26
Dɑfidin womu.
Yinni Gusunɔ, wunɑ nɑ nɑɑnɛ sɑ̃ɑ mɑm mɑm.
Nɑ sĩimɔwɑ dee dee wunɛn woodɑbɑ sɔɔ.
A mɑn ɡem wɛ̃ɛyɔ.
A nɛn bwisikunu kɑ nɛn bwɛ̃rɑ sirio.
A mɑn wɛ̃ɛrio kpɑ ɑ mɑn ɡiɑ.
Domi wunɛn kĩrɑ nɑ nɔni ɡirɑri.
Mɑ nɑ sĩimɔ wunɛn durom sɔɔ.
Yen sɔ̃nɑ nɑ ku rɑ kɑ tɔn kɔ̃sobu sinɛ.
Mɛyɑ nɑ ku rɑ mɑɑ kɑ murɑfitibɑ sĩ.
Nɑ kɔ̃sɑn kowobu tusɑ.
Nɑ ku rɑ kɑ bu sinɛ.
Nɑ rɑ nɛn nɔmɑ niɛwɑ n kɑ sɔ̃ɔsi mɑ nɑ ǹ tɑɑrɛ mɔ.
Nɑ rɑ de n nun sɑ̃ nɑ n wunɛn yɑ̃ku yeru sikerenɑmɔ,
nɑ n nun siɑrɑmɔ,
nɑ n wunɛn sɔm mɑɑmɑɑkiɡinun ɡɑri kpɑrɑmɔ.
Nɑ rɑ kɑ̃ n dɑ wunɛn sɑ̃ɑ yerɔ
domi miyɑ ɑ rɑ n wɑ̃ɑ wunɛn yiikon ɡirimɑ sɔɔ.
Yinni Gusunɔ, ɑ ku de n ɡbi kɑ durumɡibu sɑnnu.
A ku de n kɑm ko kɑ be bɑ tɔmbun yɛm yɑrimɔ sɑnnu.
10 A ku mɑn siri kɑ be bɑ dɑɑ kɔ̃sɑ mɔ̀ sɑnnu.
A ku mɑn siri kɑ be bɑ rɑ nɔm birɑn kɛ̃nu mwɛ sɑnnu.
11 Nɑ sĩimɔwɑ dee dee wunɛn woodɑbɑ sɔɔ.
Yinni Gusunɔ, ɑ mɑn durom kuo, ɑ mɑn fɑɑbɑ koowo.
12 Nɑ yɔ̃wɑ dim dim swɑɑ ɡeɑ sɔɔ.
Yen sɔ̃nɑ kon nun siɑrɑ mi wunɛn tɔmbɑ mɛnnɛ.