1 Yesus sikba amah ro Yairus tna Ait ysya kuber wAit hah me mamoʼt remo rAit. 2-3 Ayõ ro raa ntmoh (hari Sabat) to, Ait yamoʼt samu watum raa ro Yahudi. Tna Ait yasen ykyas bo kʼana. Raa ro mari bo ro Ait ykyas to, mrok ktak. Ana mawe, “Bi refi fi, raa ro ja yfen ara sai. Ait yoo watum refo mbam woyõ? Tna Ait yno bo ro msai fyi? Bi Ait refi fai Maria makut. Tna Yakobus, Yoses, Yudas, ysya Simon mao rana fe mfe a? Tna ja yano na mhau msya anu mam remo ranu ye!” Ana mhar Yesus yme, yano na tibyo ana smot Ait fee. Ana mnaut mawe Ait Mesias fee. Mawe ait besruf ana sai feto. Tibyo ana kmo Ait. 4 Tna Yesus yawe kʼana yawe, “Nabi ro Allah ybis yama to, ja raa mari ait mam woyõ-woya yamo sai. Menohe mam remo rait yesait to, ja raa hawe mari ait. Tna yaja, yme, yao, msya yano na ja hawe ye. Tna raa ro amah rait to, hawe ye.” 5-6 Raa ro remo reto smot Ait to fee. Tibyo Ait yrok ktak. Tna Ait yno bo ro msai aro kaket mam remo rAit fee. Ait yatem ytor yisoh raa ro kiyam mabo baro sai.

Tna Yesus yamo ykyas bo yamo yur mam remo roto taro naut. 7 Ati sau to, Yesus ytu kuber wAit mabo 12 weto mama mo kʼAit. Tna Ait yoo yatak rAit yee kʼana re kbe ana mikyak kabes ro mbo raa to sor. Tna Ait ybis ana mabo ewok-ewok masen mamo hayah-hayah. 8 Ait yawe kʼana yawe, “Nmo ntem marak sai, nbo yu mkah boit, msya pitis ye ma. Nbo armuk mesait aran sai. 9 Nse sandal mam naa sai, tna nbo ratan roto taro ro kbe nyum to ma. 10 Ati ro anu twok mam remo to, soh raa sait yoo anu yse mam amah rait to, nhau oh nsya ait mam beto mamo snok mam wore anu nsen sikba remo reto. 11 Ati ro anu twok mam remo taro to, soh raa mitrah amah wana kʼanu fee, tna hawe mari bokyas ro anu nkyas to, sikba remo reto nmo. Sikba remo reto nmo to, bes-baas bohasyaf ro mhau mam naa to akus sai. Nno feto afo re ana weto mhar mawe anu bitsre ana akus. Ana hawe bo mari bo ro anu nkyas. Feto tibyo ana mesait oh mi misti kair ro meen mama mai kʼana.”

12 Kuber ro Yesus wait mabo 12 weto masen mamo. Ana mamo wosa Watum ro Allah kʼraa mawe, “Nashana tna bitsre iro wanu.” 13 Ana mikyak kabes mawat frok mbam raa. Tna ana moo minyakzaitun maya ngkaru kʼraa ro kiyam mawat ye, tna kiyam rana marak.

14 Yesus yno bo ro msai mawat tibyo raa mkyas Ait yasom faram mamo snok mam arin aso beta. Tna raja Herodes yari Yesus yasom ye. Raa mnaut mawe, “Ait refi fi Yohanes Pembaptis, Ait yrok yasen. Reto oh mi Ait yatak yno bo msai weto to!” 15 Menohe raa taro mawe, “Ait tait Yohanes Pembaptis fee. Ait tait nabi Elia.” Tna raa taro mawe, “Ait tait Elia fee. Ait tait nabi ro Allah ybis sait mfi bo nabi na ro tiwya tinyi Ait ybis ye.” 16 Raja Herodes yari feto tibyo yawe, “Raa refi yatak yno bo ro msai. Tiwya jõ tbis raa ktan Yohanes yana yajat ne. Ait yrok yasen oh metait!”

17-18 Tiwya raja Herodes ytak fnya ro yao Filipus rait. Masom rau to fai Herodias. Yohanes yari feto, tibyo yastako raja Herodes yawe yber safo oh meto. Tibyo raja Herodes kmo Yohanes tna ybis raa mamo mfot Yohanes make. Ana mfot ait tna makah mamo mbu mam bui. 19 Bo ro Yohanes yawe reto mno re fai Herodias mhaf mkair. Tibyo au saso iso re kbe raa mame Yohanes yajat. He mfe. 20 Raja Herodes kmot ait wa wea. Ait yhar yawe Yohanes ja yno bo ro Allah ksoh sai. Tna yhar yawe Yohanes tait raa ro Allah rAit ye. Tibyo Herodes waa, tna hawe yno bo ro mkair mai kʼYohanes. Ait ynaut yawe kbe Allah yno bo ro mkair mai kʼait riryõn. Tna raja Herodes ksoh yari Yohanes ykyas Watum ro Allah ye. Ait beroh hre yari, menohe bokyas weto mno ait miskawowo ye.

21 Fai Herodias mhau ste ati ro raja Herodes yakyõ hwiat rait ro tiwya yme mabe ait. Raja Herodes yoo taah yee kʼraa mase sor mama. Ait ymen raa ro ja mbo provinsi ro Galilea, raa mase ro mbo raa sbe ye, tna msya raa manes ro mhau mam rabin reto taro ye. Ana mama sohmaam bo su mam bokyõ reto. 22 Ana makyõ bokyõ reto to, ku ano ro fai Herodias rau masen smar. Herodes ysya raa ro mamaʼt bokyõ fo, ana hre horit ku au reto bo smar. Herodes ksoh bo ymat ku au. Tibyo ait ytu ku au reto yawe, “Nyõ ksoh bo bawya? Nayoh sai. Kbe jõ too tee kʼnyõ tu oh! 23 Jõ tsioh fee; bawya sai ro nyõ nayoh to, kbe jõ too tee kʼnyõ. Soh nyõ nayoh rabin ajõ refo hariyah sau to, kbe jõ too tsan kʼnyõ sai!” 24 Ku au mari feto, tibyo frok mamo mtu kʼmme mawe, “Tme, kbe jõ tayoh bawya ee?” Mme mawe kʼau mawe, “Nayoh Yohanes Pembaptis yana!” 25 Ku au reto hah me mamo mo kʼbi Herodes mawe, “Jõ tayoh raa mame Yohanes Pembaptis yajat! Nno fooh tna sbi yana nasyõ ait yana abyõ mam baki sau, noo nama nee kʼjõ.” 26 Raja Herodes yari feto, tibyo ynaut yyi. Menohe riwai ait ysi bo kawi oh. Yafoh na mari wia oh no, tibyo ait ye yabe u fee. 27 Feto mam weto si fo, ait ybis raa sait yawe, “Namo sbi Yohanes yana nakah nama!” Tna raa ro ja yno feto yari tna yamoʼt bui ktan Yohanes yana. 28 Ait yoo Yohanes yana yse abyõ mam baki, yasyõ yakah yama yee ku au reto. Tna ku au reto makah mamo mee kʼmme mmat ye.

29 Kuber ro Yohanes wait mari feto, tibyo ana mama moo ajat ro Yohanes. Moo ajat tna makah mamo sama mam isra mato.

30 Raabis ro tiwya Yesus ybis weto, ana hah me mama siret su msya Yesus. Ana hah mama tna mkyas kʼAit bo bawya ro ana mno msya bo ro ana mkyas kʼraa ye. 31 Ati reto raa msis-sas mamo-me mmat Yesus tibyo ana msui, hre mait boit fee. Tna Yesus yawe kuber wAit yawe, “Nma, anu bmo saso wore mimon aro afo re anu sne hoh, biit boit, tna bjin baro rere bo ye.” 32 Tibyo ana masen maut wiak mamoʼt yuk ro mimon sau. 33 Menohe raa msis-sas weto mmat ana bo masen sikba yuk reto mamo. Tna ana weto mhar wore ana masen mamo ye. Tibyo raa ro mbam remo kene mam weto sor, ana mawat masen mamo iso snok wia mam yuk ro ana mamo reto. 34 Tna Yesus ysya kuber wait snok mam maru maam jaro. Ait ymat he raa msis-sas mros wea. Tna ynaut yawe, “Raa ro mkyas Watum ro Allah kʼraa wefo aro fee. Ana mfi domba ro mhau akus sai. Raa ro kmot ana aro fee.” Tibyo Ait yatmof ana tna ykyas bo mawat kʼana ye.

35 Hreha oh tna kuber ro Yesus wAit mama mo kʼAit mawe, “Mti oh. Tna yuk refo fo riamo. 36 Nbis raa wefo masen mamo rof, re kbe ana saso boit ro mait aro. Kbe ana saso mam remo msya kota ro mhau kene mam wefo sor.” 37 Menohe Yesus yawe kʼana yawe, “Anu nesait noo boit aro nee kʼana mait.” Tna kuber wAit weto mawe kʼAit mawe, “Amu ntai fee! Soh amu noo boit mkah nee kʼraa msis-sas refo mait to, kbe pitis mabyoh maut toni! Pitis 200 dinar*Tiwya raa mkah bo ti sau to, ja raa maren ana boren pitis dinar sau. bo feto!” 38 Menohe Ait yawe, “Anu nse roti jya meto? Sik nmo nmat wia.” Ana mamo mmat tna hah me mama mawe kʼYesus mawe, “Roti maat msya syoh mana ewok aran sai fo.” 39-40 Tna Yesus ybis re raa hre mam bosafom ro moof weto. Tna ana taro mabo 50 hre kbair sau hayah-hayah. Tna taro mabo 100 hre kbair sau hayah-hayah ye. 41 Tna Yesus yoo roti trion maat msya syoh mana ewok reto ybo. Tna heyut mam ayoh yayoh asik mase kʼAllah. Tna Ait haber roti weto tna yee kuber wAit yawe ana saim kʼraa ro hre weto sor. Tna yiti syoh mana ewok reto saim kʼana beta ye. 42 Raa weto mait tna mhaf matu beta. 43 Menohe roti mabuf taro msya syoh to msis mhau fares. Kuber ro Yesus wAit soo boit weto tna mfau mam keranjang trion 12 matot. 44 Raa sme ro mait bo weto mabo trion 5000 bo feto.

45 Ana mno bo weto mkak si fo, Yesus ybis kuber wAit maut wiak matim wea mamoʼt remo ro Betsaida. Yesait yhau yawe ybis raa msis-sas wefo mamo bana. 46 Ait bitsre raa mamo bana tna Ait yaut yamo skabuk mam faut mana sau.

47 Arin mti oh. Wiak ro kuber wAit maut fo mamo oh mam maru masuf. Tna Yesus yhau akus fares mam maru maam.

48 Foos mfi mama mbam ati ro kuber weto miin wiak mamo, tibyo ana miin wiak reto hrowyõ mhai. Mam wore ayõ ro tuuf bo feto, Yesus yata abyõ mam aya mata yama yo kʼana. Ana mmat Ait yama, yfi bo yama yiwrek ana iti yamo bo feto. 49-50 Kuber wAit mmat he Ait yamo abyõ mam aya mata yama tibyo ana miskawowo, mwohrarar mawe, “Nmat, bo mnat anu!” Menohe Yesus yawe kʼana yawe, “Knar oh, waa ma! Jõ mefi!” 51 Ait yaut mam wiak rana si fo, foos mrok mnem. Kuber wAit mrok mtak mmat bo msai ro Yesus yno reto. 52 Ana mmat bo msai ro Yesus riwai yno msya roti weto. Menohe ana srau mnaut yatak rAit fefares.

53 Ana mamo snok mam aya maam jaro to, ana miti wiak rana mam oo ro Genesaret. 54 Ana mroh mbam wiak mato mam weto si fo, raa mmat he Yesus yama. 55 Tibyo raa beak-ak anya mhoh mamoʼt remo ro kene mam weto mbra. Tna katar raa ro kiyam sor fo mama mo kʼYesus. Soh raa mari Yesus yhau mam yuk sau to, kbe ana katar raa ro kiyam weto mama mo kʼAit mam yuk reto ye. 56 Woyõ-woya sai Yesus yamo to; mam kota ye, mam remo ye, kbe raa msis-sas makah raa ro kiyam mama mo kʼAit ye. Ana mama mse raa ro kiyam weto mam pasar rana. Tna ana soh-soh kʼAit mawe, “Amu niir ratan aNyõ makit sai mbau a?” Tna ana ro miir ratan rAit makit fo, kiyam rana marak beta.