HABAKUKU
Hɑbɑkuku u win sɔmburu kuɑwɑ Yudɑbɑn sinɑ boko Yoyɑkimun wɑɑti sɔɔ. Wi kɑ Yeremiwɑ bɑ sɔmburu kuɑ wɑɑti tiɑ sɔɔ.
Hɑbɑkukun tireru tɑ win biti kɑ win nuku sɑnkirɑnu sɔ̃ɔsimɔ win tɔmbun sɔ̃. Sɑɑ ye sɔɔ, Bɑbiloniɡibu bɑ Isirelibɑ dɑm dɔremɔ. Mɛyɑ bwese ni nu kɑ bu sikerenɛn tii nu bu kuɑmmɛ. Yerɑ Isirelibɑ bɑ tii bikiɑmɔ bɑ mɔ̀, ɑmɔnɑ ben wɑ̃ɑrɑ ko n sɑ̃ɑ be kɑ Gusunɔ. Mɑ Gusunɔ u bu wisɑ sɑɑ win sɔmɔ Hɑbɑkukun nɔɔn di u nɛɛ, wi u Gusunɔ nɑɑnɛ doke, wiyɑ u koo kpĩ u n wɑ̃ɑ. Wi u mɑrɑ Gusunɔ u nùn yɑkiɑ, wiyɑ u ko n wɑ̃ɑ, wiru 2:4.
Tire ten kpunɑɑ
1. Gɑrin wiru, wiru 1:1.
2. Hɑbɑkuku u kɑ Gusunɔ ɡɑri mɔ̀, wiru 1:2n di sere wiru 2:20.
3. Hɑbɑkuku u Gusunɔ siɑrɑ, wiru 3.
1
1 Gɑri wee yi Yinni Gusunɔ u win sɔmɔ Hɑbɑkuku sɔ̃ɔwɑ.
Hɑbɑkuku u Yinni Gusunɔ
somiru kɑnɑmɔ
2 Yinni Gusunɔ, sere sɑɑ yerɑ̀ ko nɑ n nun somiru kɑnɑmɔ.
Sere sɑɑ yerɑ̀ kɑɑ n mɑn mɑɑri.
Sere sɑɑ yerɑ̀ kɑɑ de nɑ n nun sɔ̃ɔmɔ
mɑ tɔmbɑ dɑm dɔrenɑmɔ.
Nɡe sere sɑɑ yerɑ̀ kɑɑ nɑ ɑ sun wɔrɑ.
3 Mbɑn sɔ̃nɑ ɑ derɑ nɑ kɔ̃sɑ mɛɛrɑ.
Mbɑn sɔ̃nɑ kɑɑ n tɔmbu mɛɛrɑ
bɑ n ɡem birɑnɑmɔ.
Wee, tɔmbɑ dɑm dɔrenɑmɔ
bɑ dɑɑ kɔ̃sɑ mɔ̀ bɑɑmɑ kpuro.
Sɑnnɔsu yibɑ, mɑ tɔmbɑ siribu sokunɑmɔ bɑɑmɑ kpuro.
4 Goo sɑri wi u woodɑ mɛm nɔɔwɑmmɛ.
Bɑ ku rɑ tɔmbu ben ɡem wɛ̃ nɡe mɛ n weenɛ.
Tɔn kɔ̃sowɑ u rɑ ɡemɡii siribu di.
Gusunɔ u Hɑbɑkuku wisɑ
u nɛɛ, Bɑbiloniɡibɑ wee
5 Yinni Gusunɔ u nɛɛ, i bwesenu mɛɛrio i kɑ sikerenɑ.
I de biti yu bɛɛ mwɑ.
Domi kon ɡɑ̃ɑnu ko bɛɛn nɔni biru
ni i ǹ nɑɑnɛ mɔ̀,
bɑɑ ɡoo ù n bɛɛ nu tusiɑ.
6 Wee, kon Bɑbiloniɡibu seeyɑmɑ.
Tɔn be, bɑ nuki sum.
Bɑ tem kpuro bukiɑnɑmɔ
bu wɑ bu kɑ bwesenu ɡɑnun wɑ̃ɑ yenu mwɛɛri.
7 Bɑ nɑnum mɔ ben dɑm sɑɑbu.
Berɑ bɑ rɑ ɡɔsi ye bɑ kĩ.
8 Ben dumi yi sɑnnɛkunu ǹ kun mɛ ɡbeeku bɔ̃nu dukɑ kere.
Sɑɑ tontonden diyɑ yi rɑ yɔ̃,
kpɑ yi yibɛrɛ wɔri nɡe kɑsɑ ye yɑ ɡoo buu wɑ.
9 Be kpurowɑ bɑ wee bu kɑ tɔmbun yɑ̃nu ɡurɑ.
Bɑ nɔni ɡirɑriwɑ mi bɑ dɔɔ.
Mɑ bɑ yobu mwɛɛrimɔ bɑ mɛnnɑmɔ nɡe yɑni sɛɛri.
10 Bɑ sinɑmbu ɡɛmɑ.
Bɑ tem yɛ̃robu yɛ̃ɛmɔ.
Bɑ ǹ wusun ɡbɑ̃rɑnu ɡɑrɑ.
Domi bɑ rɑ tem turenu kowɑ bu kɑ ɡbɑ̃rɑ ni yɔ
kpɑ bu wuu si mwɑ.
11 Yen biru kpɑ bu yɑri min di nɡe woo ɡunɑ,
kpɑ bu mɑɑ dɑ bu ɡɑm wɔri bu kɔ̃sɑ ko.
Ben dɑmɑ bɑ nɑɑnɛ sɑ̃ɑ, mu sɑ̃ɑ nɡe ben bũu.
Hɑbɑkuku u mɑɑ Gusunɔ soku
12 Sɑɑ yellun di, wunɑ ɑ sɑ̃ɑ Gusunɔ.
Wunɑ ɑ sɑ̃ɑ nɛn Yinni.
A dɛɛre. Yen sɔ̃, sɑ ǹ ɡbimɔ.
Yinni, wunɑ ɑ sɑ̃ɑ nɛn kpee bɑɑ mi nɑ rɑ kuke.
Wunɑ ɑ Bɑbiloniɡibu ɡɔsɑ,
mɑ ɑ bu dɑm kɑ̃ kpɑ bu kɑ sun sɛɛyɑsiɑ.
13 Adɑmɑ ɑ ǹ kpɛ̃ ɑ yɔ̃rɑ ɑ n kɔ̃sɑ mɛɛrɑ,
domi ɑ dɛɛre too.
Ǹ n mɛn nɑ, mbɑn sɔ̃nɑ ɑ mɛɛrɑ ye tɔn kɔ̃sobɑ mɔ̀,
mɑ ɑ ǹ ɡɑ̃ɑnu ɡerumɔ.
Mbɑn sɔ̃nɑ ɑ mɑɑri tɔn kɔ̃sobu bɑ ɡemɡibu ɡoomɔ.
14 Mbɑn sɔ̃nɑ ɑ tɔmbu kuɑmmɛ nɡe swɛ̃ɛ,
ǹ kun mɛ nɡe kɔkɔ ni nu ǹ kpɑro mɔ.
15 Bɑbiloniɡibu bɑ tɔmbu mwɛɛrimɔ
nɡe swɛ̃ɛ yi bɑ mwɑ kɑ kɔkɔnu
ǹ kun mɛ kɑ yɑ̃ɑkoronu,
kpɑ bu bu ɡurɑ bu kɑ doonɑ kɑ nuku dobu.
16 Yen sɔ̃nɑ bɑ rɑ ben yɑ̃ɑkoronu yɑ̃kunu kue,
kpɑ bu nu turɑre dɔ̃ɔ dokeɑ.
Domi nin sɑɑbuwɑ
bɑ koo kɑ kpĩ bu dĩɑ ɡeenu wɑ
ni nu do bu di.
17 Dommɑ bɑ koo den ben tɑkobibɑ wesiɑ ben kɑrɑnɔ.
Bɑ ko n bwesenu sɑkirimɔwɑ wɔnwɔndu sɑriru sɔɔ sere kɑ bɑɑdommɑɔ?