2 wi u bwisi mɔ u koo tɔnu wisi kɑ ɡɑri yi yi ǹ ɑrufɑɑni mɔ?

U ko n ɡɑri yɑrɑmɔ nɡe woo?

3 Wee ɡɑri yi ɑ ɡeruɑ ɑ kɑ tii yinɑ mi, yi ǹ sɑ̃ɑ ɡɑ̃ɑnu.

Gɑri yi ɑ sɑɑrɑ mini kpuro sɔɔ,

sɑri yi yi koo tɔnu somi.

4 Wunɛ, ɑ mɑm Gusunɔn nɑsiɑru tɛɛsimɔwɑ,

mɑ ɑ win bɛɛrɛ yɛ̃ru kpeerɑsiɑmɔ.

5 Wunɛn kom kɔ̃sumɑ mu sɔ̃ɔsirɑmɔ wunɛn nɔɔn di.

Mɑ ɑ ɡɑri ɡerumɔ kɑ bwisi.

6 Wunɛn nɔɔn ɡɑriyɑ yi nun tɑɑrɛ wɛ̃ɛmɔ, n ǹ mɔ nɛ.

Gɑri yi ɑ ɡeruɑ mi kpuro,

yiyɑ yi wunɛn torɑnu sɔ̃ɔsimɔ.

7 Wunɑ bɑ ɡbiɑ bɑ tɑkɑ kuɑ hɑnduniɑ sɔɔ?

Wunɑ ɑ ɡbiɑ ɑ wɑ̃ɑ bɑ sere ɡunɡunu kuɑ?

8 A Gusunɔn ɡɑri ɑsiriɡii swɑɑ dɑki?

A win bwisi mwɑ kpuro, ɑ yi wunɛn tiin sɔ̃?

9 Mbɑ ɑ yɛ̃ ye bɛsɛn tii sɑ ǹ yɛ̃.

Yɛ̃ɛ terɑ̀ ɑ mɔ te bɛsɛn tii sɑ ǹ mɔ.

10 Bɛsɛn suunu sɔɔ, tɔmbɑ wɑ̃ɑ

be bɑ seri bururɑ bɑ tɔkɔnu kuɑ n kere wunɛn tundo.

11 A bɛsɛn ɡɑri yi sɑ nun sɔ̃ɔwɑ kɑ lɑɑkɑri mɛɛrɑwɑ ɡɑ̃ɑ piiminu,

yìn min di Gusunɔ u nun nukuru yɛmiɑsiɑmɔ?

12 Mɑnɑ wunɛn bwisikunu kɑ nun dɔɔ.

Mbɑ wunɛn nɔni ɡɔsikiɑ ninin tubusiɑnu.

13 Gɑri yi ɑ sɑɑrimɔ mini, Gusunɔwɑ ɑ kɑ mɔru mɔ̀.

14 Tɔnu u koo kpĩ u n dɛɛre?

Wi bɑ mɑrɑ, u koo kpĩ u n yibɑ Gusunɔn wuswɑɑɔ?

15 Gusunɔ ù kun win ɡɔrɑdobɑ nɑɑnɛ kue,

mɑ u ǹ wɔllu mɛɛrɑ tɑ dɛɛre,

16 wunɛ tɔnu ɑmɔnɑ kɑɑ kɑ kpĩ ɑ n dɛɛre win wuswɑɑɔ,

wunɛ wi ɑ rɑ kɔ̃sɑ ko kiri kiri nɡe mɛ bɑ rɑ nim nɔ.

17 Tɛ̃, Yoobu, ɑ mɑn swɑɑ dɑkio kpɑ n nun ɡɑri sɔ̃.

Kon nun sɔ̃wɑ ye nɑ wɑ.

18 Sɔ̃ɔsi te bwisiɡibu bɑ sɔ̃ɔsi,

bɑ tu ɡiɑwɑ ben sikɑdobɑn min di.

19 Be tɔnɑwɑ Gusunɔ u rɑɑ tem mɛ wɛ̃,

sɔɔ ɡoo rɑɑ mɑɑ sɑri be sɔɔ.

20 Adɑmɑ tɔn kɔ̃so u ko n wɑ̃ɑwɑ nɔni swɑ̃ɑru sɔɔ

win wɑ̃ɑrun tɔ̃ru kpuro sɔɔ.

21 Kpɑ u n ɡbɑ̃sukunu nɔɔmɔ ni nu koo nùn bɛrum mwɑ.

Wi u koo nùn kɑm koosiɑ, u koo nùn wɔri subɑru sɔɔ.

22 Tɔn kɔ̃so wi, u ku rɑ n yĩiyɔ u yɑm wɔ̃kuru dukɑ suuri.

Domi tɑkobi rɑ n nùn mɑrɑwɑ.

23 U rɑ n sirenɛwɑ bɑɑmɑ, u n kɑsu ye u koo di.

U yɛ̃ kɔ mɑ yɑm wɔ̃kurɑ nùn mɑrɑ.

24 Mɑ u nɑnde wɑhɑlɑ kɑ nɔni swɑ̃ɑrun sɔ̃,

ye yɑ nùn wɔriɔ nɡe sinɑ bokon tɑbu kowobu

be bɑ tɑbun sɔɔru kpɑ.

25 Domi u Gusunɔ seesi.

U Dɑm kpuroɡii nɔɔ kuurimɔ.

26 U kɑ̃kɑ u Gusunɔ tɑbu wɔri,

win tɛrɛrun sinum sɔ̃.

27 Win wuswɑɑ bɑllimɔ.

Mɑ win ɡɑ̃ɑnu nu yɑɑ tɑɑsinɛ.

28 U wɑ̃ɑ wuu si bɑ kɔsukɑ sɔɔ,

sìn diɑ bɑ deri, mɑ yɑ wɔrumɑm dɔɔ.

29 U ǹ ɡobi mɔ. Win dukiɑ kun mɑɑ kuurɑmɔ.

U ǹ mɑɑ yĩsiru yɑrimɔ win temɔ.

30 U ǹ kpɛ̃ u ɡɔɔn tɔ̃ru dukɑ suuri.

Win bweseru kpuro tɑ koo dɔ̃ɔ mwɑɑrɑwɑ.

Kpɑ Gusunɔ u nùn wom wure u ɡo.

31 Ù n kɔ̃sɑ nɑɑnɛ sɑ̃ɑ u tii nɔni wɔ̃kuɑwɑ mi.

Domi kɔ̃sɑ yen ɑreyɑ u koo wɑ.

32 Are yi, yi koo nɑwɑ u sere ɡbi.

Win bwese kɛrɑ kun mɑɑ seemɔ,

nɡe dɑ̃ɑ kɑ̃ɑsɑ ye yɑ ǹ mɑɑ kpɑrɑmɔ.

33 U ko n sɑ̃ɑwɑ nɡe resɛm yèn bii birenu bɑ wɔkɑ,

ǹ kun mɛ nɡe olifin dɑ̃ɑ tèn wɛ̃su bɑ dɛrɑ.

34 Tɔn kɔ̃so u ǹ bweseru wɑsi.

Dɔ̃ɔ u koo wi u nɔm birɑn kɛ̃nu mwɑɑmɔn yɛnu wɔri.

35 Wi u kɔ̃sɑ bwisikɑ, kɔ̃sɑ u koo ko.

Domi bwisi kɔ̃si yiyɑ yi rɑ n wɑ̃ɑ win nukurɔ.

Kpɑ yi n nùn nɔni wɔ̃kuɑ.