4
1 Bɛɛ Isirelibɑ, i nɛ, Yinni Gusunɔ swɑɑ dɑkio.
Domi nɑ siribu mɔ kɑ bɛɛ tem mɛn tɔmbu
yèn sɔ̃ wɔnwɔnduɡii ɡoo sɑri bɛɛ sɔɔ,
ɡemɡii ɡoo mɑɑ sɑri.
Mɛyɑ bɛɛn ɡoo kun mɑɑ mɑn yɛ̃.
2 I nɔɔ mwɛɛnu mɔ̀ kɑ bɔ̃ri, ɑdɑmɑ weesɑ i mɔ̀.
Mɛyɑ i mɑɑ tɔmbu ɡoomɔ, i ɡbɛnimɔ, i sɑkɑrɑru mɔ̀.
I dɑm dɔrenɑmɔ, mɑ tɔn ɡoberɑ sosimɔ tɑ dɔɔ.
3 Yen sɔ̃nɑ nɛ, Yinni Gusunɔ, kon de tem mɛ, mu ɡberɑ.
Bɛɛ be i wɑ̃ɑ mi kpuro, i ko woorɑwɑ
sɑɑ ɡbeeku yɛɛn di n kɑ dɑ ɡunɔsɔ kɑ wɛɛyɔ,
ye kpurowɑ yɑ koo kɑm ko.
Yinni Gusunɔ
u yɑ̃ku kowobu tɑɑrɛ wɛ̃ɛmɔ
4 Yinni Gusunɔ u nɛɛ, ɡoo u ku rɑɑ kɑ tii yinɑ
ǹ kun mɛ u ɡoo ɡerusi.
Domi wunɛ yɑ̃ku kowo tɔnwerowɑ nɑ kɑ sɑnnɑmɔ.
5 Sɔ̃ɔ teeru kɑɑ wɔrumɑwɑ sɔ̃ɔ sɔɔ ɡbɑ̃ɑrɑ
kpɑ wunɛn beruse nɛn sɔmɔ u mɑɑ wɔrumɑ wɔ̃kuru.
Kon mɑɑ Isirelin bweseru ɡo te tɑ sɑ̃ɑ nɡe wunɛn mɛro.
6 Wee nɛn tɔmbɑ ɡbimɔ yèn sɔ̃ bɑ ǹ mɑn yɛ̃.
Adɑmɑ wunɛn tii, ɑ yinɑ ɑ mɑn wurɑ.
Yen sɔ̃, kon nun yinɑ kpɑ ɑ kun mɑɑ sɑ̃ɑ nɛn yɑ̃ku kowo tɔnwero.
Nɡe mɛ ɑ nɛ, Yinni Gusunɔn woodɑbɑ duɑri,
nɡe mɛyɑ kon mɑɑ wunɛn bibu duɑri.
7 Nɡe mɛ bɑ dɑbiɑmɔ, nɡe mɛyɑ bɑ mɑn torɑrimɔ bɑ dɔɔ.
Kon ben bɛɛrɛ kpeesiɑ kpɑ bu sekuru wɑ.
8 Wee bɑ kuurɑmɔ nɛn tɔmbun torɑnun sɔ̃.
Mɑ bɑ bu bɔriemɔ bɑ n kɑ torɑmɔ bɑ n dɔɔ.
9 Yen sɔ̃, sɛɛyɑsiɑ tee biyɑ kon nɛn tɔmbu kɑ ben yɑ̃ku kowobu ko.
Kon bu sɛɛyɑsiɑwɑ nɡe mɛ ben dɑɑ yɑ nɛ.
Kon bu kɔsiɑwɑ nɡe mɛ ben kookoosu nɛ.
10 Bɑ koo di, ɑdɑmɑ bɑ ǹ debumɔ.
Bɑ koo sɑkɑrɑru ko bũu nuurɔ bu kɑ bibu wɑn sɔ̃.
Adɑmɑ bɑ ǹ mɑrumɔ yèn sɔ̃ bɑ nɛ, Yinni Gusunɔ biru kisi
bɑ ǹ nɛn woodɑbɑ swĩi.
11 Yinni Gusunɔ u nɛɛ, sɑkɑrɑru kɑ tɑmɑ mu nɛn tɔmbun wiru ɡɔsiɑ.
12 Dɑ̃ɑ kukun miyɑ bɑ rɑ bikiɑru de ɡu kɑ bu ɡɑri sɔ̃.
Bũu ɡɑsiribu derɑ bɑ kɔ̃ɔrɑ mɑ bɑ kɑ mɑn tondɑ.
13 Bɑ rɑ de bɑ n yɑ̃kunu mɔ̀ ɡuunu wɔllɔ,
kpɑ bɑ n turɑre dɔ̃ɔ dokemɔ ɡunɡunu wɔllɔ
kɑ dɑ̃ɑ bɑkɑ bwese bwesekɑn nuurɔ nìn sɑɑrɑ bu wɛ̃re.
Yen sɔ̃nɑ ben bii wɔndiɑbɑ bɑ sekuru sɑriru mɔ̀.
Mɑ ben biiɡii kurɔbu bɑ sɑkɑrɑru mɔ̀.
14 Nɑ ǹ ben bii wɔndiɑ be, kɑ ben biiɡii kurɔ be sɛɛyɑsiɑmɔ
ben sekuru sɑri te, kɑ ben sɑkɑrɑ te bɑ mɔ̀n sɔ̃.
Domi ben mɔwɔbun tii bɑ sɑkɑrɑru mɔ̀ kɑ kurɔ be bɑ wɑ̃ɑ bũu sɑ̃ɑrun sɔ̃.
Mɑ bɑ mɑɑ yɑ̃kunu mɔ̀ sɑnnu kɑ be.
Adɑmɑ bɑ n yɛ̃ nɡe mɛ mɔndu ɡɑrɑ ɡeruɑ tɑ nɛɛ,
tɔn be bɑ ǹ lɑɑkɑri mɔ, bɑ kɑm kobu dɔɔwɑ.
15 Isirelibɑ bɑ bũnu ɡɑsirimɔ,
ɑdɑmɑ Yudɑbɑ bu ku rɑɑ bu swĩi.
Bu ku dɑ Giliɡɑliɔ ǹ kun mɛ Betɛli Afɛniɔ *Betɛli Afɛniɔ yen tubusiɑnɑ dɔ̃ɔn wɑ̃ɑ yeru bu kɑ yɑ̃kunu ko
kpɑ bɑ n bɔ̃rumɔ bɑ n mɔ̀,
sere kɑ Yinni Gusunɔn wɑ̃ɑru.
16 Isirelibɑ bɑ sɑ̃ɑwɑ nɡe nɑɑ ɡbiibɑ ye bɑ kpɑnɑ bu kpɑrɑ. Adɑmɑ tɛ̃, Yinni Gusunɔ u koo bu yɔ̃su bɑtumɑ sɔɔ nɡe yɑ̃ɑnu. 17 Isirelibɑ bɑ bũnu sɑ̃ɑmɔ. A bu derio mi. 18 Bɑ̀ n tɑm nɔrɑ bɑ kpɑ, bɑ rɑ n yɑnde dɔɔwɑ bu sɑkɑrɑru ko. Wee ben wiruɡibu bɑ rɑ n kĩwɑ bɑ n wɑ̃ɑ sekuru sɑri kom sɔɔ. 19 Sɔ̃ɔ teeru woo ɡɑ koo nɑ ɡu bu suɑ ɡu kɑ doonɑ kpɑ bu sekuru wɑ ben yɑ̃ku nin sɔ̃.
Keu koosio kɔ̃sobu