7
Tꞌion ángeles sello ndöꞌquita nnꞌan Israel
1 Juu Quitsman Chjo, vi na jndë tenon na tyjee jon yon joo naijon na tëꞌtyen juu tsonꞌñeen, yajoꞌ jntyꞌia nenque tontyja tsonnangue, joꞌ minꞌntyjeeꞌ nenque ángeles. Cotëꞌhan joo nenque jndye chaꞌ tyiꞌngioohanꞌ nnon tsonnangue, min nnon ndaandue min nacjo nꞌoon. 2 Joohan jndë tyincyaa Tyoꞌtsꞌon na vaa najndëhan na quintꞌahan natëꞌ tsonnangue yo ndaandue. Ndoꞌ mantyi jntyꞌia ncüiichen ángel na jnan jon tontyja na quinduiꞌ ndoꞌcüjioonꞌ. Tava jon na mꞌan nenque ángelꞌñeen, yꞌoon jon sello ꞌnaanꞌ nquii Tyoꞌtsꞌon na vandoꞌ. Jndei sixuaa jon ndëë joo nenque ángelꞌñeen. 3 Tso jon ndëëhan:
—Tyiꞌntꞌahoꞌ natëꞌ juu tsonnangue, min ndaandue min nꞌoon, ata na jndë tꞌiö́n sello ꞌnaanꞌ Tyoꞌtsꞌon ndöꞌquita joo nnꞌan cüentaaꞌ jon na cotyeꞌntjonhan nnon jon.
4 Ndoꞌ jndyi nchu xjen jndye nnꞌan na tꞌionhan sello ndöꞌquita. Nanꞌñeen tueeꞌ ncüii ciento min vantjoꞌ vennꞌan vantjoꞌ nenque minhan quiiꞌ ntꞌan na nchoꞌve tmaanꞌ nnꞌan Israel. 5 Nchoꞌve min nnꞌan tsjan Judá tꞌionhan sello. Ndoꞌ nchoꞌve min nnꞌan tsjan Rubén tꞌionhan sello. Ndoꞌ nchoꞌve min nnꞌan tsjan Gad tꞌionhan sello. 6 Ndoꞌ nchoꞌve min nnꞌan tsjan Aser tꞌionhan sello. Ndoꞌ nchoꞌve min nnꞌan tsjan Neftalí tꞌionhan sello. Ndoꞌ nchoꞌve min nnꞌan tsjan Manasés tꞌionhan sello. 7 Ndoꞌ nchoꞌve min nnꞌan tsjan Simeón tꞌionhan sello. Ndoꞌ nchoꞌve min nnꞌan tsjan Leví tꞌionhan sello. Ndoꞌ nchoꞌve min nnꞌan tsjan Isacar tꞌionhan sello. 8 Ndoꞌ nchoꞌve min nnꞌan tsjan Zabulón tꞌionhan sello. Ndoꞌ nchoꞌve min nnꞌan tsjan José tꞌionhan sello. Mantyi yo ninꞌtsjan Benjamín tꞌionhan sello nchoꞌve minhan.
Tmaanꞌ nnꞌan jndye jndyi na cüehan ndiaa quichiꞌ
9 Vi jndë na tenon nanꞌminꞌ, jntyꞌia ncüii tmaanꞌ nnꞌan na jndye jndyi na tanin tsꞌan na nndëë ntsꞌaa cüentahan. Ñꞌen nanꞌñeen na jnanhan ncüii ncüii tsonnangue, ncüii ncüii tsjan nnꞌan yo ncüii cüii nnon jñꞌoon na conanein nnꞌan. Minntyjeeꞌhan tonnon juu silla na maninꞌ tsꞌiaanꞌ naijon na mꞌaan Tyoꞌtsꞌon yo nquii Quitsman Chjo. Cüehan ndiaa quichiꞌ na toncohanꞌ, ndoꞌ ndueehan tooꞌ njon ntsqui tëncyꞌa. 10 Jndei jnanꞌxuaahan, jnduehan:
Nquii Tyoꞌtsꞌon cüenta jaa na vaquityen jon silla na maninꞌtsꞌiaanꞌ yo nquii Quitsman Chjo,
xiaꞌntyi ntyja ꞌnaanhan nanꞌxuan na nꞌman ñuan njanhan. 11 Ndoꞌ xiꞌjndio juu sillaꞌñeen ventyjeeꞌ tsoñꞌen ángeles, yo joo na conintque ndoꞌ yo joo na nenque na cotaꞌndoꞌ. Tsoñꞌenhan tyetangiohan tonnon juu sillaꞌñeen. Tqueꞌ ndöꞌquitahan tyuaa. Jnanꞌtꞌmaanꞌhan Tyoꞌtsꞌon. 12 Jnduehan:
Quindui chaꞌxjen na conduë.
Tsoñꞌen na jndë tquen Tyoꞌtsꞌon quinduehan na taquintyja na ya itsꞌaa jon.
Tsoñꞌenhan quinanꞌtꞌmaanꞌhin nquii jon.
Tsoñꞌenhan quitquenhan cüenta na taquintyja na jndaꞌ xquen jon.
Tsoñꞌenhan quinduehan na ncya ya jon yo na cüitꞌmaanꞌhin.
Tsoñꞌenhan quinduehan na quitsiquinjonhanꞌ nquii jon; mantyi tsoñꞌenhan quitquenhan cüenta na nquii jon taquintyja najndei conduihin.
Tyiꞌjon cjacüentyjeeꞌ na condui nanꞌminꞌ chaꞌxjen na conduë.
Quindui chaꞌxjen na conduë.
Ndöꞌ ro jñꞌoon na jnduehan.
13 Ndoꞌ ncüii nque na conintqueꞌhin, taxeeꞌ jon nnön, tso jon:
—Joo nanminꞌ na cüehan ndiaa tonco na quichiꞌhanꞌ, ¿Nin nnꞌanhin, ndoꞌ yuu jon jnanhan?
14 Joꞌ tꞌa, tsjö nnon jon:
—Aa ja tyiꞌquintji ta, ꞌuꞌ nchjiꞌ.
Ndoꞌ tso jon nnön:
—Nanminꞌ nnꞌan na jnꞌman na jnduiꞌhan quityquiiꞌ juu naviꞌ na tꞌmanntyichenhanꞌ. Ngꞌe na vantyja nꞌonhan nquii Quitsman Chjo, joꞌ na jndë sintjuꞌ jonhan yo neoonꞌ jon. Mangꞌe joꞌ na cüehan ndiaa quichiꞌ na ntjuꞌhanꞌ. 15 Mangꞌe joꞌ mꞌanhan na tonnon juu silla maninꞌ tsꞌiaanꞌñeen na vequityen nquii Tyoꞌtsꞌon, naxuee ndoꞌ natsjon cotyeꞌntjonhan nnon jon, tyquiiꞌ vatsꞌon na mꞌaan jon, ndoꞌ nquii jon na vequityen juu sillaꞌñeen, ninnquiiꞌchen mꞌaan jon yohan na ivantyjeeꞌ jonhan. 16 Ndoꞌ joo nanꞌñeen tavijon jnda na ncꞌon nndaꞌhan na ninꞌjndoꞌhan oo na ninꞌcüehan ndaa, min tyiꞌxeꞌquindyiaaꞌ ndoꞌcüjioonꞌ nacjohan, min na ntscohanꞌhin. 17 Ee nquii Quitsman Chjo na mꞌaan jon tonnon juu silla na maninꞌ tsꞌiaanꞌ, ngüantyjeeꞌ jonhan chaꞌxjen ivantyjeeꞌ tsꞌan quinman, ngachu jon joohan naijon na mꞌaan tënnon ndaa na nninncyaahanꞌ na cotaꞌndoꞌhan, ndoꞌ nquii Tyoꞌtsꞌon nngueꞌ jon ndaa ndëëhan.