Aam ro Paulus Ykom tna Tiim Mamoʼt Jemaat ro
Efesus
1
Paulus ymah meen kʼraa ro smot Yesus mam kota ro Efesus
Aam refo mbam kʼjõ, Paulus. Allah ksoh tibyo jõ tamo raabis ro Kristus Yesus rAit. Jõ tkom aam refo kʼanu raa ro Allah wAit mam kota ro Efesus. Anu to, beroh smot Kristus tna Allah yse anu nmo raa wAit nsya Kristus Yesus su ye. Jõ skabuk Bja Allah, re Ait ysya Tuhan Yesus Kristus kbe matmof anu tna mno re anu nhau nhaf tnok sai.
Allah yno bo moof kʼanu tibyo anu bibi Ait
Tuhan ranu Yesus Kristus tait, ytu Allah Yaja rAit. Tna Allah ymat anu bsya Kristus su tibyo Allah yno bo ro moof beta kʼanu. Bo ro moof weto to, anu bkai mam tabam refo fee. Menohe Allah siwyan bo ro moof weto kʼanu meen tru mam sawro rAit. Mabo oh tibyo anu bibi Allah bwe yno bo ro moof ati beta kʼanu to! Bo moof sau ro Allah yno to, tabam refo Ait ysair fefares to, Ait ysok anu oh. Feto to nma bibi Ait! Ait ysok anu afo re Allah ymat anu yawe anu bsya Yesus su oh. Anu bsya Yesus su oh mi Allah ymat anu yawe anu bfi raa ro wase mber safo ye. Tna Ait ysok anu re anu bhau bno bo wAit sai ye. Tna bo sau naut ro Allah yno kʼanu to, Ait yayõ anu bmo kukek ro Ait ytos. Feto to nma bibi Ait! Tiwya tinyi, anu brak fares to, Allah yhafri anu tibyo yesait yawe kbe Ait yayõ anu bmo kukek wAit feto. Tna Yesus Kristus siwyan iso re Yaja yayõ anu kʼAit ytos to. Allah yhaf moof tibyo yayõ anu mamyot bo ro Ait ksoh sai. Ait yayõ anu feto, afo re kbe anu bhar boatmof rAit ro msai toni tibyo bibi Ait. Tawe u tawe, Allah yhafri Ku rAit Yesus toni. Tna Yesus ysair iso re Allah yatmof anu tibyo yayõ anu bmo kukek wAit to. Iso ro Yesus ysair kʼanu reto oh mi yroh yoo mees rAit yfes anu. Iro ro anu bno to, Ait yyon beta. Allah ymat anu yawe anu bsya Yesus su oh. Allah yatmof anu yoo mees ro Yesus yyon anu feto. Tna boatmof ro Allah to, kta ro mabyoh maut toni. Tna Allah ro yhar bombra beta tna yakit maan ati tait, yhaf reo yoo boatmof rAit reto yatmof anu sai. 9-10 Tna bo sau naut ro Allah yno to, Ait yasbrah bo sau ro Ait ksoh anu nhar ye. Feto to nma bibi Ait! Tiwya Allah ymyõt bo ro Ait ksoh yno baro, raa mhar fee. Makyon ro matim wia mkak oh. Makyon ro tna fo, Allah yasbrah bo reto kʼanu yawe Yesus yatak ybo bombra beta fo. Ybo bombra ro mhau mam sawro ye tna bombra ro mhau mam tabam refo ye. Allah yhaf moof tibyo yno feto. Ait saim makyon refo matim wia tna Allah tubat Yesus yhau abyõ ybo bombra weto to. 11 Tna Allah ja yisti bombra beta mamo mnan si bo ro Ait ksoh. Tiwya tinyi, anu brak fares to, Ait ysok anu mnan si bo ro Ait ksoh sai. Ysok anu ymat anu yawe anu bsya Kristus su, tibyo yawe anu bmo raa wAit. 12 Tiwya anu smot Kristus binaut bwe meen kbe yoo bo yuumto kʼanu. Allah ysok anu btim wia feto afo re kbe raa mmat bo moof ro Ait yno kʼanu reto tibyo mbibi Ait. 13 Tna ati ro anu nri bokyas ro ati, ati ro anu nri Bokyas Moof (Injil) reto ro merif iso ro raa mkai riof to, anu nfot tna nse kʼanu. Anu smot Kristus to. Anu smot Ait tibyo Allah yoo Har rAit yse kʼanu re kbe anu nhar nwe anu nmo raa wAit nsya Kristus su. Har ro Ait yoo yee kʼanu reto to, Har rAit yesait ro tiwya ysi. 14 Tiwya Allah yoo Har rAit yuumto kʼanu matim wia. Ait yno bo sau ro tiwya ysi kʼanu reto mabo oh. Feto to, anu bhar bwe meen Ait yuumto bo roto ro Ait tiwya ysi kʼanu to ye. Tna Allah yfes anu re anu bmo raa ro meen Ait ybo ye. Kbe raa mmat bo moof ro Ait yno weto to tibyo mbibi Ait. 15-16 Jõ tnaut bo weto beta. Tna raa mkyas anu kʼjõ ye. Raa mawe anu smot Yesus Tuhan ranu. Tna mawe anu raa ro Allah wAit beta to, ja anu natmof anya beta ye. Bokyas ro jõ tari reto mno re ja jõ skabuk anu tayoh asik mase kʼAllah. Jõ sorni anu fee. 17 Tna jõ tayoh re Ait yoo Har rAit yno anu nkit maan tna yerif bonaut wAit kʼanu re kbe anu nhar Ait kaket ye. Yesus KristusTuhan ranu ja smot Allah ye. Tna Allah tait, Bja ranu. Ait yase rAit msai toni. 18 Tna jõ tayoh re Allah yoo kek rAit yram anu nhaf afo re kbe anu nhar bo baro wefo: Ro sau to, anu ro Ait ytu nmo raa wAit to, jo skabuk re kbe anu nhar ninaut sawro ro Ait siwyan kʼanu. Ro nkro to, kbe anu nhar kta wAit ro meen Ait yuumto kʼanu. Kta ro msai toni weto, kbe yuumto kʼanu nsya raa wAit roto beta ye. 19 Ro tis to, jo skabuk re kbe anu nhar Allah yatak rAit ro msai toni kʼanu ro smot Yesus. Tak roto beta to ssafo fee. Tak rAit ro msai toni reto oh mi tiwya mno Allah ytai 20 yno Yesus yrok yasen. Tna tubat Ait yamoʼt sawro rAit. Tna yse hre ysya Ait mam yajoh ro yatem ati; hroh ro mase reto. 21 Mfo refo Kristus hre abyõ bombra beta. Tna ro masom roto beta mhau mte sai. Pemerintah ye, aban mana sor ye, ro mase ye, msya bobot sor ye, mhau mte beta. Kristus hre abyõ feto mam makyon refo sai fee. Kbe Ait hre abyõ feto mam makyon ro meen mama ye. Ait hre abyõ yum. 22-23 Tna Allah yoo bombra beta yse mam Yesus yatem ybo afo re kbe Ait yase tna bombra weto mari Ait. Tna jemaat rAit mfi Ait yetsu. Tna Allah yse Yesus yamo mana rau. Tna jemaat rAit msya Ait su to mhau muuf kaket. Tna Ait oh mi yhau mam bombra beta tna yno bombra beta weto mhau muuf kaket ye.
Tinyi anu bhai sai menohe Allah tubat anu brok baam