32
Dɑfidin womu.
Doo nɔɔruɡiiwɑ wìn torɑnu bɑ suuru kuɑ,
mɑ bɑ win durum wunɑ.
Doo nɔɔruɡiiwɑ wìn kɔ̃sɑ Yinni Gusunɔ kun ɡɑrisi,
mɑ u ǹ mɑɑ keetɑ mɔ win ɡɔ̃ruɔ.
Sɑnɑm mɛ nɑ ǹ nɛn durum wure, nɛn kukunu ɡbisɑ,
nɑ weeweenu kuɑ tɔ̃ɔ ɡiriru,
domi wunɛn nɔmu ɡɑ mɑn sɛ̃re bururu kɑ yokɑ.
Nɛn dɑm mu dɛllɑ nɡe mɛ dɑ̃ɑ wurusu su rɑ ko sɔ̃ɔ sɑ̃rerun sɑɑ.
Nɑ nɛɛ, kon nɛn torɑnu wurɑ
wunɛ Yinni Gusunɔn mi.
Nɑ nɛn durum tuubɑ kuɑ wunɛn mi,
nɑ ǹ nɛn kɔ̃sɑ beruɑ.
Mɑ ɑ mɑn nɛn durum tɑɑrɛ wunɑri.
Yen sɔ̃, n weenɛ bɑɑwure wi u nun nɑɑnɛ sɑ̃ɑ
u nun kɑnɑ wɑhɑlɑn sɑɑ sɔɔ.
Bɑɑ nim bɑkɑm mù n yibɑ mu sɑrɑ,
mu ǹ yɛ̃ro turi.
Wunɑ sɑ̃ɑ nɛn kuku yeru,
ɑ rɑ mɑn ɡbɑre wɑhɑlɑn di.
A derɑ nɑ womusu mɔ̀ wunɛn fɑɑbɑn sɔ̃.
Yinni Gusunɔ, ɑ nɛɛ, kɑɑ mɑn keu ko,
kpɑ ɑ mɑn swɑɑ sɔ̃ɔsi ye n weenɛ n swĩi.
Kɑɑ mɑn bwisi kɛ̃, kpɑ ɑ n mɑn kɔ̃su.
A mɑɑ nɛɛ, n ku ko bwisi sɑriruɡii nɡe dumɑ,
ǹ kun mɛ nɡe birɑkɔ,
yìn nɔɔwɔ bɑ ǹ koo ko bɑ kun yɑrukɑ
kɑ kɑrɑbɑsuuru doke,
bɑ n kɑ yi ɡɑwe, kpɑ yi ku rɑɑ tɔnu wɔri.
10 Tɔn kɔ̃sobun wɑhɑlɑ kpɑ̃,
ɑdɑmɑ wi u Yinni Gusunɔ nɑɑnɛ sɑ̃ɑ,
win durom mu rɑ n yɛ̃ro wɑ̃ɑsiwɑ.
11 Yen sɔ̃, bɛɛ ɡemɡibu, i ɡɔ̃ru doro Yinni Gusunɔ sɔɔ,
kpɑ i dɛsinu kɑrɑ.
Bɛɛ bèn ɡɔ̃ru ɡɑ dɛɛre,
i ɡuudɑ koowo kɑ nuku dobu, bɛɛ kpuro.