1 Yinni Gusunɔ u nɛɛ,

sɑɑ Isirelin bweserun torubun diyɑ nɑ tu kĩɑ.

Mɑ nɑ tu yɑrɑmɑ Eɡibitin di nɑ tu sokɑ nɛn bii.

2 Adɑmɑ nɡe mɛ nɑ bu sokumɔ

nɡe mɛyɑ bɑ kɑ mɑn tondɑmɔ.

Bɑ dɑ bɑ bũu ni bɑ mɔ̀ Bɑɑli sɑ̃ɑmɔ.

Mɑ bɑ nu turɑre dɔ̃ɔ dokeɑmmɛ.

3 N deemɑ nɛnɑ nɑ bu kpɑre,

nɑ ben nɔmɑ nɛni.

Adɑmɑ bɑ ǹ tubɑ

mɑ nɛnɑ nɑ bu nɔɔrimɔ.

4 Nɑ bu ɡɑwɑmɑ nɛn mi kɑ kĩru

mɑ nɑ bu dĩɑnu wɛ̃

nɡe wi u yɑɑ sɑbenun suɡu yiiyɑmɔ u kɑ nu nɔɔri.

5 Adɑmɑ bɑ yinɑ bu nɑ nɛn mi.

Yen sɔ̃nɑ nɑ nɛɛ, bɑ koo dɑ Eɡibitiɔ

kpɑ Asiriɡii u ko ben sunɔ.

6 Bɑ koo ben wusu tɑbu wɔri,

kpɑ bu ben dɑmɡibu kɔsuku

yèn sɔ̃ bɑ ben tiin kpunɑɑ swĩi.

7 Wee nɛn tɔmbu bɑ yɔ̃rɑri bu kɑ mɑn tondɑ.

Bɑ bu sokɑ bu ɡɔ̃ru ɡɔsiɑ bu wurɑmɑ nɛ, Wɔrukoon mi.

Adɑmɑ ben ɡoo kun wure.

8 Kɑ mɛ, bɛɛ Isirelibɑ,

nɑ ǹ kpɛ̃ n bɛɛ deri,

n bɛɛ tɔnu kɑndu kuɑ.

Nɑ ǹ kpɛ̃ n bɛɛ kɑm koosiɑ

nɡe mɛ nɑ wuu si bɑ mɔ̀ Adimɑ kɑ Seboimu kuɑ.

Wee nɛn ɡɔ̃ru ɡɑ sɑnkire,

nɛn bwɛ̃rɑ kun kpunɛ.

9 Nɑ ǹ mɑɑ bɛɛ kpeerɑsiɑmɔ kɑ nɛn mɔru bɑkɑ ye.

Nɑ ǹ mɑɑ wee n bɛɛ kɑm koosiɑ.

Domi nɑ sɑ̃ɑwɑ Gusunɔ n ǹ mɔ tɔnu.

Nɑ sɑ̃ɑwɑ Dɛɛro bɛɛn suunu sɔɔ.

Nɑ ǹ bɛɛ wɔrim wee kɑ mɔru.

10 Bɛɛ nɛn bibu, i ko nɛ, Yinni Gusunɔ swĩi

nɑ̀ n kukurɑ nɡe ɡbee sunɔ

kpɑ i duki nɑ sɑɑ sɔ̃ɔ duu yerun di.

11 I ko duki nɑ sɑɑ Eɡibitin di nɡe ɡunɔ mɔri

kpɑ i nɑ sɑɑ Asirin di nɡe totobɛrɛnu,

kpɑ n de i sinɑ bɛɛn yɛnusɔ.

Nɛ, Yinni Gusunɔwɑ nɑ yeni ɡeruɑ.