30
1 Womu ɡe Dɑfidi u kuɑ bu kɑ Yinni Gusunɔn sɑ̃ɑ yeru wukiɑ. U nɛɛ,
2 Yinni Gusunɔ, kon wunɛn kpɑ̃ɑru kpɑrɑ.
Domi ɑ mɑn yɑrɑ sɑɑ wɔrun di.
A ǹ mɑɑ dere nɛn yibɛrɛbɑ bu mɑn yɛ̃ɛ.
3 Gusunɔ nɛn Yinni, nɑ nun nɔɔɡiru sue
nɑ fɑɑbɑ kɑnɑ, mɑ ɑ mɑn bɛkiɑ.
4 A mɑn wɔrɑ ɡɔɔn nɔmɑn di,
mɑ ɑ derɑ sɑ tondinɛ kɑ be bɑ ɡu.
5 I Yinni Gusunɔ siɑro kɑ womusu,
bɛɛ be i kɑ nùn yɔ̃ dim dim.
I win yĩsi dɛɛrɑ te wɔlle suo.
6 Domi win mɔru ku rɑ tɛ.
Adɑmɑ u rɑ tɔnu durom kuewɑ win wɑ̃ɑru kpuro sɔɔ.
Nuku sɑnkirɑnu nù n nùn deemɑ yokɑ,
sisiru bururu, u rɑ deemɛ nuku doo bɑkɑbɑ.
7 Nɑ rɑɑ nɛɛ, nɛn nuku doo bini sɔɔ,
nɑ ǹ sokurɑmɔ pɑi.
8 Yinni Gusunɔ, wunɛn sɑɑbuwɑ nɑ kɑ wɑ̃ɑ bɔri yɛndu sɔɔ
nɡe wi u kukuɑ kpee bɑɑ sɔɔ.
Adɑmɑ ye ɑ wunɛn wuswɑɑ beruɑ,
nɛn lɑɑkɑri yɑ burisinɑ.
9 Yen biruwɑ nɑ nɔɔɡiru suɑ
nɑ nun somiru kɑnɑ.
10 Nɑ nɛɛ, mbɑ kɑɑ wɑ ɑ̀ n mɑn ɡo,
ɑ mɑn doke siki wɔruɔ.
Nɑ̀ n ɡɔsirɑ tuɑ, kon kpĩ n nun sɑ̃?
Kon kpĩ n wunɛn ɡem ɡɑri kpɑrɑ?
11 Yinni Gusunɔ, ɑ mɑn swɑɑ dɑkio,
kpɑ ɑ mɑn durom kuɑ. Yinni, ɑ mɑn somiɔ.
12 Wee tɛ̃, nɛn nuku sɑnkirɑru tɑ kuɑ nuku dobu.
A nɛn sɑɑki ye nɑ wukiri nuku sɑnkirɑrun sɔ̃ wunɑ.
Mɑ ɑ mɑn tɔ̃ɔ bɑkɑ yɑ̃nu sebusiɑ n kɑ nuku dobu ko.
13 Nɛn bwɛ̃rɑ yɑ koo nun bɛɛrɛ wɛ̃ kɑ womusu,
nɑ ǹ nɔɔ mɑrimɔ.
Gusunɔ nɛn Yinni,
wunɑ kon siɑrɑ sere kɑ bɑɑdommɑɔ.