3
1 I swɑɑ dɑkio i nɔ ye nɛ, Yinni Gusunɔ nɑ ɡerumɔ, bɛɛ Isirelibɑ kpuron sɔ̃, bɛɛ be nɑ yɑrɑmɑ Eɡibitin di.
2 Hɑnduniɑn bwesenu kpuro sɔɔ, bɛɛ tɔnɑwɑ nɑ ɡɔsɑ.
Yen sɔ̃nɑ kon bɛɛ sɛɛyɑsiɑ bɛɛn durum ye i kuɑ kpuron sɔ̃.
Gusunɔ ù n ɡɑri ɡeruɑ,
Gusunɔn sɔmɔ kun kpɛ̃
u nɔɔ mɑri
3 Tɔmbu yiru bɑ koo swɑɑ wɔri sɑnnu
bɑ kun ɡinɑ nɔɔsinɛ?
4 Gbee sunɔ ɡɑ rɑ ɡbɑ̃re yɑkɑsɔ
ɡɑ kun yɑɑ mwɛ ro?
Gbee sunɔ buu ɡɑ rɑ kukiri ɡen kpin yerun di
ɡɑ kun yɑɑ wɑ ɡɑ dimɔ?
5 Gunɔ ɡɑ koo tɑɑ mwɑɑrɑ temɔ
bɑ kun ye bɛri?
Tɑɑ yɑ koo se wɔllɔ
ɡɑ̃ɑnu kun ye kɛsie?
6 Bɑ rɑ tɑbun kɔbɑ so wuuɔ
wuuɡibu bɑ kun nɑnde?
Kɛ̃siru ɡɑru tɑ rɑ koore wuuɔ
n kun nɛn min di?
7 Aɑwo, nɑ ku rɑ ɡɑ̃ɑnu ɡɑnu ko
nɑ kun yè nɛn sɔmɔ sɔ̃ɔwɑ.
8 Gbee sunɔ ɡɑ̀ n ɡbɑ̃rɑ,
wɑrɑ ku rɑ nɑnde.
Nɛ, Yinni Gusunɔ nɑ̀ n ɡɑri ɡeruɑ,
nɛn sɔmɔ wɑrɑ kun yi kpɑrɑmɔ.
Yinni Gusunɔ
u koo Sɑmɑri sɛɛyɑsiɑ
9 I Asidɔdu kɑ Eɡibitin tem sinɑ kpɑɑnuɡibu nɔɔɡiru sueyo i nɛɛ,
bu mɛnnɑmɑ Sɑmɑrin ɡuunɔ,
kpɑ bu wɑ dɑɑ bɛrɛtɛkɛ kɑ dɑm dɔrenɑɑ
ye yɑ wɑ̃ɑ ben suunu sɔɔ.
10 Bɑ ku rɑ kɑ̃ bu ɡeɑ ko.
Mɑ bɑ ɑrumɑni ɡurɑmɔ kɑ dɑm kɑ tɑki,
bɑ tɑɑsimɔ ben sinɑ kpɑɑnɔ.
11 Yen sɔ̃nɑ kon de yibɛrɛbɑ bu nɑ
bu tem mɛ tɑrusi, bu ben dɑm kpeerɑsiɑ.
Kpɑ bu ben sinɑ kpɑɑnu kɔsuku.
Nɛ, Yinni Gusunɔwɑ nɑ yeni ɡeruɑ.
Fɑɑbɑ ye yɑ ǹ nuku dobu mɔ
12 Wee ye nɑ mɑɑ ɡeruɑ. Nɑ nɛɛ,
nɡe mɛ yɑ̃ɑ kpɑro u rɑ win sɑbenun sukum wɔre ɡbee sunɔn nɔɔn di,
nɡe mɛyɑ kon bɛɛ Isirelibɑ wɔrɑ
bɛɛ be i nɑ i sɔ̃ Sɑmɑriɔ kpin yee burɑnu sɔɔ.
Kirɔbɑ
13 I swɑɑ dɑkio i nɔ
kpɑ i Yɑkɔbun bweseru kirɔ ko
i bu sɔ̃ ye nɛ Gusunɔ wɔllu kɑ tem Yinni nɑ ɡeruɑ.
14 Nɑ nɛɛ, sɑnɑm mɛ sɔɔ, kon Isirelibɑ sɛɛyɑsiɑ ben durum sɔ̃.
Kon Betɛlin yɑ̃ku turɑnu kɔsuku,
kpɑ nin kɑ̃ɑnu nu bɔɔkirɑ nu wɔruku.
15 Kon bɛɛn diɑ mi i rɑ n wɑ̃ɑ yɑm susurun sɑɑ kɑ purɑn sɑɑ kɔsuku.
Kpɑ n bɛɛn sinɑ kpɑɑnu kɑm koosiɑ
ni, ni bɑ burɑru koosi kɑ suunu donnu,
kɑ sere dii ɡee ni nu tie.
Nɛ, Yinni Gusunɔwɑ nɑ yeni ɡeruɑ.