1 Taja, tme, tao, tano na ro jõ ksoh; watum aro rau beta ro anu nri to, nfot srot to ma! Nse kʼanu nhaf ma! Raa mawat sioh mawe ana nabi. Raa mawat sioh mawe Allah ybis ana mama mkyas bo wAit. Ana sioh mawe feto, he mfe; bokyas wana to mbam kabes. Tna ana masen mamo mbesruf raa mam woyõ-woya ana mamo mam tabam refo ye. Feto to, raa mama mkyas bo kʼanu to, anu sanet nmat sas watum rana wia. Tna mfi bo bokyas rana mbam kʼHar ro Tuhan to fee, nri tna smot bokyas reto ma! 2 Kbe anu bno fyi re bhar watum reto to mbam Har ro Tuhan fe mfe a? Ro moof to anu btu sanet raa ro mkyas watum reto wia bwe, “Fyi, nyõ smot nawe Yesus Kristus tait ybam Allah yama mam tabam refo, tna haberek yamo raa ati, fe mfe a?” Tna soh ait yawe si yawe, “Ae, Jõ smot.” Kbe anu bhar bwe Har ro mjin kʼait yhaf mato to mbam kʼAllah. Feto to bokyas raa retait reto anu bri. 3 Menohe soh ait ywaar bo reto yawe si yawe, “Yesus Kristus tait Raa ro ybam Allah yama to fee.” Kbe anu bhar bwe watum raa retait mbam Har ro Tuhan fee. ⌞Feto to nri bokyas rait to ma! Smot ma!⌟ Bokyas rait reto mbam Kabes ro Knait Kristus. (Tiwya anu nri raa mkyas mawe, “Ait sait ro yasom ‘Kabes ro Knait Kristus’ kbe yama.” Tna jõ tawe kʼanu tawe ait retait yama oh.)

4 Kukek wojõ; nnaut nwe anu fo ku ro Allah wAit. Tna Har rAit ro mjin kʼanu bhaf wanu to, mase toni miwer. Kabes Yabi (Iblis) tait yase ybo bombra ro tabam refo sai. Tibyo kabes sor ro ait ybo to mtai miwro anu, ku ro Allah, to fee. Har ro Tuhan reto matak miwer. Kbe mno kabes weto mhau mte. 5 Guru sor ro wase Allah weto to mama mkyas bo ro mbam tabam refo sai. Tibyo raa ro wase Allah ja mari bokyas ro guru weto mkyas. 6 Menohe anu fo ku ro Allah wAit. Tna awya ro yari bokyas ro anu bkyas to, anu bhar bwe ait retait yhar Allah yhaf mato rAit kaket. Tna raa ro mari bo ro anu bkyas to fee, anu bhar bwe ana weto to ku ro Allah wAit fee. Iso reto oh mi anu bhar kaket bokyas aro rau weto mbam tiyo: Taro mbam Har ro ati, tna taro mbam har kabes ro besruf raa ye.

7 Taja, tme, tao, tano na ro jõ ksoh; natmof raa anya kaket. Allah oh mi yno re anu natmof raa anya saah. Awya ro yatmof raa anya kaket to, ait retait ku ro Allah rAit. Tna yhar Allah yhaf mato rAit ye. 8 Allah ja yatmof raa. Feto to anu bhar bwe awya ro yatmof raa anya to fee, ait retait wase Allah. 9 Allah tait yabe Ku sait aran tomu yum. Tna ybis Ku ro yare retait yama tabam refo yno iso re kbe anu bhau hame wajin. Feto oh mi anu bhar bwe Allah yatmof anu toni. 10 Tiwya anu nhafri Allah fee. Menohe Allah yatmof anu matim wia fefo: Tiwya iro ro anu bno weto misti re Allah kmo anu. Tna Ait ybis Ku rAit yroh yama yake safo wanu. Feto to yno re Allah kmo anu u fee. 11 Taja, tme, tao, tano na ro jõ ksoh; Allah yatmof anu toni. Fyi-fya rau to, batmof raa anya kaket mfi Ait yatmof anu! 12 Raa sait bo aro ymat Allah fefares. Menohe bi Ait yhau yhaf su ysya anu to, mafer rau to anu batmof raa anya. Raa mmat bo anu ja batmof raa anya to, aro mabut fee. Tna kbe ana mhar mawe, “Allah oh mi yno re ana matmof raa anya.”

13 Anu fo bhau bhaf sau su bsya Allah fe mfe a? Tna bi Ait yhau yhaf sau su ysya anu fe mfe a? Allah ybis Har rAit mama mjin kʼanu bhaf wanu oh. Feto oh mi anu bhar kaket bwe anu bhaf sau su bsya bi Ait tna bi Ait yhaf sau su ysya anu ye. 14 Tiwya ati ro Ait yhau mam tabam refo fares, amu*Yohanes ykyas ait yesait ysya kuber ro Yesus wAit taro sor. nesait nbo tna nmat Yesus yabo rAit. Feto to amu nhar nwe bokyas refo mabo tu oh. Tna amu nkyas yasom rAit nwe Allah ybis Ku rAit yroh yama tna sotak iro raa beta. 15 Awya ro ykyas abyõ yawe, “Yesus tait Ku ro Allah yare.” Allah yhau yhaf sau su ysya raa retait tna raa retait yhaf sau su ysya Allah ye. 16 Allah yno bo ro riwai weto afo re anu bhar kaket bwe, “Bi Ait yatmof anu toni.” Feto to anu smot bi Ait.

Allah ja yatmof raa. Tna awya ro ja yatmof raa anya to, ait retait yhau yhaf sau su ysya Allah tna Allah yhaf sau su ysya ait retait ye. 17 Bo ro riwai reto oh mi mno re anu ja batmof raa anya to, aro mabut fee. Soh anu bhau bhaf sau su bsya Allah to, meen ati ro bi Ait ytu safo mana kʼraa sait-sait to, kbe anu waa fee. Anu bhar bwe wore anu bhau mam tabam refo fares to, anu ja batmof raa anya ye mnan fi bi Ait yesait ja yatmof raa ye. 18 Soh anu batmof raa anya kaket to, anu bhar bwe meen ati ro bi Ait ytu safo mana kʼraa to, kbe yno bo mai kʼanu fee. Feto to anu waa Allah fee. Menohe raa ro ja matmof raa anya fee, ana weto kbe mnaut yyi ana mamos wana tna ana waa ye fea! 19 Allah yatmof anu wia matim tibyo anu ne nhafri bi Ait ye. 20 Awya ro yawe, “Jõ thafri Allah.” Menohe ait knait raa ro Kristen taro to, ait retait yhar Allah boatmof rAit fee saut! Yawe ait yhafri Allah to, ait sioh! Raa ro tabam refo ja anu bmat bkah bsu wanu. Tna soh ait retait wase yatmof raa ro ja ymat to, fyi mkah Allah; raa ro anu bsu wanu bahni? Ait ro riwai retait wase yhafri Allah ye tu oh! 21 Bobis ro Allah oh mefo: “Awya ro yhafri Jõ to, fyi-fya rau to, kbe ait yatmof raa ro Kristen taro ye.”