9
1 Suru nɔɔbɑ yiruse, yen sɔ̃ɔ yɛndɑ nnɛse sɔɔrɑ Isirelibɑ kpuro bɑ mɛnnɑ bu kɑ nɔɔ bɔke. Mɑ bɑ sɑɑki deewɑ bɑ tii tuɑ wisi wirɔ nuku sɑnkirɑrun sɔ̃. 2 Be bɑ sɑ̃ɑ Yuubɑ ɡesi, bɑ tii wĩɑ tɔn tukobun suunu sɔɔn di bɑ nɑ bɑ ben durum kɑ ben sikɑdobɑɡiɑ tuubɑ kuɑ. 3 Yen biru, bɑ bu Yinni Gusunɔn ɡɑri ɡɑriɑ kɔbɑ itɑn sɑkɑ bɑ yɔ̃ bɑ swɑɑ dɑki. Mɑ bɑ yiirɑ wi, ben Yinnin wuswɑɑɔ bɑ suuru kɑnɑ sere kɔbɑ itɑ mɑɑ.
4 Yerɑ Yosue kɑ Bɑni kɑ Kɑdimiɛli kɑ Sebɑniɑ kɑ Buni kɑ Serebiɑ kɑ Bɑni ɡoo kɑ Kenɑni bɑ yɔɔwɑ turɑ ten mi. Mɑ bɑ nɔɔɡiru suɑ Gusunɔ ben Yinnin mi ɡiɑ bɑ somiru kɑnɑ. 5 Yerɑ Lefi beni, Yosue kɑ Kɑdimiɛli kɑ Bɑni kɑ Asɑbiniɑ kɑ Serebiɑ kɑ Hodiyɑ kɑ Sebɑniɑ kɑ Petɑyɑ bɑ nɛɛ, i seewo i Gusunɔ bɛsɛn Yinni siɑrɑ sere kɑ bɑɑdommɑɔ.
Bɑɑwure u nùn siɑro win yĩsi bɛɛrɛɡirun sɔ̃,
bɑɑ mɛ i ǹ ɡɑri yɛ̃ yi i ko i kɑ nùn siɑrɑ.
Kɑnɑ te bɑ kuɑ
6 Mɑ Isirelibɑ bɑ kɑnɑ teni kuɑ bɑ nɛɛ,
Yinni, wunɛ turowɑ ɑ sɑ̃ɑ Gusunɔ.
Wunɑ ɑ wɔllu kuɑ tɑ kpɑ̃.
Wunɑ ɑ mɑɑ kperi kuɑ too.
Wunɑ ɑ tem tɑkɑ kuɑ kɑ ye yɑ wɑ̃ɑ mɛ sɔɔ.
Wunɑ ɑ nim wɔ̃ku kuɑ kɑ ye yɑ wɑ̃ɑ ɡe sɔɔ.
Wunɑ ɑ hunde koni kpuro wɑ̃ɑru wɛ̃.
Mɑ kperi kɑ suru kɑ sɔ̃ɔ,
ye kpuro yɑ nun bɛɛrɛ wɛ̃ɛmɔ.
7 Yinni Gusunɔ, wunɑ ɑ Aburɑmu ɡɔsɑ.
Mɑ ɑ derɑ u seewɑ Urin di, Kɑlɑden temɔ.
Yen biru, mɑ ɑ nùn yĩsi kpɑɑru kɑ̃ Aburɑhɑmu.
8 A wɑ mɑ u sɑ̃ɑ nɑɑnɛɡii,
mɑ ɑ kɑ nùn ɑrukɑwɑni bɔkuɑ ɑ nɛɛ,
kɑɑ nùn tem mɛ wɛ̃ mɛ̀ sɔɔ Kɑnɑnibɑ
kɑ Hɛtibɑ kɑ Amɔrebɑ kɑ Feresibɑ
kɑ Yebusibɑ kɑ Giriɡɑsibɑ bɑ wɑ̃ɑ,
kpɑ win bibun bweseru tu sinɑ mi.
Mɛyɑ ɑ mɑɑ wunɛn ɑrukɑwɑni ye yibiɑ.
Domi ɑ sɑ̃ɑwɑ nɑɑnɛɡii.
9 Sɑnɑm mɛ bɛsɛn bɑɑbɑbɑ bɑ wɑ̃ɑ Eɡibitiɔ,
ɑ ben nɔni swɑ̃ɑru wɑ.
Bɑ nun somiru kɑnɑ,
mɑ ɑ ben wuri nuɑ nim wɔ̃ku ɡe bɑ mɔ̀ Nɑɑ yɑriɔ.
10 A yɛ̃ nɡe mɛ Eɡibitiɡibu bɑ bɛsɛn bɑɑbɑbɑ dɑm dɔre kɑ nuku kɔ̃suru.
Mɑ ɑ sɔm mɑɑmɑɑkiɡinu kuɑ ɑ kɑ ben sunɔ
kɑ win sinɑ ɑsɑkpɔbu kɑ win tɔmbu kpuro seesi.
Mɑ ɑ yĩsiru yɑrɑ sere kɑ ɡisɔn ɡisɔ.
11 A derɑ nim mu burɑnɑ bɛsɛn bɑɑbɑ ben wuswɑɑɔ.
Mɑ bɑ tɔburɑ tem ɡbebum sɔɔ.
Adɑmɑ Eɡibitiɡii be bɑ bu nɑɑ ɡire,
ɑ bu sure nim bwerɔ.
Mɑ bɑ numɑ nɡe kpee te bɑ kɑre nim sɔɔ.
12 Sɔ̃ɔ sɔɔ, ɡuru wii wurorɑ ɑ rɑ kɑ wunɛn tɔn be kpɑre.
Wɔ̃kuru mɑɑ, kpɑ tɑ n kɑ dɔ̃ɔ yɑri bɑkɑru weenɛ,
tɑ n bu yɑm bururɑsie swɑɑ sɔɔ.
13 A sɑrɑmɑ sɑɑ wɔllun di,
mɑ ɑ kɑ bu ɡɑri kuɑ Sinɑin ɡuurɔ.
A bu woodɑ ɡeɑ kɑ sɔ̃ɔsi ɡeenu wɛ̃.
14 A derɑ wunɛn sɔm kowo Mɔwisi u bu tɔ̃ɔ wɛ̃rɑruɡiru wɛ̃
te tɑ sɑ̃ɑ nɛnɛm wunɛn sɔ̃.
Mɑ ɑ derɑ u bu woodɑ ye yɑ tie sɔ̃ɔsi.
15 A bu dĩɑnu wɛ̃ɛmɑ sɑɑ wɔllun di
sɑnɑm mɛ ɡɔ̃ɔrɑ bu mɔ̀.
Mɑ ɑ derɑ nim mu yɑrɑ kpee bɑɑn di
sɑnɑm mɛ nim nɔru ɡɑ bu mɔ̀.
Mɑ ɑ nɛɛ, bu doo bu tem mɛ mwɑ
mɛ̀n nɔɔ mwɛɛru ɑ bu kuɑ kɑ bɔ̃ri.
16 Adɑmɑ bɛsɛn bɑɑbɑ be, bɑ tii suɑ bɑ nun seesi.
Bɑ ǹ wunɛn woodɑbɑ mɛm nɔɔwɛ.
17 Bɑ swɑɑ tɑɑyɑ
bɑ wunɛn sɔm mɑɑmɑɑkiɡii ni duɑri
ni ɑ bu kuɑ.
Mɑ bɑ nun seesi bɑ tii kpɑro kuɑ
bu kɑ wurɑ mi bɑ rɑɑ yoru di.
Adɑmɑ kɑ mɛ, ɑ ǹ bu deri.
Domi ɑ sɑ̃ɑwɑ Yinni
wi u rɑ tɔnu suuru kue.
A wɔnwɔndu kɑ durom mɔ.
Wunɛn mɔru ku rɑ fuuku se.
Wunɛn kĩru tɑ ǹ kpeemɔ sere kɑ bɑɑdommɑɔ.
18 Kɑ mɛ kpuro, bɑ tii bũu wurɑɡuu kuɑ.
Mɑ bɑ nɔɔɡiru suɑ bɑ nɛɛ,
ɡerɑ ɡɑ sɑ̃ɑ ben yinni
wi u bu yɑrɑmɑ Eɡibitin di.
Nɡe mɛyɑ bɑ kuɑ bɑ kɑ nun wɔnwɑ.
19 Adɑmɑ wunɛn kĩi bɑkɑrun sɔ̃,
ɑ ǹ bu deri ɡbɑburɔ.
Guru wii wuro te tɑ bu swɑɑ ɡbiiye mi,
wɔ̃kuru kɑ sɔ̃ɔ sɔɔ, tɑ ǹ bu deri.
20 Wunɛn kĩrun sɑɑbu,
ɑ bu wunɛn Hunde wɛ̃
bɑ n kɑ bwisi mɔ.
Bɑɑdommɑ ɑ rɑ bu dĩɑnu wɛ̃
ni bɑ rɑ soku mɑnnɑ bu di,
kpɑ ɑ bu nim wɛ̃ bu nɔ.
21 A bu nɔɔri ɡbɑburɔ wɔ̃ɔ weeru,
bɑ ǹ ɡɑ̃ɑnu biɑre,
ben yɑ̃nu kun ɡɛ̃ɛkirɑre,
ben nɑɑsu kun mɑɑ mɔsire.
22 A bu bwese tukunu kɑ nin sinɑmbu nɔmu sɔndiɑ
kɑ be bɑ kɑ bu sikerenɛn tem.
Mɛyɑ Hɛsibonin tem mi Sihoni u bɑndu dii
kɑ Bɑsɑnin tem mi Oɡu u bɑndu dii.
23 A derɑ bɑ bibu mɑrɑ bɑ dɑbiɑ nɡe kperi.
Mɑ ɑ derɑ bɑ duɑ Kɑnɑnin temɔ
mɛ ɑ ben bɑɑbɑbɑ nɔɔ mwɛɛru kuɑ.
24 Mɑ bɑ Kɑnɑnibɑ kɑmiɑ
bɑ bu tɑɑre bɑ ben tem mɛ mwɑ.
Mɑ bɑ berɑ min sinɑmbu kɑ min bwesenu kpuro kuɑ nɡe mɛ bɑ kĩ.
25 Bɑ wuu ɡbɑ̃rɑruɡisu mwɛɛrɑ kɑ mi tem ɡem wɑ̃ɑ,
kɑ yɛnu si su dukiɑ mɔ, kɑ dɔkɔbɑ kɑ resɛm ɡbɑɑnu,
kɑ olifibɑ kɑ dɑ̃ɑ dɑbi dɑbinu nìn mɑrum bɑ rɑ di.
Yinni Gusunɔ, wunɛn kĩrun sɑɑbuwɑ
bɑ kɑ di bɑ debɑ bɑ bɔriɑ.
Mɑ bɑ wɑ̃ɑ doo nɔɔru sɔɔ.
26 Adɑmɑ kɑ mɛ, bɑ ǹ nun mɛm nɔɔwɛ.
Bɑ nun seesiwɑ, bɑ wunɛn woodɑbɑ biru kisi.
Mɑ bɑ wunɛn sɔmɔbu ɡo ɡo
be bɑ bu kirɔ kuɑ bu kɑ ɡɔ̃ru ɡɔsiɑ
bu ben dɑɑ kɔ̃sɑ deri kpɑ bu wurɑmɑ wunɛn mi.
Adɑmɑ bɑ ben dɑɑ kɔ̃sɑ sosiwɑ.
27 Sɑɑ yerɑ ɑ bu yibɛrɛbɑ nɔmu sɔndiɑ,
mɑ bɑ bu dɑm dɔre.
Adɑmɑ ben nɔni swɑ̃ɑru sɔɔ, bɑ nun nɔɔɡiru sue.
Mɑ ɑ ben nɔɔ nuɑ sɑɑ wɔllun di.
A bu tɔmbu seeyɑ
bu kɑ bu wɔrɑ sɑɑ yibɛrɛ ben nɔmɑn di
wunɛn kĩi bɑkɑrun sɔ̃.
28 Adɑmɑ ye bɑ wɑ̃ɑ bɔri yɛndu sɔɔ,
bɑ mɑɑ wɔri ben durum sɔɔ.
Mɑ ɑ bu biru kisi,
ɑ bu yibɛrɛbɑ nɔmu sɔndiɑ.
Yerɑ bɑ mɑɑ kpɑm nɔɔɡiru suɑ
bɑ nun somiru kɑnɑ.
Mɑ ɑ ben nɔɔ nuɑ wɔllun di,
ɑ bu wɔrɑ nɔn dɑbinu wunɛn kĩrun sɑɑbu.
29 Yen biru, ɑ bu kirɔ kuɑ
bu wunɛn woodɑbɑ mɛm nɔɔwɑ.
Adɑmɑ bɑ tii suɑ bɑ ǹ ye mɛm nɔɔwɛ,
bɑɑ mɛ yerɑ yɑ rɑ tɔnu wɑ̃ɑru wɛ̃
wi u ye mɛm nɔɔwɑ.
Bɑ swɑɑ tɑɑyɑwɑ bɑ ye yinɑ mɑm mɑm.
30 A kɑ bu tɛmɑnɑ wɔ̃ɔ dɑbinu.
A wunɛn sɔmɔbu wunɛn Hunde wɛ̃
bɑ n kɑ bu kirɔ mɔ̀.
Adɑmɑ bɑ ǹ swɑɑ dɑki.
Mɑ ɑ bu bwese tukunu nɔmu bɛriɑ.
31 Adɑmɑ wunɛn kĩi bɑkɑrun sɔ̃,
ɑ ǹ bu ɡo, ɑ ǹ mɑɑ bu deri,
domi ɑ sɑ̃ɑwɑ Yinni wɔnwɔnduɡii kɑ duromɡii.
32 Gusunɔ bɛsɛn Yinni, ɑ kpɑ̃, ɑ mɑɑ dɑm mɔ.
Wunɑ ɑ durom bɑkɑm mɔ.
Mɑ ɑ wunɛn ɑrukɑwɑni nɛni ye ɑ kɑ sun bɔkuɑ.
A bɛsɛn wɑhɑlɑ mɛɛrio ye sɑ mɔ̀
bɛsɛ kɑ bɛsɛn sinɑmbu kɑ ben sinɑ ɑsɑkpɔbu
kɑ wunɛn sɔmɔbu kɑ bɛsɛn yɑ̃ku kowobu
sɑɑ Asirin sinɑmbun wɑɑtin di sere n kɑ ɡisɔ ɡirɑri.
33 A sɑ̃ɑwɑ nɑɑnɛɡii.
A mɑɑ kuɑwɑ dee dee ɡɑ̃ɑ ni nu sun deemɑ sɔɔ.
Adɑmɑ bɛsɛ, sɑ kuɑwɑ nɑɑnɛ sɑriruɡibu.
34 Bɛsɛn sinɑmbu kɑ ben sinɑ ɑsɑkpɔbu
kɑ bɛsɛn yɑ̃ku kowobu kɑ bɛsɛn bɑɑbɑbɑ
bɑ ǹ wunɛn woodɑbɑ mɛm nɔɔwɛ.
Bɑ wunɛn kirɔbɑ ɑtɑfiiru kuɑwɑ.
35 Bɑ ǹ nun sɑ̃wɑ.
Bɑ ǹ mɑɑ ben dɑɑ kɔ̃sɑ deri,
bɑɑ mɛ ɑ bu tem bɑkɑm wɛ̃ mɛ mu ɡeɑ sɑ̃ɑ,
bɑ kuɑ mɛn sinɑmbu.
Mɑ ɑ bu nɔɔri bɑ wɑ̃ɑ doo nɔɔru sɔɔ.
36 Yen sɔ̃, bɛsɛ wee sɑ yoru dimɔ ɡisɔ
tem mɛ ɑ bu wɛ̃ sɔɔ
bu kɑ mɛn dĩɑ ɡeenu di.
37 Dĩɑ ɡee ni, nu kuɑ sinɑm be bɑ sun yoru diisiɑmɔɡinu.
Bɑ sun mɔ bɛsɛ kɑ bɛsɛn yɑɑ sɑbenu.
Bɑ kɑ sun mɔ̀ nɡe mɛ bɑ kĩ bɛsɛn durum sɔ̃.
Mɑ sɑ wɑ̃ɑ nuku sɑnkirɑ bɑkɑnu sɔɔ.
Isirelibɑ bɑ nɔɔ mwɛɛru kuɑ
bu woodɑ mɛm nɔɔwɑ