1 Taja, tme, tao, tano na; tiwya amu watum kʼanu nkyas iso ro Allah ksoh anu nkro re kbe Ait yhaf mnan anu. Tna amu nhar nwe anu ja nhau kro iso reto. Tna mfo refo amu ne sobu anu nwe kro iso reto kaket renti. Amu soh-soh anu feto mkah Tuhan Yesus yasom rAit. 2 Iso ro tiwya amu nbis anu nkro reto to, anu nhar oh. Tna mkah Tuhan Yesus yatak rAit to, amu nbis anu nkro iso reto. 3 Bo sau ro Allah ksoh anu nno to, yawe nhau nfi raa wAit ro mato mboh sai. Au oh mi mbeak wyah bo to fari. 4 Ait ybis anu raa sme aro sait-sait yoo fnya rait tna yhau su, yjin su ysya au mesait aran sai. Iso ro raa makin mawe moof meto. Tna raa ro mhau mno bo ro Allah wAit sai to, ja nkro iso reto ye. 5 Srau oot-oot fnya raa to ma. Nno bo nfi raa ro wase Allah to ma. Ana weto ja masmamo. 6 Soh raa sme aro yno-na bo to, ait yno bo ro mkair mai yafoh rait oh meto. Nnaut nwe kbe Tuhan yno bo ro samyoh btek mai kʼraa sme ro yno bo mkair mfi feto to. 7 Allah ysok anu bma bo kʼAit to, yawe anu bno bo ro mkair to ma tna bwyah ma. Ait ybis anu bhau bno bo wAit sai to. 8 Awya ro hawe bo yari bo refo fo, ait yiwana raa fee, yiwana Allah ro yoo Har rAit yse kʼanu oh meto.

9 Anu raa Kristen ja natmof raa anya. Bo reto anu beta nhar oh. Bo reto anu nri kʼAllah yesait. Feto to amu ne nkom bo reto nwe afat fee. 10 Jõ thar tawe anu natmof raa Kristen ro mhau mam provinsi ranu ro Makedonia reto beta. Menohe amu ksoh nwe anu ne nno u hair sai. 11 Nhau nsya raa anya knar sai. Nbet nkyas bo ro raa mati to ma. Nhau to, nesait nkah bo wanu sai mfi bo tiwya amu nkyas kʼanu to. 12 Nhau nno bo reto afo re raa ro mne mmat anu to, mawe, “Raa ro Kristen weto, ja raa ro mno bo ro moof sai.” Tna nhau nkah bo wanu feto re kbe anu nhau bo marak fee, tna kbe anu aro nwof bo ro raa roto mno mati fee ye.

13 Taja, tme, tao, tano na; nnaut raa Kristen ro mhai oh to, sraujin toni ma. Nhar nwe meen ana me mrok masen. Menohe raa ro smot Yesus fefares to, soh raa wana mhai to, kbe ana sraujin tu oh. 14 Anu bhar bwe Tuhan Yesus tiwya yhai tna ye yrok yasen. Feto anu bhar bwe Allah meen yno raa ro msam wai kʼYesus tna mhai to, kbe mrok masen ye. Mrok masen tna msya Ait mhau su ye. 15 Tiwya Tuhan yesait yawe kʼanu yawe meen anu ro bhau fares ati ro Ait yama to, kbe anu bsen bmo tru Ait wia fee. 16 Ati reto to, raa mari mai maboh mbam malaikatTuhan ro mase sau, tna raa mari saa buk-buk ro Allah mfi ye. Tna Tuhan yesait yroh ybam sawro rAit yama. Tna raa beta ro smot Tuhan Yesus tna mhai wia to, kbe ana mrok masen maut mamo mo kʼAit matim wia. 17 Tna fo anu ro bhau baam mam tabam refo fares to, kbe Allah tubat anu buut bmo ye. Meen anu buut bmo bsya ana ro mhai tna mrok masen wia ye. Tna anu beta bmo bkai Tuhan Yesus mam ayoh skes abyõ tna bmo bhau bsya Ait mamo snok mam hame wajin ye. 18 ⌞Soh anu aro nhai to,⌟ nnaut tna nkyas bokyas refo kʼanya. Bokyas refo kbe mno re anu sraujin toni fee.