1 Bɔ̃rurobɑ be bɑ rɑ n kɔ̃sɑ bwisikumɔ wɔ̃kuru mi bɑ kpĩ.

Bɑ̀ n seewɑ buru buru kpɑ bu ye ko yèn sɔ̃ bɑ yen dɑm mɔ.

2 Bɑ̀ n ɡoon ɡberu binɛ kuɑ, kpɑ bu tu mwɑ.

Bɑ̀ n ɡoon diru binɛ kuɑ, kpɑ bu tu mwɑ.

Bɑ rɑ yɛ̃ro kɑ win yɛnuɡibu dɑm dɔrewɑ

kpɑ bu du bu ben dukiɑ kpuro ɡurɑ.

3 Yen sɔ̃nɑ Yinni Gusunɔ u nɛɛ, wee nɑ kɔ̃sɑn sɔɔru mɔ̀ tɔn ben sɔ̃.

Bɑ ǹ mɑɑ kpɛ̃ bu ye dukɑ suuri.

Mɛyɑ bɑ ǹ mɑɑ kpɛ̃ bu sĩ bɑ n wĩiru yɔ̃rɑsie dɑm dɑm.

Domi tɔ̃ɔ te tɑ wee mi, tɔ̃ɔ kɔ̃surɑ.

4 Yen tɔ̃ɔ te, bɑ koo ɡɔɔ wurɑ yeni ko bu nɛɛ,

wee! Bɑ bu ɡurɑ kpuro mɑm mɑm.

Ben tɔmbu bɑ ǹ mɑɑ tem mɔ.

Bɑ bu ɡirɑ ben ɡbeɑn di.

Bɑ ye bɔnu kuɑ ben tii tiinɛ sɔɔ.

Mbɑn sɔ̃nɑ bɑ bu ɡurɑ nɡe mɛ.

5 Adɑmɑ sɑɑ ɡɑɑ sisi yè sɔɔ ben ɡoo kun mɑɑ tem wɑsi

Yinni Gusunɔn tɔmbu bɑ̀ n tem bɔnu mɔ̀.

6 Ben ɡɑbɑ bɑ seewɑ bɑ Misee sɔ̃ɔwɑ bɑ nɛɛ,

ɑ ku mɑɑ ɡɑri suni ɑ n mɔ̀, kɔ̃sɑ ye, yɑ weewɑ kɑm kɑm.

7 Bɑ Isirelibɑn bweseru bɔ̃rusiwɑ?

Yinni Gusunɔ u suuru kpɑnɑwɑ?

Nɡe mɛyɑ u rɑ rɑɑ sun kue?

Adɑmɑ Misee bu wisɑ u nɛɛ,

ɡɑri doriyɑ nɑ ɡerumɔ be bɑ kom ɡem mɔ̀n sɔ̃.

8 Adɑmɑ bɛɛyɑ Yinni Gusunɔ u sɔ̃ɔmɔ u mɔ̀,

i kuɑ win tɔmbun yibɛrɛbɑ.

I tɔmbu sɛ̃re be bɑ wee tɑbu ɡberun di i ben yɑ̃nu potirɑ.

9 I ben kurɔbu ɡirɑ sɑɑ yɛnu si bɑ kĩn min di,

mɑ i derɑ ben bibɑ kun mɑɑ ɡirimɑ wɑsi sere kɑ bɑɑdommɑɔ yè nɑ rɑɑ bu wɛ̃.

10 I seewo i doonɑ,

i ǹ mɑɑ bɔri yɛndu wɑsi tem mɛ sɔɔ.

Wɑhɑlɑ bɑkɑ yɑ bɛɛ mɑrɑ bɛɛn mɛm nɔɔbu sɑrirun sɔ̃.

11 Domi Gusunɔn sɔmɔ benin bweserɑ i rɑ kɑ̃

be bɑ rɑ bɛɛ weesu kue bu nɛɛ,

i ko i tɑm wɑ i nɔ, yen tɑm bɔɔbɔm mɑm.

12 Yinni Gusunɔ u nɛɛ,

bɛɛ Isirelibɑ, Yɑkɔbun bweseru,

kon bɛɛ be i tie kpuro mɛnnɑ.

Kon bɛɛ mɛnnɑ nɡe yɑ̃ɑnu ɡɔ̃ɔ teu sɔɔ.

Kpɑ i n wɑ̃ɑ sɑnnu nɡe yɑ̃ɑnu kpɑrɑ yerɔ.

Bɛɛn tem mu koo tɔmbu yibu.

13 Nɛ, Yinni Gusunɔ bɛɛn sinɑ boko,

nɛnɑ nɑ bɛɛ kpɑre.

Kon nɑ n bɛɛ swɑɑ ɡbiiye.

Nɛnɑ kon bɛɛ swɑɑ kɛniɑ i kɑ yɑkiɑrɑ.

I ko i swɑɑ ɡĩɑ kpɑ i yɑri min di.