạ̃tı̣́-pạ̃tı̣̃ ꞌî kĩꞌá nĩ rî, õjílã Yúdạ̃ yí kâ rî ꞌbá yî ãârí ĩyî tã âtî-âtî Ôvârí kâ Yésũ Krístõ rî tãsĩ rî kôꞌdáwá yã?” Ĩtí rî, má îcâ trá tã ꞌdî lôgõlé kĩ, “Õjílã ꞌdî ꞌbá yî pạ̃tı̣́ı̣̃ ârî ĩyî tã âtî-âtî ꞌdĩ trá. Órî trá pẽ bê lâ võ ndrĩ gólĩyî drí rĩzó rĩlí rî ꞌbá yî ꞌásĩ.” Gõꞌdá âꞌdô tã Ôvârí kâ rî vó ró rî, Dạ̃wúdı̣̃ âtâ trá kĩ,