2 JUAN
Ati pũurore owagʉ, jĩcʉ̃ bʉcʉ yʉʉ owa cojo ĩimi. Ʉmʉreco Pacʉ cʉ̃ ca beje amiricarãre, cʉ̃ yaarã ca niirãre, cʉ̃ ca owa cojorique nii. “Ameri mairique mena, Ʉmʉreco Pacʉ wederique ca ĩirore biro niiña,” cʉ̃ ca ĩi owa cojorique nii (vv. 1-6).
“Ca ĩi ditorã cʉ̃ja ca buerijere tʉo majiri niiña,” ĩi wede (vv. 7-11), “Yʉ majuropeera mʉjare yʉ ĩagʉ waarucu,” ĩirique mena owa yapano eami.
Pʉati Juan cʉ̃ ca queti owa cojorica pũuro
1
Añu dotirique
Yʉ, bʉcʉ, Ʉmʉreco Pacʉ cʉ̃ ca beje amiricore, to biri cõ punaa cãare, yʉ jĩcʉ̃ wado méé yʉ ca mairãre, niipetirã díámacʉ̃ maquẽ Jesucristo yee añurije quetire ca majirã cãa cʉ̃ja ca mairãre, díámacʉ̃ maquẽre majima ĩirã jãa mena ca niirãre, ñucã jãa mena to cãnacã rʉmʉra ca niicõa niiparãre, ati pũuro mena mʉjare yʉ añu doti owa cojo. Mani Pacʉ Ʉmʉreco Pacʉ, cʉ̃ Macʉ̃ Jesucristo, cʉ̃ ca añu majuropeerije, cʉ̃ ca ĩa mairije, jĩcãri cõro añuro niirique, díámacʉ̃ ca niirije, to biri ameri mairique mena, mʉja mena to niijato.
Bʉaro yʉ ʉjea niiwʉ, jĩcãrã mʉja punaa, mani Pacʉ manire cʉ̃ ca dotiricarore biro cʉ̃ja ca tii niirijere ĩagʉ. Yʉ yaarã yʉ ca mairã, “Mani ameri maico” mʉjare yʉ ĩi jãi. Ate mʉjare yʉ ca owa cojorijea, dotirique wãma wãme méé nii. Mee, jĩcãtopʉra mani ca tʉo jʉo dooriquera nii. Ameri mairiquea Ʉmʉreco Pacʉ cʉ̃ ca doti cũurique ca ĩirore biro tii niirique nii. Ate nii doti cũurique: Ameri maiña, mee jĩcãtopʉra mʉja ca tʉoricarore birora.
Ca ĩi dito yujurã
Ati yepapʉre paʉ peti niicãma, bojocare ca ĩi dito amejuarã. Mani Wiogʉ Jesucristo manire biro upʉ cʉtigʉ cʉ̃ ca doorique díámacʉ̃ ca niirijere ca majirʉgatirã niima. To biro ca biigʉa, ca ĩi ditogʉ, Cristore ca junagʉ, niigʉ biimi. To biri añuro tʉgoeña bojoca catiri niiña, añuro mʉja ca pade niirique wapa ca niipe to yaiticãjato ĩirã. To biro mʉja ca tii niirije wapa Ʉmʉreco Pacʉ cʉ̃ ca tiicojopere niipetiro mʉja ca tiicojo ecope peere tii niiña.
Noo ca boogʉ, apeyera bii maa wijia, Jesucristo cʉ̃ ca bue majioriquere to birora tʉo nʉnʉjeecõa nii, ca biitigʉa, Ʉmʉreco Pacʉ mena ca niitigʉ niimi. Jesucristo cʉ̃ ca bue majiorique ca niirore biro teere to birora ca tʉo nʉnʉjeecõa niigʉa, Ʉmʉreco Pacʉ mena, to biri cʉ̃ Macʉ̃ mena, ca niigʉ niimi.
10 Noo jĩcʉ̃ ʉno mʉjare ca ĩa yujugʉ eagʉ, ate bue majiorique méérena cʉ̃ ca wedejata, mʉja yaa wiire, “Ano niiña” cʉ̃re ĩi, añuro cʉ̃re jãi boca, tiiticãña. 11 Cʉ̃ ʉnore añuro ca jãi bocagʉa, cʉ̃ menara, ñañarije cʉ̃ ca tii niirijere ñañarije ca tii nemogʉ tuacãmi.* 10-11 Waa yujuri maja ca earã méére ĩi. Jesucristore ca tʉo nʉnʉjeerã, bojoca cʉ̃ja ca earo cʉ̃ja yaa wiijeripʉ cʉ̃jare cʉ̃ja ca cãni dotirijere ĩima ĩirã, bojorica wãmeri ca bue yujurã cʉ̃ja ca bii pato wãcõ yujurijere ĩima ĩigʉ cʉ̃ ca ĩirique nii. Gá 1.7-9.
Wede yapanorique
12 Paʉ mʉjare yʉ ca ĩi cojorʉgarije niimi biiropʉa. Bʉari, owa cojorique mena yʉ ĩirʉgati. Yʉ majuropeera mʉjare ĩagʉ waari, mʉja mena yʉ wede penirʉga, añuro yeri ʉjea nii añurã mani ca niipere biro ĩigʉ.
13 To biri Jesucristore ca tʉo nʉnʉjeerã mʉja yaarã, Ʉmʉreco Pacʉ cʉ̃ ca beje amiricarã, mʉjare añu doti cojoma.
To biro to biijato.
Juan

*1:11 10-11 Waa yujuri maja ca earã méére ĩi. Jesucristore ca tʉo nʉnʉjeerã, bojoca cʉ̃ja ca earo cʉ̃ja yaa wiijeripʉ cʉ̃jare cʉ̃ja ca cãni dotirijere ĩima ĩirã, bojorica wãmeri ca bue yujurã cʉ̃ja ca bii pato wãcõ yujurijere ĩima ĩigʉ cʉ̃ ca ĩirique nii. Gá 1.7-9.