2 nɑ yɛ̃ mɛ.

Amɔnɑ tɔnu u ko n dɛɛre Gusunɔn wuswɑɑɔ.

3 Gusunɔ ù n tɔnu ɡɑri konu nɔrɔbu (1.000) bikiɑ,

u ǹ wɑsi u wisi bɑɑ tiɑ.

4 Wiyɑ u bwisi kɑ dɑm kpuro mɔ.

Wɑrɑ u koo nùn seesi kpɑ yɛ̃ron wɑ̃ɑru tu dɑkɑɑ dɑ.

5 U rɑ ɡuunu yiiye subɑru sɔɔ,

kpɑ u nu suriri kɑ mɔru.

6 U rɑ de tem mu yĩiri sere mɛn sɔɔwɔ,

kpɑ mɛn ɡberebɑ bu wɔruku.

7 U rɑ sɔ̃ɔ woodɑ wɛ̃ u ku yɑri,

kpɑ u win yĩreru doke kperi sɔɔ.

8 Wi turowɑ u wɔllu tɛriɑ.

Mɑ u sĩimɔ nim kurenun wɔllɔ.

9 Wiyɑ u kperi bwese bwesekɑ tɑkɑ kuɑ, kɑ kperi swɑɑnu,

kɑ kperi yi yi wɑ̃ɑ sɔ̃ɔ yɛ̃sɑn nɔm dwɑru ɡiɑ.

10 U rɑ sɔm bɑkɑnu ko ni bɑ ǹ kpɛ̃ bu tubu.

U rɑ sɔm mɑɑmɑɑkiɡinu ko dɑbi dɑbinu.

11 Bɑɑ ù n doonɔ nɛn bɔkun di, nɑ ǹ nùn wɑsi.

Ù n mɑɑ sɑrɔ, nɑ ǹ tubu.

12 Ye u nɛnuɑ, wɑrɑ u koo nùn ye wɔrɑri.

Wɑrɑ u koo kpĩ u nùn sɔ̃ u nɛɛ, mbɑ ɑ mɔ̀ mɛ.

13 Gusunɔ ù n win mɔru seewɑ u ku rɑ ye yɔ̃rɑsie.

Win nɑɑsun temɔwɑ u rɑ yɑɑ ɡɔbɑ ye bɑ mɔ̀ Rɑhɑbun dɑm tɑɑre.

14 Nɛ mɑɑ ni, ɑmɔnɑ kon nùn wisi.

Gɑri yirɑ̀ kon ɡere win wuswɑɑɔ.

15 Bɑɑ nɑ̀ n ɡem mɔ, nɑ ǹ kpɛ̃ n nùn ɡɑ̃ɑnu wisi, wi, wi u sɑ̃ɑ nɛn siri kowo.

Suuruwɑ kon nùn kɑnɑ kɑ bɛɛrɛ.

16 Bɑɑ nɑ̀ n nùn kɑnɑ mɑ u mɑn wisɑ,

kɑ mɛ, nɑ ǹ nɑɑnɛ mɔ̀ n nɛɛ, u nɛn nɔɔ nuɑ.

17 Domi u mɑn wɔri nɡe woo ɡunɑ.

Mɑ u mɑn mɛɛrɑ dɑbinu kuɑ kɑm, nɑ ǹ ɡɑ̃ɑnu kue.

18 U ku rɑ de n wɛ̃siɑ,

mɑ u derɑ nɛn wɑ̃ɑrɑ sosiɑ.

19 Ǹ n dɑm ɡɑrin nɑ, wiyɑ u dɑm kpuro mɔ.

Ǹ n mɑɑ siribun ɡɑrin nɑ, wɑrɑ u koo kpĩ u nùn siribu soku.

20 Bɑɑ nɑ̀ n ɡem mɔ, kɑ mɛ, nɛn ɡere yɑ koo mɑn tɑɑrɛ wɛ̃.

Bɑɑ nɑ̀ kun tɑɑrɛ mɔ, u koo mɑn sɔ̃ɔsi mɑ nɑ sɑ̃ɑ durumɡii.

21 Bɑɑ mɛ nɑ ǹ tɑɑrɛ ɡɑɑ mɔ,

nɛn wɑ̃ɑrɑ kun mɑn nɛni,

nɑ tu tusɑ.

22 Kon kpĩ n ɡere n nɛɛ, ɡɑ̃ɑnu kpuro nu sɑ̃ɑwɑ tiɑ Gusunɔn mi.

Domi u rɑ tɔn kɔ̃so kɑ tɑɑrɛ sɑriruɡii kpeerɑsie.

23 Bɑrɑru ɡɑru tɑ̀ n tɑɑrɛ sɑriruɡii wɔri subɑru sɔɔ, tɑ ɡo,

Yinni Gusunɔ u rɑ n nùn yɛ̃ɛmɔwɑ nɔni swɑ̃ɑ te u wɑn sɔ̃.

24 Tem mù n wɔri tɔn kɔ̃son nɔmuɔ,

Yinni Gusunɔ u rɑ mɛn kpɑrobu wɔ̃koru kpɛ̃ɛwɑ.

Mɑ n kun wi, wɑrɑ u koo ye ko.

25 Wee, nɑ ǹ doo nɔɔru wɑ,

mɑ sere nɛn wɑ̃ɑrun tɔ̃rɑ doonɔ fuuku nɡe wi u dukɑ mɔ̀.

26 Tɑ sɑrɑmɔ nɡe ɡoo nimkuu si bɑ kuɑ kɑ ɡbĩi,

ǹ kun mɛ nɡe ɡunɔ bɑkeru te tɑ sɑrɑm wee tu yɑɑ so.

27 Nɑ̀ n nɛɛ, kon nɛn weeweenu deri n nɛn wuswɑɑ dɛɛrɑsiɑ,

kpɑ nɑ n nuku dobu mɔ,

28 nɑ rɑ nɑndewɑ nɛn wɑhɑlɑ yeni kpuron sɔ̃.

Domi nɑ yɛ̃ mɑ Yinni Gusunɔ kun mɑn ɡem wɛ̃ɛmɔ.

29 Bɑɑ ǹ n mɛren nɑ, nɑ sɑ̃ɑwɑ tɑɑrɛɡii win mi.

Mbɑn sɔ̃nɑ ko nɑ n mɑɑ nùn sɔ̃ɔsimɔ mɑ nɑ dɛɛre.

30 Bɑɑ nɑ̀ n woburɑ kɑ ɡuru kpenun nim,

kpɑ n niɑ kɑ werem,

31 kɑ mɛ, u koo mɑn surewɑ pɔtɔkɔ sɔɔ,

kpɑ nɛn yɑ̃nun nuburu tu mɑn bwɛ̃rɑ yɔ̃.

32 Wee Gusunɔ kun sɑ̃ɑ tɔnu nɡe nɛ,

n sere nùn sɔ̃ n nɛɛ,

su dɑ siri yerɔ bu sun siriɑ.

33 Goo ù n dɑɑ wɑ̃ɑ wi u koo du bɛsɛn suunu sɔɔ

u sun yɑkiɑnɑ,

34 Gusunɔ u koo rɑɑ win bokuru yi te u kɑ mɑn soomɔ,

kpɑ u de nɔni swɑ̃ɑ te nɑ wɑɑmɔ mi, tu kpe.

35 Sɑɑ ye sɔɔ, nɑ ǹ mɑɑ bɛrum mɔ̀ n kɑ nùn ɡɑri ko.

Adɑmɑ n ǹ sɑ̃ɑ mɛ.